En psicolojia, memoria es la colie de prosedes par cual informa es codigida, retenida, e retraeda. La codigi es la move de informa de la mundo esterna a la neurones de la serebro. La reteni es la cambia de la relatas de la neurones per rejistra la informa per crea un arcivo. Final, la retrae es la trova de la informa rejistrada e la recrea de impresas en la consensia. En lingua comun, nos parla de memori (codigi e reteni), recorda e reconose (retrae), e ance oblida (la fali de reteni e retrae).

Teorias de memoria divide comun lo en tre partes: memoria sensoral, memoria de dura corta, e memoria de dura longa.

Memoria sensoral es la forma prima de memoria. Lo dura sola per sola 200–500 milisecondos. La du aspetas la plu rexercada es la memoria sensoral de vide ("memoria iconica") e la memoria sensoral de oia ("memoria ecoica").

Memoria de dura corta es la forma du. Se contenis dura tra minutos, ma lo es restrinjeda a sirca sinco informas. Teorias resente analise esta memoria en plu partes: La memoria de labora es la "loca" consensa en cual pensas aveni. Lo inclui un dirijor sentral, cual fa desides sur la informa, la lona de vide e spasio, en cual on pote "vide" se laboras, e la sircuito de fonolojia, en cual on pote revide informa lingual.

Memoria de dura longa es la forma final. Asi, informa dura tra multe anios, an si on no pote sempre retrae lo. Teorias moderna divide lo en alga partes con roles unica: la memoria de prosedes (pe: como on gida un auto), la memoria de episodios (pe: avenis en la tu vive), e la memoria semantica (pe: la sinifia de parolas).