Mandan

La mandanes es un tribu de americanes orijinal de la Planos Grande de America Norde, e ia abita per sentenios en lo cual es aora Dakota Norde. Los es parte de la Tre Tribus Asosiada de la Reserva de Fort Berthold. Sirca dui de la mandan abita ancora en la area de la reserva; la resta abita tra la SUA e en Canada.

Istorial, la mandan ia abita longo ambos rivas de la Rio Missouri alta e du de sua afluentes - la Rio Heart and la Rio Knife - en la Dakotas de oji. Parlores de mandan, un de la linguas su, los ia developa un cultur de cultivores. Los ia crea vilas permane con casas grande e ronda e fabricada de tera, algas 12 m en diametre, ensircante un plaza sentral. Familias matrilinial ia abita esta casas. La mandanes ia es un nasion de comersiores grande, vendente sua suprapasas grande de mais con otra tribus per carne e gras de bison. Comedas ia es la cosa xef, ma los compra anca cavalos, fusiles, e otra benes.

La cuantia de la popla mandan ia es 3600 en la sentenio 18 temprana. On ia estima ce los ia es entre 10,000 e 15,000 ante la ariva de la europeanes. Reduida par la epidemica vasta de variola en 1781, la popla ia debe abandona alga de sua vilas, e la restas de la tribu hidatsa ia junta con los en un cuantia reduida de vilas. En 1836, los ave plu ca 1600 mandanes, ma seguente un otra epidemica de variola en 1836 e 1837, la popla ia es reduida a 125 persones per 1838.

En la sentenio 20, la popla ia comensa recovre. En la desenio de 1990, 6000 persones ia es membros de la Tre Tribus Asosiada. En la conta de 2010, 1171 persones ia reporta asendentes mandan. Alga 365 de los identifia se como "de sangue plen", e 806 ia ave sangue partal mandan.

La nom "mandan" es derivada de la esploror franses-canadian Pierre Gualtier, Senior de la Verendrye, ci en 1738 ia oia sua gidores assiniboine nomi los mayádana. La mandanes mesma ia usa autonomes diferente per se mesma: Numakaki o ruwakaki (multe persones, popla), ante la epidemica de 1837-1838. Pos acel, los nomi se nueta ("nos mesma, nosa popla").

Lingua

La lingua mandan (Nų́ų́ʔetaa íroo) es en la familia de linguas su. Lo ave du dialetos major: nuptare e nuetare. Sola la prima ia survive a la sentenio 20. Tota parlores ia es bilingual en hidatsa. Ma per 1999, sola ses parlores fluente ia es ancora vivente. De 2010, los ia inclui programes de la lingua en scolas local.

La mandanes e sua lingua ia reseta multe atende par americanes european, en parte car la color de sua pel ia es plu pal ca sua visinas, cual causa algas a pensa ce los pote ave posible un orijina european. En la desenio de 1830, Prinse Maximilian de Wied ia spende multe anios studia mandan, comparante lo con cimri (car el ia suposa ce la mandanes es posible cimris desponeda). Ma rexercores no ia trova cualce indicas de esta teoria.

Mandan ave formas gramatical diferente cual depende de la seso de la escutor. Demandas dirijeda a un om debe usa la sufisa -oʔša, a un fem, -oʔrą. Simil, la sufisa de un frase direta es -oʔs per omes, e -oʔre per femes, e la sufisa de comandas es -ta per omes e -rą per femes. Mandan, como multe otra linguas de America Norde, ave elementos de simbolisme de sona en sua vocabulo. La soma de /s/ comun sujesta petia o min intensia, /ʃ/ es media, a /x/ indica grandia o plu intensia. Per esemplo:

síre "jala"
šíre "brun jalin"
xíre "brun"
sró "tintina"
xró "clace"

Istoria

Preistoria

La orijinas e istoria temprana de la mandan no es conoseda. Studias temprana par linguistes ia sujesta ce la lingua mandan es relatada posible a la lingua de la popla ho-chunk o winnebago de Wisconsin de oji. Esta idea es posible suportada en la istoria parlada, cual refere a los veni de un loca a este e prosima a un lago.

Otras ci studia la mandan crede ce, como otra popla ci parla linguas su (posible con la hidatsa), los ia orijina en la area de la Rio Mississippi media e la vales de la Rio Ohio. Si esta ia es la caso, la mandan ia debe migra a norde a la vale de la Rio Missouri e la enflue de la Rio Heart en Dakota Norde de oji. Esta es do la europeanes ia encontra prima la tribu istorial. Esta migra es crededa como aveni tan temprana a la sentenio sete, ma plu probable entre 1000 ec e la sentenio 13, pos la cultiva de mais ia es adotada. Acel ia es un periodo de cambia major de clima, creante un ambiente plu calda e umida cual aida sua produi cultival.

Pos sua ariva a la rivas de la Rio Heart, la mandan ia construi alga vilas, la plu grande de los a la boca de la rio. Radar e arceolojia ia mostra cambias en la borda de defende de esta vilas tra tempo. La popla ia construi fosos e sercas de palos sirca areas plu peti cuando sua cuantias de popla ia redui.

A alga punto en esta periodo, la popla hidatsa ia move ance en la rejion. Los ia parla ance un lingua su. Tradisional, la mandanes dise ce la hidatsa ia es un tribu nomada asta sua encontra con la mandan, ci instrui los en la construi de vilas e la arte de cultiva. La hidatsa ia continua manteni relata amin con la mandan e construi vilas a norde de los a la Rio Knife.

Plu tarda, la poni e aricara ia move de la Rio Republican, norde longo la Rio Missouri. Los ia es parlores de un lingua cado, e la aricara ia es frecuente competores con la mandan, an si ambos ia es orticulturistes. Los ia construi un vila nomida Crow Creek ("rieta de corvos") sur un falesa supra la Missouri.

La mandan ia es divideda entre grupos. La nup'tadi (no tradui) ia es la grupo la plu grande. La otras ia es la is'tope ("los ci tatu se mesma"), la ma'nana'r ("los ci disputa entre se mesma), la nu'itada ("nosa popla"), e la awi'ka-xa (no tradui). La nup'tadi e nu'itadi ia abita ambos rivas de la Missouri, e la awi'ka-xa ia abita plu contra la flue a la Painted Woods ("boscas pintada").

Tota grupos ia pratica cultiva, cual ia es fada par la femes, incluinte la seci e prosede de mais. La vilas mandan-hitatsa, nomida la "mercato de la planos sentral", ia es sentros major de comersia en la redes de intercambia de la Planos Grande. Recolies ia es intercambiada, con otra benes cual ia es portada de tan distante ca la Costa Norde-ueste. Plu esamina de sua vilas a la planos norde ia revela ce benes inclui los de la Rio Tennessee, Florida, la costa de la Mar Mexican, e la costa de la Atlantica.

La mandanes ia move gradal contra la flue, e asembla en Dakota Norde per la sentenio 15. De 1500 a sirca 1782, la mandan ateni la apojeo de sua cuantia de popla e influe. Sua vilas ia mostra densias cresente, con defendes plu forte. Los ia ave 115 casas grande con plu ca un mil abitores. La grupos no ia move frecuente longo la rio asta la sentenio 18 tarda, pos sua cuantias ia cade par variola e otra epidemicas.

Encontras con la europeanes

La european prima conoseda como visitante la mandan ia es la mercator franses-canadian Senior de la Verendye en 1738. La mandanes ia porta el a sua vila, la loca aora no conoseda. Lo es estimada ce, a la tempo de sua visita, 15,000 mandanes ia abita en la nove vilas bon fortida a la Rio Heart. Alga vilas ia ave tan multe como un mil casas grande. Seguente Verendrye, la mandanes de la periodo ia es un nasion grande, potiosa, e rica ci ia es capas de intercambia par sua propre restrinjes. Los intercambia con otra americanes orijinal de la norde e la sude.

La mandanes ia gania cavalos en la sentenio 18 media de la apatxe a la sude. La mandan usa la cavalos per transporta, porta pacos, e tira travuas, e per la xasa. La cavalos ia aida la estende de la teritorio per xasa a la planos. La encontra con la franses de Canada en la sentenio 18 ia crea un lia de comersia entre la franses e la americanes orijinal de la area. La mandan ia servi como ajentes media en la intercambia de peles, cavalos, fusiles, recolies, e produis de bisones. Mercatores espaniol e ofisiales en San Louis (pos cuando Frans ia sede sua teritorios ueste de la Rio Mississippi a Espania en 1763) ia esplora la Missouri e forti la relatas con la mandanes.

La espanioles ia desira descoraji comersia en la rejion par la engles e la americanes, ma la mandanes ia continua intercambia con tota competores. Los no ia intende limita se par la manobra par le europeanes. Mercatores franses en San Louis, Missouri ia atentia institui comunica direta entre Santa Fe, Mexico Nova e sua site; la frates Chouteau, mercatores de peles, ia gania un monopolio espaniol en intercambia en Santa Fe.

Un epidemica de variola ia aveni en Mexico Site en 1779-1780. Lo sperde lente a norde tra la Impero Espaniol, par comersia e gera, e ia ateni la planos norde en 1781. La comantxi e xoxone ia deveni infetada e ia porta la maladia tra sua teritorio. Otra popla gerante e intercambiante ia deveni ance infetada. La mandanes ia perde tan multe persones ce la cuantia de clanes ia es reduida de 13 a 7. 3 nomes de clanes de vilas a ueste de la Missouri ia es perdeda per sempre. Los ia move ultima a la norde sirca 25 milias, e combina en du vilas, un a cada lado de la rio, en cuando los reconstrui seguente la epidemica. La hidatsa, ci ia sufri simil de la epidemica, ia junta con la mandanes per defende, En e pos la epidemica, los ia es atacada par gerores de la lacota e la cro.

Per 1804, Lewis e Clark, esplorores american, ia visita la tribu, e ia nota ce la cuantia de mandanes ia es multe reduida par la epidemicas e par la grupos de gerores asiniboin, lakota, e aricara. (Plu tarda, la mandanes ia alia con la aricara per defende se contra la lakota.) La 9 vilas ia combina a du vilas en la desenio de 1780, un a cada lado de la Missouri. Ma los ia continua con sua ospitia famosa, e la mision de Lewis e Clark ia para prosima a sua vilas per la inverno per acel razona. Per onora sua ospitores, la mision ia nomi la vileta cual los ia construi Fort Mandan. Asi, Lewis e Clark ia encontra Sacagawea, un fem xoxone caturada par la mandanes. Sacagawea ia acompania la mision cuando los continua a ueste, e ia aida los con informa e capasias de tradui en cuando los viaja a la Mar Pasifica. Cuando los ia reveni a la vila mandan, Lewis e Clark ia invita la xef, Sheheke ("coiote" o "blanca grande") a Washington per encontra con presidente Thomas Jefferson. El ia reveni a la vilas mandan. El survive tra la epidemica de 1781, ma en 1812, xef Sheheke ia es matada en un gera con la Hidatsa.

En 1825, la mandanes ia suscrive un trata de pas con la xefes de la mision de Atkinson-O'Fallon. La trata esije ce la mandanes reconose la supremia de la Statos Unida. La mandanes e la armada de la SUA ia encontra nunca lunlotra en gera.

En 1832, la artiste George Catlin ia visita la mandanes prosima a Fort Clark. Catlin ia depinta e desinia senas de vive mandan, e de xefes e otra persones, incluinte Mato-tope ("Four Bears") Sua capasia a depinta tan impresa la xef ce el ia invita Catlin per es la om european prima cual ia es permeteda vide la rituo santa anial, la okipa. En la menses de inverno de 1833 e 1834, Prinse Maximilian de Wied e la artiste suiz Karl Bodmer ia visita ance la mandan.

La redui de la mandanes

La lacotas e otra tribus su ia ataca grupos de xasores mandan, con la resulta ce la mandanes ia ave difisiles per es secur en sua area de trata. La tribus ia demanda ce la armada de la SUA ta aida los, e los ta demanda per tal aida asta la fini de la fortia de la lacota. An si la mandanes ia ave un trata con la SUA, los reseta aida minima de la fortias american.

En la estate de 1862, la aricara ia junta la mandanes e hidatsa en la vila Like-a-Fishhook ("como un unco per pexa"). Tota tre tribus ia es forsada a vive estra sua area de trata a sude de la Missouri par atacas frecuente par la lacota o otra tribus su. Ante la fini de 1862, alga gerores su ia ensende un parte de la vila.

En junio 1874, on ave un gera prosima a la vila. Coronel George Armstrong Custer ia fali para un grupo grande de gerores lacota cual ia ataca la mandan, an si "la mandanes debe es protejeda la mesma como la colonistes blanca". Sinco aricaras e un mandan ia es matada par la lakota, ma esta ia es un de la atacas final par la lakota a la tre tribus.

Per 1862, la vila Like-a-Fishhook ia deveni denova un sentro major de intercambia en la rejion. Per la desenio de 1880, la vila ia es abandonada. En la dui du de la sentenio 19, la tre tribus (mandan, hidatsa, e aricara) ia perde gradal la controla de alga partes de sua teritorio: La trata de Fort Laramie de 1851 ia reconose 12 milion acres (49 mil km2) de tera como poseseda par la tre tribus; en 1870, la governa de la SUA sola reconose 8 milion acres (32 mil km2); en 1880, la governa ia priva la tribus de 7 milion acres (28 mil km2) de tera. Los reteni alora sola 1 mil acres estra sua reserva propre.

En la sentenio 20 temprana, la governa ia saisi plu tera, reduinte la reserva a 900,000 acres (3600 km2). Su la Indian Reorganization Act de 1934, la governa corajida la tribus per revive sua propre governas. La mandanes ia junta ofisial con la hidatsa e la aricara como la Tre Tribus Asosiada, con un constitui per eleje un governa representante, reconoseda par la SUA.

Triste, esta no para la efetos danante de la SUA: Construi de la Parario Garrison de la Rio Missouri, per controla de deluvias e iriga, ia crea Lago Sakagawea. Lo ia inonda partes de la reserva. La abitores de alga vilas ia es moveda e New Town ("vila nova") ia es construida per los. Multe dana a la fundas sosial e economial de la reserva ia es la resulta. La tera aora su un lago ia conteni alga de la areas per cultiva la plu fertil. La mandanes no ia ave otra tera cual ia es tan fertil, sur cual sua economia ia developa. Plu, la inonda ia ruina la locas de vila istorial e arceolojial con sinifias santa per la poplas.

Cultur

Casas e vilas

La mandan ia es conoseda per sua casa ronda e grande de tera, en cual plu ca un familia pote vive. Sua vilas permanente ia es composada de esta casas. Construida e mantenida par femes, cada casa ia es sirculo con un teto cupolin e un buco cuadro a la apico, tra cual la fumas de la foco pote sorti. Cuatro colones suporta la strutur de la casa. troncos ia es poneda contra estas, e la esterna ia es covreda con un tapeto fabricada de canas e rametas e alortaa covreda con feno e tera, cual proteje la interna de pluve, calda, e fria. Lo ia es sufisinte durante afin multe adultes e enfantes pote senta sur la teto de la casa. La casa inclui ance en strutur a la entra, simil a un portico longa per dona plu proteje contra mal clima.

La interna ia es construida sirca cuatro colones grande, sur cual faxones traversal suporta la teto. Esta casas ia es desiniada, construida, e la posese de la femes de la tribu, e posese ia es pasada tra la linia fema. Jeneral 12 m de diametre, los pote conteni 30 a 40 persones, ci ia es relatada tra la femes vea. Cuando un om joven sposi, el move a la casa de sua sposa, cual es comparti con sua madre e sores. Vilas ave tipal sirca 120 casas. Reconstruis de esta casas pote es videda a la Fort Abraham Lincoln State Park, prosima a Mandan, Dakota Norde, e a la Knife River Indian Villages National Historic Site.

Orijinal, la casas ia es retangulo, ma sirca 1500 ec, los ia comensa es construida en un forma ronda. A la fini de la sentenio 19, la mandan ia comensa construi peti casas de lenios, tipal con du sales. Cuando los viaja o xasa, la mandan ia usa tipis de pel. Oji, la mandanes abita en casas moderna.

Vilas ia es tipal orientada sirca un plaza sentral cual ia es usada per juas (como chunkey) e rituos. En la sentro de la plaza ia es un arbor sedro ensircada par un serca de lenio vertical. La santeria representa la "Om Solitar", un de la persones major en la relijio mandan. El ia construi, la nara dise, un ensirca de lenio cual ia salva la popla de la vila de un rio inondante en Dakota Norde. Vilas ia es comun locada sur presipes alta supra la rio. Frecuente, vilas ia es construida a la junta de enflues, per usa la acua como un paradeluvia natural. Do no paradores natural ia esiste, la vilas ia construi alga tipo de fortinte, incluinte fosos e sercas de palos.

Familia

La mandanes ia es orijinal divideda entre 13 clanes, cual ia es reduida a 7 per 1781, la resulta de moris en la epidemica de variola. 90% de la popla ia mori en la epidemica de 1837-1838. Per 1950, sola cuatro clanes ia survive.

Istorial, clanes ia organiza se sirca xasores susedente e sua relatas. Cada clan ia es espetada per cura per sua propre membros, incluinte orfanes e la veas, de nase a mori. La mor ia es curada tradisional par la clan de sua padre. Clanes ia fabrica un paceta de "medisin" santa, cual es composada de un poca de ojetos colieda creada como teninte potias santa. Los ci posese la pacetas ia es videda como avente potias santa donada a los par la spiritos, e donce los ia es videda como xefes de la clan e tribu. En edas istorial, la pacetas de medisin pote es comprada, con la conose de la rituos e diretos asosiada con los, alora eritada par sua desendentes.

Enfantes ia es nomida des dias pos sua nase en un rituo cual lia ofisial la enfante con sua familia e clan. Fias ia es instruida en capasias de casa, spesial cultiva e prosede de mais e otra plantas, la tana de cuoro de peles, la prepara de carne, cose e brode, e como on construi e manteni un casa. Fios ia es instruida en xasa e pexa. La fios comensa juna per esperia vides relijiosa a la eda de 10 o 11. Sposi entre la mandanes ia es jeneral ordinada par membros de clan de la person, spesial la tios; ma a veses la jenitores de la duple. Divorsa ia pote es fasil otenida.

Con la mori de un membro de un familia, la padre e sua popla ia erije un scafal prosima a la vila per conteni la corpo. La corpo ia es poneda con sua testa a la norde-ueste e pedes a la sude-este. Sude-este es la dirije a la vale de la Rio Ohio, de do la mandan ia veni orijinal. La mandan no ia reposa en esta dirije car lo invita moria. Pos un rituo per envia la spirito a via, la familia ia lamenta a la scafal per cuatro dias. Pos cuando la corpo ia putri e la scafal ia colasa, la osos ia es colieda e enterada, estra la cranio, cual ia es poneda en un sirculo prosima a la vila. Membros de la familia ia visita la cranios a veses e parla con los, discute sua problemes, o diverti la mor con bromas. Pos cuando la mandan ia move a la reserva a Fort Berthold, los ia comensa pone la corpos en caxas o envelopa los en robas de pelo, e pone los en fesures rocosa.

La economia

Comedas mandan ia veni de cultiva, xasa, la colie de plantas savaje, e comersia. Mais ia es la recolie xef, e parte de la suprapasada ia es intercambiada con tribus nomada per carne de bison. Jardines mandan ia es comun locada prosima a rivas, do deluvias anial resta la solo la plu fertil, a veses en locas milias de vilas. Femes ia posese e manteni la jardines, do los planta alga varias de mais, favas, e zucas. Eliantos ia es plantada prima en april temprana. Tan temprana como la sentenio 15, la vila mandan Huff ia ave escavas sufisinte per conteni 254,500 cilogrames de mais.

La xasa de la bison ia es un parte importante de survive e rituos mandan. Los ia clama a la bison per "veni a la vila" en la dansa de la bisones a la comensa de cada estate. En ajunta a come la carne, la mandan ia usa tota partes de la bison, afin no cosa ia es perida. "Bison flotante", cual ia cade acaso o xasada a en la rio, ia es videda como un deleta, e la carne ia es comeda cuando dui putrida. La peles ia es usada per la robas de pelo o ia es tanada, e la cuoro usada per vestes, sacos, etc. La mandan ia es conoseda per sua peles pintida cual comun ia es arcivos de avenis istorial. La osos ia es taliada per produi agos e oncas. Osos ia es ance usada per cultiva. Per esemplo, la scapula ia es usada como un util simil a un zada per rompe la tera. La mandan ia trapa ance animales peti per comedas e xasa servos. La cornos de servos ia es usada per fabrica utiles como rastos. Avias ia es xasada per carne e plumas, e la mandanes come ance pexes.

La mandan e sua visinas la hidatsa ia es sentros importante de comersia a la planos norde. Los intercambia a veses a distantias grande de sua vilas, ma plu comun popla nomada ia viaja a la vilas mandan per intercambia. William Clark, en la inverno de 1804, ia recorda la ariva de miles de asiniboines, cris, e xeienes per comersia. La mandan ia intercambia mais per carne de bison. Los ance intercambia cavalos con la asiniboine per fusiles, muni, e produidas european. Clark ia nota ce la mandan ia oteni cavalos e tendas de cuoro de la poplas de la ueste e sude-ueste como la cros, xeienes, ciouas, e arapahos.

Vestes

Asta la sentenio 19 tarda, cuando la popla mandan ia comensa adota vestes de la stilo "ueste" (pd european), los ia porta normal vestes fabricada de la peles de bisones, e ance de servos e oveas. De la peles, los fabrica tunicas, camisas, robas de la pelos de bison, mocasines, gantos, covresesos, e covregamas. Estas ia es comun ornada con spinas e plumas de avias, e omes a veses ia porta la scalpos de sua enemis.

La femes ia porta robas cual ateni sua talos, fabricada de la pel de servos o oveas. Esta ia es tipal ensircada a la taie con un sintur larga. A veses, la orlo de la roba ia es ornada con pesos de la ungulas de la bison. Su la roba, los ia porta covregamas de cuoro con mocasines cual covre la talo. Femes ia pone sua capeles reta a su en trensas.

En la menses de inverno, omes ia porta tipal tunicas de pel de servos e covregamas con mocasines. Cuando fria, los porta un roba de pelo de bison. En la menses de estate, los porta comun sola un covreseso de pel de servos o oveas. No como la femes, la omes ia porta ornas en sua capeles. La capeles ia es separada traversante la alta con tre partes pendente a su a la fronte. A veses, sua capeles ia pende a la nas, e alora risida a supra con un basteta per risi. La capeles ia pende a la spalas a la lados, e la parte dorsal ia estende a la taie. La capeles a la dorso ia crea un coda, colieda en un trensa e frotada con arjila e goma de pisea, e liada con cordas de pel de servos. Xapos ornosa de plumas ia es comun portada. En ajunta de peles de bisones, servos, e alces, la mandanes usa ance peles de ermino e mustela blanca per vestes.

Oji, la popla mandan porta vestes inspirada par sua vestes e ornas tradisional a rituos, powwows e otra avenis sinifiante. Estra estas, los tipal porta vestes moderna de la ueste.

Relijio

La relijio de la mandanes ia es complicada, e sentri sirca un person nomida la Om Solitar. Om Solitar ia es envolveda en multe de la mitos de crea e en un de la mitos de deluvias.

En sua mito de crea, la mundo ia es creada par du dios oposante, la Creor Prima e la Om Solitar. La Rio Missouri ia divide la du mundos cual la dios ia crea. La Creor Prima ia crea la paises a la sude de la rio, con colinas, vales, arbores, bisones, antelopes, e serpentes. A la norde de la rio, Om Solitar ia crea la Planos Grande, animales domada, avias, pex, e umanas. La umanas prima ia abita sutera prosima a un lago grande. Alga de la umanas plu aventurante ia asende un uvo a la surfas e ia descovre la du mundos. Los comparti sua trovas e ia deside reveni con multe otras. En cuando los ia asende, la uva rompe, e dui de la mandanes ia resta sutera

Seguente la credes de la mandanes, cada person posese cuatro spiritos nonmortal diferente. La spirito prima ia es blanca e frecuente videda como un stela volante. La spirito du ia es colorida con brun pal, e ia es videda como un sturnela. La spirito tre, nomida la spirito de casa, resta a la loca de la vila pos sua mori e va resta ala per sempre. La spirito cuatro ia es negra, e pos mori va viaja a via de la vila; estas esiste como popla vivente esiste, abitante sua propre vilas, cultivante e xasante.

La rituo de Ocipa ia es un parte major de la vive relijio de la mandanes. Esta rituo complicada ia relata a la crea de Tera ia es prima arcivida par George Catlin. Un om ta ofre per es la Fabricor de la Ocipa, e sponsor la preparas de comedas nesesada. Preparas prende la plu de la anio, car la rituo ia dura dias de avenis, cuando foles ia es ospitada.

La rituo ia comensa con la Dansa de Bisones, per clama a la bison a la popla. Lo ia es segueda par un varia de malesperias tra cual la gerores pote mostra sua coraje e gania la bondise de la spiritos. La ocipa ia comensa con la omes joven no come, bevi, o dormi per cuatro dias. Alora, los ia es conduida a un cabana, do los ia debe senta con fases rietante, en donce la pel de sua peto e spalas ia es taliada e lansietas de lenio ia es poneda pos la musculos. Con la lansietas liada a corda e suportante la peso de sua corpos, la gerores ia es pendeda de la teto de la casa asta cuando los ia desmaia. Per ajunta a la sufri, pesas o cranios de bisones ia es ajuntada a la gamas. Pos desmaia, la gerores ia es prendeda a su, e la otra omes (femes no ia es permeteda a esta rituo) ia atende los asta los velia, cual mostra la bonvole de la spiritos. Pos velia, la gerores ia ofre la dito peti de la mano sinistra a la Spirito Grande, e un om mascida ia corti lo con un axeta. Final, partisipantes ia tolera un curso sirca la vila asta cuando la cordas liada a la cranios de bisones ia lasera de sua peles.

Los ci pote fini la rituo ia es videda como onorada par la spiritos; los ci fini la rituo du veses ia gania fama sempre entre la tribu. Xef Mato-tope ( Four Bears ."cuatro ursos"), ia tolera la rituo du veses. La rituo final ia aveni en 1889, ma lo ia es reviveda en un forma alga diferente en 1983. Nota ce multe otra tribus de la Planos Grande ia selebra esta rituo en formas simil.

Oji

La mandan, hidatsa, e aricara, an si los ia intersposi, manteni la tradisiones variosa de sua asendentes. Los ia construi la Four Bears Casino ("casino de cuatro ursos") en 1993, atraente turistes e jenera revenu e emplea per la reserva povre.

La ajunta la plu resente a la area de New Town ia es la Four Bears Bridge ("ponte de cuatro ursos"), cual ia es construida en un coopera entre la tre tribus e la departe de transporta de Dakota Norde. La ponte, cual estende supra la Rio Missouri, repone la ponte plu vea de la mesma nom en 1955. Lo es la ponte la plu grande en Dakota Norde e es decorada con medaliones cual selebra la cultures de la tre tribus. La ponte ia es abrida en 2005.

Image gallery

"Un ofre de la mandanes", par Karl Bodmer
"Du omes mandan" par Karl Bodmer
"La dansa de la bisones" par Karl Bodmer
"Un vila mandan", par George Catlin
"Mato-tope (o cuatro ursos), un xef mandan", par Karl Bodmer
"Mih-Tutta-Hangjusch, un vila mandan", par Karl Bodmer
"La interna de la casa de un xef de la mandan", par Karl Bodmer
"La rituo de ocipa", como oservada par George Catlin
"Mändeh-Páhchu, un mandan joven" par Karl Bodmer
"Un festa en un casa mandan", par George Catlin
"Ischohä-Kakoschóchatä, un dansa mandan" par Karl Bodmer
"Ptihn-Tak-Ochatä, dansa de la femes mandan", par Karl Bodmer
"Xef mandan Mato-tope o cuatro ursos" par George Catlin
"Trenos con canes de la mandanes" par Kar Bodmer
"Idoles de la mandanes: par Karl Bodmer