Mamut
Un Mamute es cualce spesie de la jenera estinguida Mammathus, en la familia Elephantidae, relatada a la elefante moderna. Los ia ave dentones longa e curvida e, en la spesies norde, un covre de capeles longa. Los vive de la epoca pliosene (de sirca 5 milion anios ante aora) a la olosene a sirca 4,000 anios ante aora, e spesies variosa esiste en Africa, Europa, Asia, e America Norde. Depintas de Mamutes par umanas esiste en cavas de la eda paleolitica.
La plu vea esemplo de mamute es la mamute de Africa sude (M. subplanifrons), cual ia apare sirca 5 milion anios ante aora. Desendentes de estas ia move a norde e ia continua produi spesies nova, ultima estende tra Eurasia e America Norde a min 600,000 anios a ante. La spesies cual emerji final, la mamute lanosa (M. primigenius), ia developa sirca 400,000 anios a ante en Asia este, con alga survivente sur la Isola Wrangel en Rusia a la Mar Artica tan resente como 3,700 a 4,000 anios ante aora, esistente ancora durante la construi de la Piramide Grande de Egipte antica.
Como sua relatas moderna, mamutes ia es grande. La plu grande ateni altias sirca 4 m a la spala e pesas de plu ca 12 tones. Ma la plu de spesies ia es sola tan grande como la elefante asian de aora (2.5 a 3 m alta, a masima 5 tones). Ambos sesos ave dentones. A prima, un duple peti apare a sirca ses menses, e los es reponeda a sirca 18 menses par un duple permanente.
Seguente studias de elefantes moderna, mamutes ia ave probable un jesta de 22 menses, resultante en la nase de un enfante solitar. Sua strutur sosial ia es probable simil a lo de elefantes moderna, con femas vivente en manadas gidada par un madron, e mases vivente solitar o en grupos laxe pos sua maturia sesal.
Siensistes ia descovre e studia la restas de un mamuteta e ia trova ce gras influe sua forma, e capasi ce la animal reserva un cuantia grande de nurintes nesesada per survive en temperatures tan basa como -50º. La gras permete ance ce la mamutes crese sua masa de musculo, cual permete ce los pote luta con sua enemis e vive plu longa.
Dependente de la spesie, la dieta difere dependente de la loca, an si tota mamutes come cosas simil. Per la mamute columbian (M. columbi), la dieta ia es xef a pasto. Lo come folias de cactos, arbores, e arboretas. Esta suposas ia es fundida sur la feces e dentes de la mamutes trovada. La mamute mongochen ia come erbas, larix, e posible alno. La mamutes european ia ave un dieta de plantas cual fisa la carbono C3. La tundra e stepe artica do la mamutes vive par es dominada par forbias, no erbas. Los ia es plu rica en protena e plu fasil dijestada ca erbas e plantas leniosa, cual va domina la areas cuando la clima ia deveni plu mol e calda. Esta es posible un razona perce la animales grande de la artica ia estingui.