Lucio Livio Andronico ia es un dramiste e poesiste epica elinica-roman de la periodo de la latina antica. El ia comensa como un educor en la servi de un familia nobil en Roma traduinte obras elinica a latina, incluinte la Odisea de Homero. Los ia es traduida con la ojeto de servi per educa en la scola cual el ia fundi. El ia scrive obras teatral cual ia es videda como la prima obras dramal scriveda en latina. Sua comedias ia es fundida sur la Comedia Nova elinica e ia presenta la carateres con vestes elinica. Tal, la romes ia refere a esta jenero nova como comoedia palliata (fabula palliata). La biografiste Suetonio plu tarda ia crea la terma "dui-elinica" de Livio e Enio (referente a la jenero, no a sua fondos etnical). La jenero ia es imitada par la dramistes seguente per segue la pasos de Andronico e per tal el ia es videda como la padre de la presentas teatral roman e de la leteratur latina en jeneral; per dise, el ia es la prima scrivor en latina. Varro, Cicero e Horatio, tota scrivores en la periodo de la latina clasica seguente, ia considera Livio Andronico como la fundor de la leteratur latina. El es la poesiste latina plu antica de ci sua nom es conoseda.

Livio Andronico

Informa personal

Nase: s 284 aec en Taranto
Mori: s 205 aec en Roma
Pais: Roma antica

Otra informas

Profesa: Scrivor, autor teatral, poesiste
Move: Odisea en latina