Labora (fisica)

En siensa, labora es la enerjia transmeteda a o de un ojeto par la aplica de forte longo un desloca. En sua forma la plu simple, per un forte constante aliniada con la dirije de move, la labora egali la multipli de la forte e la distantia traversada. On dise ce un forte fa labora positiva si lo ave un composante en la dirije de la desloca de la punto de aplica. Un forte fa labora negativa si lo ave un composante oposada a la dirije de la desloca a la punto de aplica de la forte.

Un lansor de basebal fa labora positiva a la bal par aplica un forte a lo tra la distantia cual lo move en sua mano.

Per esemplo, cuando un bal es tenida supra la tera e alora cade, la labora fada par la forte gravital sur la bal cuando lo cade es positiva, e es egal a la pesa de la bal (un forte) multiplida par la distantia a la tera (un desloca). Si la bal es lansada a supra, la labora fada par la forte gravital es negativa, e es egal a la pesa multiplida par la desloca en la dirije a supra.

Ambos forte e desloca es vetores. La labora fada es donada par la multipli scalal de la du vetores, do la resulta es un scalal. Cuando la forte F es constante e la angulo θ entre la forte e la desloca s es ance constante, alora la labora fada es donada par:

$W=Fs\cos \theta$

Si la forte es variable, alora labora es donada par la integral linial:

$W=\int {\vec {F}}\cdot d{\vec {s}}$

do $d{\vec {s}}$ es la cambia peti en la vetor de desloca.

Labora es un cuantia scalal, donce lo ave sola un grandia e no un dirije. Labora transfere enerjia de un loca a un otra, o de un forma a un otra. La unia SI de labora es la jul (J), la mesma unia como per enerjia.