La leon de cavas (Panthera spelaea) es un spesies estinguida de la jenera Panthera cual ia evolui en Europa probable pos la eda interglasial de la cromerian tre, min ca 600,000 anios ante oji. Analise de osos fosilida mostra ce lo ia es distinguida e isolida jenetical de la leon moderna (Panthera leo) cual abita Africa e Asia. Los ia separa como spesies individua sirca 1.9 milion anios ante aora. La pesos de osos la plu vea ia es escavada en Iacutia, Rusia e radiocarbonal datida a a min 62,400 anios a ante. La plu resente ia aveni sirca 11,925 anios a ante en Fairbanks, Alaska. Los deveni estinguida sirca 13,000 anios a ante.

La leon de cavas es conoseda de depintas en cavas paleolitica, siselidas de ivor, e figures de arjila. Esta fabricadas arceolojial indica ce lo ia pote es incluida en rituos relijiosa en la paleolitica. Un desinia en la cava Chauvet en Frans, estimada como 30,000 anios vea, mostra de leones de cavas pasea con lunlotra. La leon a fronte es min grande ca la otra, cual es desiniada con un scroto ma sin un crinera. Depintas de esta tipo sujesta ce la leon de cavas mas no ave crineras, o a la plu crineras multe peti.

Panthera spelaea ia es posible plu ca 10% plu grande ca leones moderna. Como leones moderna, la femas ia es min grande ca la mases. Capeles trovada en 2016 prosima la Rio Maly Anyuy ia es identifiada como de un leon de cavas usante analise de ADN. Compara con la capeles de un leon moderna indica ce la capeles de la leon de cavas ia es probable simil en color, ma alga plu pal. Plu, la leon de cavas ave probable capela multe densa, con un strato an plu densa, posible un ajusta a la clima de la eda glasial.

La abita de la leon de cavas estende de Europa a Alaska tra la ponte de Bering. Los abita areas abrida, como la stepe de la mamutes e la foresta de la taiga. Cuantias sinifiante ia es escavada de cavas, do la osos de la iena de cavas, la urso de cavas e fabricadas paleolitica ia es ance trovada. Analise de la osos indica ce la enfantes de la urso de cavas, renos e otra servos ia es la comedas la plu comun de leones de cavas. Los plu tarda par xasa xef la renos, asta de borda de estingui local de ambos spesies.