Maladia de Kawasaki

La maladia de Kawasaki (ance conoseda como la sindrom de Kawasaki, sindrom de nodas de limfa, e sindrom mucocutanea de nodas de limfa) es un maladia autoimunal ce mostra se como un vasculite de la vasos de grandia media, e es la plu trovada en enfantes su sinco anios. El causa dana a multe sistemes, incluinte la vasos de sangue, la pel, la membranos mucos, e la nodas de limfa. La dana plu perilos es a la cor, do el pote causa aneurismes de la arterias de la cor en enfantes nontratada. Sin trata, cuasi 1 % de la enfantes con la maladia mori, en la plu casos en min ce 6 mensas de comensa. Con trata, la proportio es min ce 0.01 % (en la SUA). Ave frecuente un infeta viral preesistente ce posable ave un rol en la patojenese. La mucosa de la boca e la conjuntiva, con la pel, deveni eritemos (roja e inflamada). Edema es frecuente presente en la manos e pedes, e la nodas limfal de la colo es comun grandida. Ance, un febre flutuante, comun 40ºC (104ºF) o plu es comun en la fase acuta de la maladia. En enfantes nontratada, la periodo de febre dura sirca 10 dias, ma pote varia de 5 a 25 dias. La maladia ia es prima descriveda en 1967 par Dr Tomisaku Kawasaki de Nion.

Un enfante con la maladia de Kawasaki