Abri la menu xef
Strabia en un person con miastenia grave, atentante abri sua oios

Miastenia grave es un maladia neuromusculal de dura longa cual resulta en grados variosa de debilia de la musculos sceletal. La musculos la plu comun afetada es los de la oios, fas, e engoli. Lo pote resulta en diplopia, palpebra pendente, parla difisil, pasea difisil. Comensa pote es subita. Los afetada ave comun un timo grande o developa un timoma.

Miastenia grave es un maladia autoimune cual resulta de anticorpos cual bloca o destrui resetadores de asetilcolina nicotinica. a la junta entre la nervo e la musculo. Esta preveni impulsas de resulta en contratas musculal. Rara, un defeto jenetica en la junta neuromusculal restula en un disturba simil nomida miastenia conjenital. Bebes de madres con miastenia pote ave sintomes en sua menses prima de vive, nomida miastenia neonasal. Diagnose pote es suportada par un probas sangual per anticorpos spesifada, un proba edrofonio, o un proba de condui de nervos.

Miastenia grave es tratada jeneral con medisines nomida constrinjentes de asetilcolinesterase, como neostigmin e piridostigmin. Imunosupresantes, como prednison o azatioprin, pote ance es usada. La estrae sirurjial de la glande timo pote boni sintomes en alga casos. Plasmaferese e alta dosas de imunoglobulin intravenal pote es usada en atacas subita. Si la musculos de respira deveni sufisinte debil, venti mecanical pote es nesesada.

Miastenia grave afeta 50 a 200 per milion persones. Lo es diagnoseda prima en tre a 30 per milion persones cada anio. Diagnose deveni plu comun como la resulta de consensia creseda. Lo aveni la plu comun en femes su 40 anios e en omes supra 60 anios. Lo no es comun en enfantes. Con trata, la plu de los afetada pote ave vives alga normal e ave espeta de vive normal. La parola es de la elinica myo ("musculo") e asthenes ("debilia") e latina gravis ("grave")