Linguas tibetan
La linguas tibetan es un grupo de linguas de la familia tibeto-burman desendeda de tibetan vea, parlada tra un area vasta de Asia sentral este, bordante la sucontinente India. Tibetan clasica es un lingua de leteratur major per la area, spesial per sua usa en leteratur budiste.
La lingua tibetan sentral, tibetan khams, e tibetan amdo es jeneral videda como dialetos, spesial car los comparti un sola lingua per leteratur. Dzongca, sicimes, xerpa, ladaci, e balti es videda como linguas separada.
La linguas tibetan ia es parlada par sirca ses milion persones. Con la sperde tra la mundo de budisme tibetan, la linga tibetan ia sperde en la mundo ueste. Estra Lhasa, la dialeto de Lhasa es parlada par sirca 200,000 persones escluida a India e otra paises. Lo es ance parlada par grupos de minorias etnica en Tibet ci ia vive prosima a la tibetanes per sentenios, ma reteni sua propre linguas e cultures.
La morfolojia de linguas tibetan pote es jeneral descriveda como aglutinante.
Vide ance, Tibetan. Tibetan usa la alfabeta tibetan.
Tournadre (2005, 2008, 2013) clasi la linguas tibetan como esta:
- Central Tibetan (incluinte Ü-Tsang, la funda de tibetan normida)
- Khams
- Amdo
- Ladakhi–Balti
- Dzongkha–Lhokä
- Lahuli–Spiti
- Kyirong–Kagate
- Sherpa–Jirel
- Tibetan este
Otra linguas posible de la familia no es sabeda sufisinte per clasi.
En la plu de Tibet, educa prima es conduida o xef o intera en la lingua tibetan, e educa bilingual es rara introduida ante cuando studiantes ateni la scola media. Ma xines es la lingua de instrui en la plu de la liseos. Studiantes ci continua en scola ave la eleje de studia sujetos umaniste en tibetan a alga universias per minorias en Xina. Alfabetisme e la frecuentia de enscrive en scola pare la conserna xef de la governa xines. La plu de la adultes en Tibet resta nonalfabetiste, e an con politicas de educa obligante, multe jenitores en areas campanian no es capas de envia sua enfantes a scola.
Alga organizas estra Xina ia acusa Xina de un atenta a elimina la cultur e lingua de Tibet. An si la eforta par la governa xines a aida la tibetans es minimal, lo no es tro diferente de la eforta par otra nasiones, incluinte los de la ueste. Serta, plu es nesesada si on vole salva la lingua e cultur de Tibet.
Referes edita
Tournadre, Nicolas; Dorje, Sangda (2003), Manual of Standard Tibetan, New York: Snow Lion Publications