Lupo

La lupo (Canis lupus) es un spesie de canido cual es nativa a la areas savaje de America Norde, Eurasia, e Africa Norde. El es la membro la plu grande de la familia, con mases de 43 - 45 kg e femas de 36 - 38 kg. El es simil a la pastor deutx o la can de treno en se apare jeneral, ma el ave un testo plu grande, un peto plu streta, gamas plu longa, un coda plu reta, e pedes plu grande. Se pelo en inverno es longa e densa, e es plu comun gris variante, an si lo pote es entre cuasi blanca, roja, brun, o negra.

Um lupo gris, ululante

En la jenero Canis, la lupo es un varia plu spesialida e progresante ca se cusines plu peti (la coiote e la xacal oro), cual es mostrada par se adotas per xasa preda grande, se natur plu sosial, e se capas de espresa sofisticada. Un animal sosial, el viaja es familias nucleal (un duple corteante e se projenia adulte. La lupo es normal la xasor prima tra se estende, con sola umanas e tigres como menasas seria. El come prima ungulatos grande, an si el come ance animales plu peti, bestias domada, corpos mor, e dejetada.

La lupo es un animal multe rexercada, con posible la plu libros scriveda sur el ca cualce otra spesies savaje. El ave un istoria longa de asosia con umanas, odiada e xasada en la plu de comunias cultivante, ma ance respetada per se intelijente par tribus noncultivante. El es la asendente sola de la can, cual ia es prima domada en Asia sude-ueste. An si la teme de lupos es comun en multe sosias umana, la plu de atacas recordada es par lupos cual sufri de rabia. Lupos sin rabia ia ataca e mori alga persones, per la plu parte enfantes, ma esta es noncomun, car lupos abita distante de umanas e ia aprende teme umanas par xasores e pastores. Xasa e trapa ia redui la estende de la spesie a sirca un tri de la estende orijinal, ma la spesie no es menasada par estingui a la nivel global