Abri la menu xef

Luigi Pirandello (1867–1936) ia es la dramiste italian la plu importante de la periodo entre la Gera Mundal Prima (1914–18) e la Gera Mundal Du (1939–1945). El ia gania la premio Nobel per leteratur en 1934.

Pirandello ia nase en Agrigento, Sisilia. El ia es conoseda internasional per sua teatral Ses carateres xercante un autor (1920). Sin crede a normas fisada de etica, moralia, politica o relijio, la carateres en la teatrales e naras de Pirandello trova la realia sola en se mesma, e descovre alora ce los es esentes nonstable e nonesplicable.

Pirandello ia espresa umorosa sua pesimisme profonda e sua compatia per la confusa e sufri de la state umana. El ia fa novis importante ance en tecnicas de stadio, evadente la restrinjes de realisme par usa elementos de fantasia per crea la efetos cual el ia vole.

Entre otra teatrales de Pirandello es La plaser de onestia (1917), Lo es tal si lo pare a tu (1917), Henrico 4 (1922), e Como tu desira me (1930). El ia scrive ance la novela La escluida (1901), e la colie de naretas (nomida per sua teatral prima) Considera lo, Giacomino!.