Lupus
Lupus (o, plu tecnical, "lupus eritemosa sistemal") es un maladia autoimune en cual la sistem imunial ataca par era texedas sana en multe partes de la corpo. Sintomes varia entre persones e pote es blanda a sever. Sintomes comun inclui juntas dolosa e inflada, febre, dole de peto, perde de capelas, ulseres de la boca, nodos limfal enflada, fatiga, e un eruta roja (eritema) cual es plu comun a la fas. Comun, on ave periodos de maladia, nomida "atacas", e periodos de remete en cual on ave poca sintomes.
La causa de lupus no es clar. Lo probable envolve jenetica e fatores ambiente. En jemelos identica, si un ave la disturba, la otra ave un 24% risca de ave lo ance. Ormones sesal femal, lus de sol, fuma, nonsufisi de vitamina D, e alga infetas, aumenta ance a risca. La mecanisme envolve un responde imune par autoanticorpos contra la texedas de la person mesma. Estas es plu comun anticorpos antinucleal e los resulta en inflama. Diagnose pote es difisil e es fundida sur un combina de sintomes e probas de laborateria. On ave un cuantia de otra tipos de lupus como lupus discoide, lupus neonaseda, e lupus cutanea suacuta.
No remedia esiste per lupus. Tratas pote inclui antiinflamantes nonsteroide, corticosteroides, imunosupresantes, idrosiclorosin, e metotrexato. Espeta de vive es plu basa entre persones con lupus, e lo crese sinifiante la risca de maladias cardiovasculal, cual es la causa plu comun de mori. Con trata moderne, sirca 80% de persones afetada pote survive plu ca 15 anios. Femes con lupus ave insintas con plu risca, ma la plu de los susede.
La frecuentia de lupus varia entre paises de 20 a 70 per 100,000. Femes cual pote deveni ensinta es afetada sirca nove veses plu ca omes. An si lo comensa plu comun entre 15 e 45 anios, un estende larga de edas pote es afetada. Los ci ave asendentes african, caribe, e xines ave riscas plu alta ca persones blanca. La frecuentia de la maladia en la mundo developante no es clar. Lupus es latina per "lupo": la maladia ia es tal nomida en la sentenio 13 car la eruta ia es crededa simil a la morde de un lupo.