Abri la menu xef
La colona vertebral, con nervos periferal en jala
La nervos asendente (blu) e desendente (roja) de la medula spinal
La stratos de la medula spinal

La medula spinal es un strutur longa, magra e tubal composada de texeda nervosa, cual estende de la medula longida en la radis de la serebro, a la area lombal de la colona vertebral. Lo enclui la canal sentral de la medula spinal, cual conteni la licuida serebrospinal. La serebro e la medula spinal composa la sistem de nervos sentral. En umanas, la medula spinal comensa a la oso servical, pasa tra la forame grande e entra la canal spinal a la comensa de la vertebras servical. Lo alora estende a su a entre la vertebras lumbal prima e du, do lo fini. La colona vertebral proteje la medula spinal, cual es plu corte ca la colona. Lo es sirca 45 cm en omes e 43 cm en femes. La diametre de la medula spinal es sirca 13 mm en la areas servical e lumbal, e 6.4 mm en la area toraxal.

La medula spinal funsiona xef per transmete siniales nerval de la cortex de move a la corpo e de la neurones de sensa a la cortex de sensa. Lo es ance la sentro per coordina multe reflexes e conteni arcos cual pote controla reflexes autonom. Lo es ance la loca de grupos de interneurones spinal cual composa la sircuitos neural nomida la "jenerantes de motifes sentral". Est sircuitos controla la instruis per move per moves ritmosa como pasea.

La medula es composada de 31 sesiones, cada con un duple de radises per nervos sensal e un duple de radise per nervos de move. La radises de esta nervos alora combina como duples biladal simetrial de nervos spinal. La sistem de nervos periferal es composada de esta radises spinal, nervos, e ganglios. La radises dorsal es faxos asendente, cual reseta inform sensal de la pel, musculos, e organos viseral per transmete a la serebro. La radises fini en la ganglios dorsal, cual es composada de la corpos selulal de la asones corespondente. La radises ventral es composada de la nervos desendente cual represente de neurones de move, de cual la corpos es locada en la cornos gris ventral de la medula spinal.

La medula spinal (e la serebro) es protejeda par tre stratos de texeda o membranas nomida meninjes cual ensirca la canal. La duramadre es la strato esterna e formi un covre dur e protejente. Entre la duramadre e la oso de la vertebras es un spasio nomida la spasio epidural. Esta spasio es plenida con texeda adipos e conteni un rede de dutos sangual. La madre aranial, la strato media de proteje, es nomida per sua apare como un rede aranial. La spasio entre la aranial e la piamadre es nomida la spasia suaranial. Esta spasio conteni licuida serebrospinal, cual pote es esaminada con un perfora lombal. La piamadre delicata, la strato interna, es streta asosiada con la surfas de la medula spinal. La medula spinal es stablida en la duramadre par la ligamentos denticulal, cual estende ladal de la piamadre entre la radises dorsal e ventral. La saco dural fini a la nivel de la vertebra sacral du.

En un talia traversal, la rejion periferal de la medula spinal conteni cursos de sustantia blanca conteininte asones de sensa e move. En esta rejion es la sustantia gris, cual conteni la corpos de neurones ordinada en tre colonas gris cual dona la forma de un papilio a a rejion. Esta rejion sentral ensirca la canal sentral, cual es un estende de la ventriculo cuatro e conteni licuida serebrospinal.