Mamluces (arabi: مملوك mamlūk (singular), مماليك mamālīk (plural)) ia es un caste de soldatos-sclavos, convertida a islam e asiniada a cargas militar e ofisias de governa.

Un mamluc en armur completa
Lansores mamluc de sentenio 16 temprana
Un cavalor mamluc de 1810

La grupo de mamluces la plu durante ia es un clase militar de cavalores en Egipte en la eda medieval. Los ia es xef sclavos prendeda de otra nasiones, spesial de turceses, coptes, adiges, acazas, e cartulis. Multe ia es ance prendeda de la balcanes, como xcipes, elinicas, e slavicas sude. La fenomeno de la mamluces ia ave un importa politica, e ia dura per cuasi mil anios, de la sentenios 9 a 19.

An tal la mamluces ia es comprada como propria, sua state ia es supra sclavos comun, ci no ia es permeteda a porta armas o fa alga taxes. En Egipte, los ia es videda como superior a la popla egiptian, como "seniores vera" e "gerores vera".

Tra tempo, la mamluces ia prende potia en alga sosias controlada par renores muslim, spesial en Egipte, ma ance en Levante, Mesopotamia, e India. En alga casos, los ia ateni la grado de beces, amires, e an sultanes. Los ia despone la sultan de Egipte, e ia crea la Sultania Mamluc. Los ia defeta la Ilhanias (renores mongol e turces de Iran, Irac, e Turcia) a la batalia de Ain Jalut. Los ia plu temprana batalia la crusadores cristian en 1154-1169 e 1213-1221, forsante los estra Egipte e Levante. Los espulsa la resta de la cristianes de Levante, cual fini la eda de la crusadas.

En la Sultania Mamluc, la mamluces ia es comprada cuando ancora joven. Los ia es elevada en la casernas de la Sitadela de Qahira. Los ia es isolida de otra egiptianes, e sua educa sever militar, los ia es suposada como fidante a sua renores. Cuando sua educa ia es completida, los ia es descargada ma resta liada forte a la padron ci ia compra los. Mamluces ia depende de la aida de sua padrones per promove sua careras.

La Sultania Mamluc ia survive atacas par la turces, ma Selim (sultan de a Impero Osmanan) ia catura Qahira en 1517. La impero reteni la mamluces como un clase de renores egiptian.

En 1811, Muhammad Ali, la governor de Egipte su la osmananes, ia invita la mamluces xef a sua palasio per un selebra. Sua armada ia mata cuasi tota la mamluces de la Sitadela de Qahira en la Masacra de la Sitadela. Esta continua la semana seguente, e sirca 3000 mamluces e sua familias ia es matada - plu ca 1000 en la Sitadela.

Per un sistem simil, vide la article sur la jeniseri de la Impero Osmanan.