La lepre e la tortuga (jua)


Lepre e Tortuga es un jua de table en la stilo deutx, desiniada par David Parlett en 1974 e publicida par Intellect Games. En 1978, lo ia es republicida par Ravensburger en Deutxland, do la jua deveni un susede enorme. De alora, cualce 2 milion de la jua ia es vendeda en a min 10 linguas, incluinte alga editas piratida. La edita corente es par Gibson Games en Britan, Ravensburger en Deutxland, e Rio Grande Games en la SUA.

La jua es fundida sur la fable par Esop nomida "La tortuga e la lepre", en cual la du deside compete en un curso. La tortuga gania par sua astutia, en cuando la lepre fali car el supraestima se e ave un dormeta durante la curso. La moral de la fable es "lente ma constante gania la curso", cual es un parte de la metodo de la jua.

La jua ia usa un nova metodo de jua. Ante lo, move de pesos en juas de curso ia es xef determinada par la lansa de dados. En lepre e tortuga, juores paia carotas (la "mone" en la jua) per move. La plu cuadros la juor vole avansa, la plu carotas la juor debe paia:

  • 1 cuadro = 1 carota
  • 2 cuadros = la custa de 1 cuadro + 2 = 3 carotas
  • 3 cuadros = la custa de 2 cuadros + 3 = 6 carotas
  • 4 cuadros = la custa de 3 cuadros + 4 = 10 carotas
  • etc, en esta modo.

La juores pote gania plu carotas en modos variosa - la plu notable, par move a retro a cuadros marcada (10 carotas per cuadro). Esta metodo crea un curso interesante e dinamica, tipal con no ganior clar asta la fini. La juores comensa la jua con 65 carotas. La table de la jua ave 65 cuadros. La jua ave no cuadros jeneral; en loca, la table es divideda en tipos variosa de cuadros como un cuadro "lepre" (prende un carte de fortuna), "carotas" (prende carotas plu per cada turno ometeda, etc.

La fator de fortuna pote es eliminada tota de la jua par un acorda entre la juores per no fini sur cuadros "lepre".

Sola un jua de curso como esta es conoseda: Bantu, publicida en Parker Brothers en 1955, ma cual no ia servi como un model per Lepre e Tortuga.