Linguas tupian
La linguas tupian es un familia cual es composada par alga 70 linguas parlada en America Sude, de cual la plu bon conoseda es tupi e guarani.
A. D. Rodrigues (2007) e con Ana Cabral (2012) ia sujeste ce la loca orijinal de la linguas tupian es alga loca entre la Rio Guapore e la Rio Aripuana, en la basin de la Rio Madeira. Rodrigues crede ce la lingua prototupian estende a ante a sirca 3000 aec.
Cuando la portuges ia ariva en Brasil, los ia trova ce, a cualce locas ce los vade longo la costa vasta, la nativas ia parla linguas simil. La misionores jesuita prende la vantaje de la similes e sistemi los. La lingua la plu bon conoseda e parlada par la plu multe persones ia es tupi vea, de cual un desendeda moderne es ancora usada par persones oji en la rejion de la Rio Negro.
En la colonias espaniol visina, guarani, un lingua relatada prosima a tupi vea, ia es capas de oposa la estende de espaniol. Oji, guarani ave sirca sete milion parlores, e es un de la linguas ofisial de Paraguai.
La familia tupian ave un morfolojia simil a lo de la familias de linguas je e carib, e A. D. Rodrigues (2000) junta tota como un familia je-tupi-carib. El lista nove ramos de la familia, en du sufamilias:
Tupian ueste
- linguas purubora-ramarama (rôndonia; tre linguas)
- linguas monde (mondé; ses linguas)
- linguas tupari (tuparí; ses linguas)
- linguas aricem (arikém; du linguas)
Tupian este
- linguas tupi-guarani (50 linguas: tupí (tupi vea; estinguida), guaraní (5 milion parlores), etc)
- aueti (awetï)
- maue (lingua) (mawé)
- linguas mundurucu (mundurukú; du linguas)
- linguas iuruna (yurúna, jurúna; tre linguas)
Referes
edita- Rodrigues, Aryon Dall'Igna (2007). "As consoantes do Proto-Tupí". In Ana Suelly Arruda Câmara Cabral, Aryon Dall'Igna Rodrigues (eds). Linguas e culturas Tupi, p. 167-203. Campinas: Curt Nimuendaju; Brasília: LALI.
- Rodrigues, Aryon Dall'Igna, and Ana Suelly Arruda Câmara Cabral (2012). "Tupían". In Campbell, Lyle, and Verónica Grondona (eds). The indigenous languages of South America: a comprehensive guide. Berlin: De Gruyter Mouton.
- Rodrigues A. D., 2000, "‘Ge–Pano–Carib’ X ‘Jê–Tupí–Karib’: sobre relaciones lingüísticas prehistóricas en Sudamérica", in L. Miranda (ed.), Actas del I Congreso de Lenguas Indígenas de Sudamérica, Tome I, Lima, Universidad Ricardo Palma, Facultad de lenguas modernas, p. 95-104.