Maladia cardiovascular
'Maladia cardiovascular es un clase de maladias cual envolve la cor o la dutos sangual. Lo inclui maladias de la arterias de la cor, como anjina e infarta miocardial (o "ataca de cor"). Otras inclui ataca serebral, fali de la cor, reumatica de la cor, cardiomiopatia, ritmos nonormal de la cor, maladias conjenital de la cor, maladias de la valvas de la cor, cardite, aneurismes de la aorta, maladia de la arterias periferial, maladia tromboembolia, e trombose venal.
La mecanicas su la maladia varia, dependente de la maladia. Maladia de arterias de la cor, ataca serebral, e maladia de arterias periferial envolve aterosclerose. Esta pote es causada par presa sangual alta, usa de tabaco, diabete, manca de eserse, obesia, colesterol sangual alta, mal dieta, usa esede de alcol, entre otras. Presa sangual alta es estimada como culpable per sirca 13% de moris de maladia cardiovascular, tabaco per 9%, diabete per 6%, manca de eserse 6%, e obesia 5%. La maladia de reumatica de la cor pote segue farinjite streptococal.
Lo es estimada ce tan alta como 90% de maladias cardiovascular pote es prevenable. Preveni de lo envolve boni la fatores de risca par come sana, eserse, evita la fumas de tabaco, e limita la usa de alcol. Trata de fatores de risca, como presa sangual alta, lipidos sangual, e diabete es ance beneficante. Trata persones ci ave farinjite streptococal pote descrese la risca de maladia reumatica de la cor. La usa de aspirina en persones ci no es malada es beneficante nonclar.
Maladias cardiovascular es la causa xef de mori en tota partes de la mundo, estra Africa. Los ia resulta en sirca 18 milion moris (32%) en 2015, un crese de 12 milion (26%) en 1990. Moris, a un eda spesifada, de maladias cardiovascular es plu comun e crese en la plu parte de la mundo developante, en cuando los descrese en la mundo developada de la desenios de 1970. Maladias de arterias de la cor e atacas serebral es culpable per 80% de moris de maladias cardiovascular en mases, e 75% de moris en femes. La plu de maladias cardiovascular afeta adultes plu vea. En la SUA, 11% de persones entre 20 e 40 ave un de la maladias cardiovascular, 37% entre 40 e 60, 71% entre 60 e 80, e 85% de la persones supra 89. La eda promedia de mori de maladias de arterias de la cor en la mundo developada es sirca 80, en cuando lo es sirca 68 en la mundo developante. Diagnose de maladias tipal aveni 7 a 10 anios plu temprana en mases ca femes.