Mircea Eliade
Mircea Eliade (9 marto 1907 - 22 april 1986) ia es un istoriste romanian de relijio, scrivor de libros de imajina, filosofiste, e profesor en la Universia de Chicago. El ia es un interpretor gidante de esperias relijial, ci ia institui modeles en studias relijial cual persiste asta oji.
Sua obra leteratural parteni a la jeneros fantasin e autobiografial. La plu conoseda es la novelas Maitreyi, Noaptea de Sânziene, Isabel și apele diavolului e Romanul Adolescentului Miop; la noveletas Domnișoara Christina e Tinerețe fără tinerețe e la naras corta Secretul doctorului Honigberger e La Țigănci.
Temprana en sua vive, Eliade ia es jornaliste e esajiste, un disiplo de la filosofiste e jornaliste romanian de destra estrema Nae Ionescu, e un membro de la sosia leteratural Criterion. En la desenio de 1940, el ia servi como ajente cultural en Rena Unida e Portugal. Veses diversa en la fini de la desenio de 1930, Eliade ia espresa publica su suporta de la Garda de Fero, un organiza faxiste e antiiudiste. Sua envolve political en acel tempo, como ance sua lias en destra estrema, ia es frecuente criticada pos la Gera Mundal Du.
Conoseda per sua eruditia enorme, el ia parla fluente sinco linguas (romanian, franses, deutx, italian e engles) e ia pote leje otra tre (ivri, farsi e sanscrito). El ia es elejeda membro pos mori de la Academia Romanian.