Mitolojia de la Paises Basa
La mitolojia de la paises basa, composada de la area aora conteninte Nederland, Beljia, Luxemburg, e partes de Deutxland prosima, ave sua radises en la mitolojia de cultures precristian, pd la mitolojia de la galos e germanicas, ante la cristiani de la rejion su la rena de la francos en la eda medieval temprana.
A la eda de la Impero Roman e en la eda medieval temprana, la abitantes de la paises basa inclui...
- Tribus germanica norde de la Rio Reno (con esetas como la eburones e la nervi)
- La plu tribus celta e galo-roman como la belgas sude de la Rio Reno (ance con alga esetas)
La mitolojia de nederlandes vea pote sinifia la mitos narada en la lingua nederlandes vea spesifada, ma multe de esta mitos es plu antica e un parte de la moves grande de poplas, como la sperde de la mitolojia roman par la Impero Roman, e la mitolojia de germanica continental.
La tradisiones precristian de la adora de arbores, spesial de la cuerco, fontes, e bosces nativa a la paises basa ia survive en un desembla cristian a la eda medieval.
La fontes per la reconstrui de tradisiones precristian inclui la reportas de la misionores anglosason a la rejion, folclor e lejendas medieval e moderna, e la toponimes local.
Dios e divas edita
De la mitolojia antica de la rejion, la plu de nomes de dios e divas antica veni de la folclor de la tribus local, spesial en la norde. Multe de la divines es la mesma como la divines de germanica este, como Donar (Tor), la dio de tona e Wodan (Odin) la dio de gera e xef de la xasa savaje. La xasa ia es renarada con Wodan desemblante: Gait, Derk, Henske, e la cavalo briliante.
En Nederlandes, la dias de la semana es nomida per la dios germanica, un costum derivada de la pratica paralel roman, con la dios elejeda per sua similia a la dios roman.
- maandag, nomida per Mani, pd la dia de Luna
- dinsdag, nomida per Tir, pd la dia de Marte
- woensdag nomida per Wodan, pd la dia de Mercurio
- donderdag nomida per Donar, pd la dia de Jove
- vrijdag nomida per Frea, pd la dia de Venus
- zaterdag nomida per la dio roman Saturno
- zondag nomida per la Sol
Otra dios antica es druidal, celta, o galoroman, spesial en la sude e tra flandre: Erecura, via de la tera; Gontia de Ghent (Beljia), un diva local; Rosmerta, diva de fertilia; e la divines notada par San Eligio en Flandre (Jove, Netuno, Orco, Diana, e Minerva).
Final, alga divines ia es rejional o spesial per un clan o tribu: Arduinna, la diva celta de la foresta Ardennes; Nehalennia, diva de viajores en Zeeland, do plu ca 160 ofres de petra con sua imaje, locada en la mar; Vagdavercustis, un diva antica de la Batavianes notada sur un altar prosima a Coln; Tanfana, un otra diva misteriosa, notada en la sentenio prima ec.
Otra esentes: La witte wieven o wittewijven en dialetos nederlandes, sinifia "femes blanca". Los ia es la spiritos de femes ci ia mori de creve de cor pos sua omes ia es nonfidosa a los. Los ta vive en la nebleta e apare en la note. Los ta ataca omes ci ia es nonfidosa a sua femes par causa ce los deveni desorientada en la nebla.
Spiritos de natur: Estas pote es orijinal dios o esentes supranatural en mitolojia e es plu tarda reformida como spiritos de natur en la eda medieval. La nederlandeses, como otra popla germanica, crede en elfos (la parola nederlandes ia es elfen, elven, o alven). La virjines de mos, ci apare en folclor nederlandes vea e germanica sude, ia es spiritos de arbores, o elfos de la bosce, frecuente xasada en la varia nederlandes de la xasa savaje. La kabouter ia es la nom nederlandes per la kobold (nano) germanica, un spirito de casa e de la tera ci tipal abitada sutera.
Eroes mitolojial edita
La eroes epic prima, res e xefes de la paises basas, considerada como mitolojial, pd supranatural e fundal, inclui estas:
- Tuisto (Tuisco) - la asendente de tota tribus germanica
- Mannus - la asendente de alga tribus germanica, fio de Tuisto
- Ing (Ingwaz, Yngvi) - fundor de la tribu de Ingaevones tribu, fio de Mannus.
- Istaev - fundi de la tribu de Istvaeones, fio de Mannus.
- Redbad - re de la frisces
- Folcwald - eroe de la tribus frisce
- Finn - eroe de la tribus frisce, xef de la frisces, fio de Folcwald
- Merovech - fundor semilejendal de la dinastia Merovingian
Ojetos mitolojial edita
Ojetos videda como majial o santa en la paises basa (de la sentenio 7) inclui: cuercos, fontes, bosces, ci es crededa como avente potias santa e medisinal.
Pupas de palia (en latina, vetulas - femes vea) ia es crededa como conteni la spirito de la gran en rituos de colie. Joalas majiosa e fetixes ia es portada sur la testo o la brasos per proteje e adora de la dios e divas.
Axas raspada neolitica ia es colieda, crededa como la resulta de la lampo de Donar. Cultivores ia pende esta axas en sua casa per proteje contra colpas de lampo, seguente la crede comun ce lampo no colpa la mesma loca du veses.
Reportas par misionores edita
Pos la influe de la misionores cristian, la mitolojias orijinal ia es debilida en potia e per la plu parte mutada a folclor e lejendas, comun fada diminuida. La femes blanca, per esemplo, deveni fantasmas ci infesta locas santa. Ma credes e praticas santa ia continua, comun asorbeda en cristiania. Per esemplo, la poesia de la sentenio 12 nomida Karel ende Elegast (Carlo la grande e la elfo visitante) un elfo es descriveda como un eroe ci amini la re cristian Carlo en la foresta.
La bispo de Utrecht Bispo Arnold 2 (1372-1375) ia nota ce la popla flames crede ancora en la porta de joalas majial e fetixes sur sua testos o brasos, a veses fabricada de libros santa. En la depinta par Hieronymous Bosch, "La cura de folia" (1475-1480), la fem ci ecuilibra un libro sur sua testa es suposada como un satira de la popla ci pratica ancora esta abitua.
La biografias de la misionores cristian a Nederland, parlante contra credes precristian, es par coaveni recontas la plu temprana de la mitos de la rejion. La testos de la sentenio 7 e 8 recorda detalias de la mitos e cultur nativa, an si la misionores mostra enemia a los como credes pagan. La misionores xef de Nederlan ia es Willibrord, Bonifatio, e San Eligio.
Willibrord (658-739), la Bispo de Utrecht, veni a Nederland en 690 e ia es la prima misionor anglosason predicante cristiania ala. La francos cristian ia reocupa apena la teritorio de la tribus frisce. Sua biografia nota ce el vade a un isola Fositesland (posible Helgoland, ocupada par frisces) entre Frisia e Danmarc. Willibrord trova ce lo ia ave santerias dedicada a la dios scandinavian Fosite, fio de Balder e Nanna. El trova ce la tera ia es estrema santa a la popla nativa. Un fonte santa esiste, e la popla bevida sua acua pur sola silente. Willibrord mata la boves santa ala, e batizada tre persones en la fonte en alga dias de ariva.
El vade a otra misiones a Nederland continental, do el ia vide ce la popla ia adora abridas en la bosces, fontes, e posos. Willibrord ia atenta vacui sua santerias e marcas de tera. El ia construi un eglesa sur un abrida en la foresta santa, ia destrui un foresta santa en Heiloo, e renomida la multe posos pagan como posos cristian, comun con sua propre nom.
En 714, la re frisce Radboud ia forsa Willibrord e sua pretes de la area. Willibrord ia reveni sirca 719 pos la soldatos franco ia prende controla de la area e la re Radboud ia mori. Pos esta, el continua destrui santerias precristian.
Bonifatio (672-753) ia es la misionor seguente entre la frisces e la sasones. El ia ariva en 716 en Dorestad (aora Wijk bij Duurstede). Cuando el ia ariva, el trova ce la frisces ia reconstruida sua santerias pagan, pos Willibrord ia es espulsada. Re Radboud ia permete ce Bonifatio sperde cristiania, ma el trova ce la nativas ia ave un panteon de dios e divas, e no ia es tan impresada par cristiania. El ia departe la anio seguente.
La videtas la plu bon de la praticas de la druidas en a rejion de Flandre es en la bibliografia de San Eligio (588-660), scriveda par San Ouen. Ouen ia colie la reproxas familial de Eligio a la popla de Flandre, en cual el denunsia la "costumes pagan", spesial a multe dios roman e la credes e ojetos druidal.
Procopio en la desenio de 540 ec, reporta un crede e/o un rituo funeral oservada a la bocas de la Rio Reno cual conserna la pasa de la mor a la isola de Brittia (Britan).
Folclor edita
En 1918, William Elliot Griffis ia rejistra e tradui la naras de folclor nederlandes, e publica los en la libro Dutch Fairy Tales for Young Folks ("Naras de fes nederlandes per persones joven"). Entre los. la lejenda de la sapato de lenio comensa clar con fratos de mitos druidal en Nederland antica, renarada per enfantes:
En anios pasada, tro multe ca un almanaco pote raconta, o orolojos pote mesura, miliones de fes bon ia veni a su de la sol e vade a la tera. Ala, los ia muta se a radises e folias, e deveni arbores. On ave multe tipos de estas, car los ia covre la tera, ma la pino e la betul, la fresno e la cuerco, ia es la xefes de Holland. La fes ci ia vive en la arbores ia ave la nom de virjines de mos, o la "Trintjes" de la arbores, de la nometa nederlandes per Catia o Caterina...."
La nara resoma la credes tradisional: Wodan (asi la dio de la sol) es la nom nederlandes per Odin en Holland, e la nom de Holland es de la espresa Holt Land, cual sinifia "pais de multe arbores". La nara dise ce la pais ia es en la pasada covreda con forestas e ce la popla ia abita en la arbores per mil anios, asta los deveni popla cultivante. Vera, la arbores ia manteni la tera firma, car en otra casos, lo ta fonde o desapare su la acua de la deluvias. Eyck (oji eik) es un parola antica per cuerco, oji un nom familial comun. Como elfos, la virjines de mos o fes de arbores pote comunica la promete de la arbores a umanas per "sta inversada" per la popla. La cuercos spesial ia es la arbor cual pote dona vive e remedia maladias e ia ave multe usas mital.
Su sua ramos, prosima a la tronco, la popla reposa sua maladas, esperante per aida de la dios. Su la ramos de la cuerco... sposas liada sua manos sirca sua perimetre, esperante per enfantes bela. A supra entre sua ramos foliosa, bebes nova reposa, ante ce los ia es trovada en la cuna par otra enfantes. Per serti ce un enfante ta crese per es forte e sana, madres ia trae los tra un arbor joven fendeda. An plu potiosa, como un medisin per la pais se mesma, la cuerco ia ave la potia per sani. La tereno nova ia a veses sufri la maladia nomida la va ("cade"). Cuando malada de la val, la tera colasa. Alora persones, casas, eglesas, granerias, e boves ia cade a su, no plu vidable, e ia es eterna perdeda, en un inonda de acua.
En esta lejenda, la nanos e la elfos ia mostra umanas como inversa la arbores como palos e forsa los en la tera e tal fa ce la tera es firma per construi. Plu tarda, los instrui los como fabrica zocos (sapatos de lenio). Nota ce, istorial, la pais nederlandes ia es basa e tende a deluvias, cual destrui vilas intera. E la deluvias ia es plu sever cuando la forestas ia es cortida per abri areas per cultiva e eleva bestias.
Monumentos edita
Un altar de petra antica de sirca la sentenio 2 ce, trovada a Coln, Deutxland, es dedicada a la diva Vagdavercustis. El ia es probable un diva nativa, germanica o celta, ci ia es liada con arbores o bosces. On ave alga evidentes ce Vagdavercustis ia es adorada par la Batavianes entre Nederland e Coln moderna.
Un otra altar de petra ia es trovada en Ubbergen, sura la Hengstberg. Lo ave esta enscrive: Mercurius Friausius. Mercurius es latina per la dio roman Mercurio, la corespondente a Woden. Friausius pote refere a sua sposa Frigg.
La locas aora inondada de Domburg e Colijnsplaat, a la estuarios de Scheldte este, on ave la restas de templos, cada dedicada a la diva Nehalennia. Plu ca 160 petras enscriveda con sua imaje ia es recovreda a esta locas, e alga enscrives en latina grasia el per viajas secur sur la mares.
En Empel, on ave la restas de un templo dedicada a Hercules Magusanus. Esta ia es la nom latina per la dio suprema de la Batavianes, Donar. Ofres e armas rompeda es trovada ala.
Locas edita
Multe lejendas rejional esiste en la paises basa sur la orijinas de locas natural como colinas, lagos e mares, fontes e posos, forestas e bosces, cual atribui crea a la dios antica. Otra lejendas dise do la femes blanca variosa ia vive como spiritos en la eda medieval, cual es probable renaras de naras de locas santa. Multe esemplos ia es colieda en la libro Veluwsche sagen par Gustaaf van de Wall Perne (1877-1911). Esta libro ia es un colie rexercada istorial de la "sagas" nederlandes de la lejendas e almanacos de folclor en la provinse de Gelderland.
La crea de la lagos Uddeler e Bleeke: Esta mito conserna un batalia cual aveni suposada entre Donar, la dio de tona, e la jigantes de inverno e la midgaardslang (la serpente jigante) ci ia alia contra Donar. La jigantes ia lansa graniza a su, en cuando la serpente ia asende un cuerco alta e sputa venena a la aira. Donar ia ataca, vadente tra la aira sur sua vagon traeda par capras, e la sielo ia arde e tera ia trema de sua martel de tona cual era nunca. Donar colpa la serpente sur sua testo con tan fortia ce no sola es la monstro craseda, ma la martel potiosa ia vade sete miles profonda en la tera. La serpente ia mori, ma en la ataca, la venena ia negri e stona Donar. Donar ia cade con sua capras e vagon sur la Donderberg ("colina de Donar") en Dieren. Alora la tera ia afonda en la mar, e la dio de la mar ia sona sua corno e un barcon negra ia veni per colie la corpo de Donar. Cuando la inonda retrosede, du lagos ia marca la locas cual es "tan profonda de la mundo, la Uddelermeer ("lago de Uddel") e la Godenmeer ("lago de dio")... Plu tarda, la lejenda continua con la martel de Donar veni a la surfas de la profondia. La entera de la Midgaardslang ia deveni covreda con la foresta prosima, asta en 1222 un flama briliante ia lansa de la lago e la spirito de la serpente serpeda a supra e fuji norde. La foresta ia es ardeda e un stepe prosima la lago resta do ia foresta ia esiste.
Perne nota ce Donar ia es adorada a la Godenmeer (lago de la dios), ma la traduor pensa ce la nom de la lago pote es un varia cristian de Wodenmeer, pd un lago orijinal dedicada a Wodan.
Multe otra locas en Nederland ave sinifias de mitolojia antica:
- Donderbergen - "colinas de Donar", en Dieren
- Elst - de la parola heliste, cual sinifia santeria
- Godenmeer - "lago de dio" o "lago de Woden"
- Godsberg/Godensbergen - "colina/s de dio", dedicada a Wodan, en Hattem e Ruurlo
- Helsbergen - "colinas de Hel", en Rheden
- Heilige Berg - "colina santa, en Roekel
- Hemelse bergen - "colinas de sielo", dedicada a Heimdall, en Arnhem, Nunspeet, Oosterbeek
- Hennendal - "vale de la mor", prosima Hummelo
- Manebergen - "colinas de luna", un loca santa de la luna
- Materberg - "colina de la diva madre"
- Paasbergen - "colinas de pascua", orijinal dedicada a primavera, Ostara, a Arnhem, Ede, Ermelo, Lochem, Lunteren, Terbog e Wisch, Oldenzaal e Losser
- Nijmegen - derivada de Novio Magusanus, de la nom roman per Donar; Nijmegen ia es la cor de la culto batavian de Donar, con du templos dedicada a el
- Poppestien - "petra de enfantes", un petra credita con produi enfantes, en Bergum
- Willibrordsdobbe - la nom natural de un poso natural sur la isola, nomida per Willibrord, ma videda par popla loca como un poso santa, renomida par Willibrord
- Wittewievenbult - "colina de la femes blanca"; lejenda local dise ce los apare a la note ante Natal cada anio, e dansa sur esta colina, prosima a Eefde
- Wittewijvenkuil - "caveta de femes blanca", entre du colias do lejenda local dise ce tre femes blanca abita, prosima a Barchem
- Wodansbergen - "colinas de Wodan"
- Woensdrecht - un vila nomida per Wodan.
- Woensel - "la salon de Woden", un vila aora un distrito de la site de Eindhoven
- Woezik - "cuerco de Wodan, en Wolfheze
- Wrangebult - "colina de la sepe spinosa"; un "wrange" ia es un sepe de spinas trensada per usa sirca un loca santa, en Hummelo
- Zonnebergen - "colinas de la sol", un loca per sacrifias per la sol, en Gorssel, Oosterbeek, Vorden, Wageningen
Bibliografia edita
- Griffis, William Elliot. Dutch Fairy Tales For Young Folks. New York: Thomas Y. Crowell Co., © 1918. (English). Disponable de SurLaLane Fairy Tales.
- McNamara, Jo Ann, translator. Vita Eligii (The Life of St. Eligius), en engles. Disponable de la Northvegr Foundation, © 2005.
- Van De Wall Perné, Gustaaf Frederik. Veluwsche Sagen: Eerste Bundel. Amsterdam: Scheltens & Giltay, © 1932. Disponable de la Digitale Bibliotheek Voor De Nederlandse Letteren.
- Van De Wall Perné, Gustaaf Frederik. Veluwsche Sagen: Tweede Bundel. 4th ed. Amsterdam: Scheltens & Giltay, © 1930. Disponable de la Digitale Bibliotheek Voor De Nederlandse Letteren.