La mitolojia de Er precristian ia es conservada en un tradision parlada multe conservante. Con la ariva de cristiania, la manoscritos prima ia es scriveda en Er, conservante multe de esta naras en la leteratur de Er medieval. An ce la influe de cristiania pote es videda en esta manoscritos, esta leteratur representa la mitolojia la plu vasta e plu bon conservada de tota ramos de mitolojia celta. An si multe manoscritos no ia survive e multe plu naras no ia es scriveda, on ave sufisinte restante per capasi la identifia de sicles distinguida ma supraponeda: la sicle mitolojial, la sicle de Ulster, la sicle de Fionn, e la sicle istorial. On ave ance alga testos mitolojial esistente cual no cabe en cualce sicle, e multe naras de folclor cual ia continua como un tradision parlante cual, an si no vera mitolojial, inclui carateres de un o plu de esta cuatro sicles.

Er, sirca 1014

Oji, alga de la naras la plu bon conoseda es de Tir na nOg, Fionn MacCumhaill, Na Fianna, la Aes Sidhe, CuChulainn, la Tuatha De Danann, la Fies de Lir, Tain Bo Cuailnge, e la Salmon de Sabe.

Nota: Esta es un tradui en elefen de la article en la wikipedia engles.

Divinia en mitolojia eres edita

Dependente de la fonte, la importa de dios e divas en mitolojia eres varia. La naras jeografial, Dindshenchas, asentua la importa de la divas e asendentes potiosa, en cuando la tradision istorial foca sur la colonistes, inventores, o geror mas, con carateres fema sola interveninte en episodios.

Divas edita

La divas es frecuente videda como la asendentes la plu vea de la popla en la rejion o nasion. Los es carateres madral ci cura per la tera se mesma en ajunta a sua desendentes, ma ance defendores ferosa, instruores, e gerores. Divas plu personida pote es liada a cualias cultural, pe Brigid ia es relatada a poesia, forja, e sani. Alga divas asosiada con la druidas es predisente, spesial cuando predise mori e ruina. Animali es un parte importante de multe divas eres. Badb Catha, per esemplo, es "la corvon de batalia" e en la Tain Bo Cuailnge, la Morrigan muta se como un angila, un lupo, e un bove.

La divas celta no es divideda par cualia singular, como "diva de ama", etc, ma es plu simil a umanas completa, ci ave areas de interesa o capasias spesial. En esta modo, los no coresponde direta a otra panteones como los de la elinicas o romanes.

La madre de la Tuatha De Danaan es jeneral considerada como Anu o Danu.

Alga divas es asosiada con locas santa do festas saisonal aveni. Los inclui Macha de Eamhain Mhacha, Carman, e Tailtiu, entre otras.

Divas de gera es comun representada como truples, e es liada a autonomia e animales santa. La animales pote es asosiada con preda, como lupos e corvones, o con la abunda de la tera, como boves. Los garda la campos de batalia e los ci luta, e seguente la naras en la Tain Bo Cuailnge, alga de esta divas pote es inisiantes e dirijores de un gera intera. La divas major de batalia es la Morrigan, Macha, e Badb. Otra femes de gera es videda en la rol de instrui gerores en la grupos de Fianna, como Liath Luachra, un de la femes ci ia instrui la eroe Fionn mac Cumhaill.

Dios edita

La dios eres es divideda entre cuatro grupos major. Grupo un inclui la dios plu vea de Galia e Britan. La grupo du es la foca de multe de la mitolojia e inclui la dios eres nativa con sua casas en la tumulos de entera. La grupo tre es la dios de la mar, e grupo cuatro inclui la naras de "la otra mundo". La dios cual apare la plu frecuente es Dagda e Lug. Alga studiantes sujesta ce la naras de esta dios alinia con naras e dios elinica.

Eroes edita

Eroes en la mitolojia eres pote es trovada en du grupos distinguida. On ave la eroe legal ci esistes en la bordas de la comunia, protejente sua popla de stranjeres. En la tuath o grupo familial, la eroes es umana e no dios.

La grupos de gerores Fianna es videda como stranjeres, liada con la foresta savaje, jovenia, e states a la borda de la otra mundo. Los es gerores esterna ci proteje la comunia de otra esternas. An si los pote inverni en un comunia stable, los spende sua estates vivente savaje, instrui jovenes, e furni un rol per veteranes ferida par gera. Los vive su la autoria de sua propre xefes, o pote es alga anarciste, e pote segue otra dios o spiritos ca la comunias stable.

La sicle mitolojial edita

 
La lansa majiosa de Lugh

La sicle mitolojial, composada de naras de dios e la orijinas de la eres, es la sicle la min bon conservada de la cuatro sicles. Lo es sur la popla xef ci ia invade e abita la isola. La popla inclui Cessair e sua seguores, la Formorianes, la Partholinianes, la Nemedianes, la Firbolges, la Tuatha De Danann, e la Milesianes. Lo inclui la Dindeshenchas metral ("naras de locas"), la Lebor Gabala Erenn ("libro de invades"), "La sonia de Aengus", "La cortea de Etain", la Cath Maige Tuireadh ("la batalia du de Magh Tuireadh"), e la Oidheadh Clainne Lir ("la trajedia de la fies de Lir").  Lebor Gabala Erenn es un pseudoistoria de Er, trasante la asendentes de la eres a la eda ante Noah. Lo nara de un serie de invades o "prendes" de Er par un segue de popla, la popla sinco de los conoseda como la Tuatha De Danann ("popla de la diva Danu"), ci ia es crededa como abitante la isola ante la ariva de la milesianes (eres celta). Los fasa la oposa par sua enemis, la Fomorianes, con sua xef Balor de la mal oio. Balor ia es ultima matada par Lug Lamfada (Lug de la braso longa) a la batalia du de Magh Tuireadh. Con la ariva de la milesianes, la Tuatha De Danann ia retira sutera e deveni la popla fein de mitos e lejendas plu tarde.

La Dindshenchas metrical es la obra grande de la istoria de nomes propre de Er temprana, donante la lejendas de nomi de loca sinifiante en un segue de poesias. Lo inclui multe informa importante sur la carateres e naras de la sicle mitolojial, incluinte la Batalia de Tailtiu, en cual la Tuatha De Danann ia es defetada par la Milesianes.

Lo es importante ce, par la Eda Medieval, la Tuatha De Danann no ia es videda como dios, ma un popla de sorsores e mutaformas de un eda de oro temprana de Er. Testos como Lebor Gabala Erenn e Cath Maige Tuireadh presenta los como res e eroes de la pasada distante, completa con naras de sua mori. Ma lo es clar de otra testos ce, a un ves, los ia es divines.

An pos los ia es reponeda como renores de Er, carateres como Lug, la Morrigan, Aengus, e Manannan Mac Lir apare en naras cual aveni multe sentenios plu tarde, cual tradi sua nonmortalia. Un poesia en la Libro de Leinster lista multe de la Tuatha De, ma fini "an se (la autor) lista los, el no adora los". Goibniu, Creidhne, e Luchta es refereda como la Tri De Dana ("tre dios de artisania"), e ce la nom de Dagda es interpretada en testos medieval como "la bon dio". Nuada es conaseda con la dio brites Nodens; Lug es un refleta de la dio pancelta Lugus, cual posible sinifia "lus"; Tuireann pote es relatada a Taranis de Galia; Ogma a Ogmios; la Badb a Catubodua.

La sicle de Ulster edita

 
Cuchulainn porta Ferdiad tra la rio

La sicle de Ulster es locada tradisional sirca la sentenio prima ce, e la plu de la lo aveni en la provinses de Ulster e Connacht. Lo es composada de un grupo de naras eroin tratante la vives de Conchobar mac Nessa, re de Ulster, la eroe Cu Chulainn, ci ia es la fio de Lug, e sua amis, amores, e enemis. Estas es la Ulaid, popla de la canto norde-este de Er, e la naras sentri sirca la corte real a Emain Macha, prosima a la vila moderne de Armagh. La Ulaid ave lias prosima con la colonia eres en Scotland, e parte de la instrui de Cu Chulainn aveni en acel colonia.

La sicle es composada de naras de la nases, jovenia e instrui, corteas, batalias, festas, e moris de la eroes, e refleta un sosia de gerores en cual gera es composada xef de combate singular, e ricia es mesurada xef en boves. Esta naras es scriveda xef en prosa. La peso sentral de la sicle es la Tain Bo Cualnge. Otra naras importante inclui La mor trajedial de la sola fio de Aife, e "La destrui de la otel de Da Derga". "La esclui de la fios de Usnach" (ance conoseda como la trajedia de Deirdre, e la fonte de presentas teatral par John Millington Synge, William Butler Yeats, e Vincent Woods) es ance un parte de esta sicle.

Esta sicle es, en alga respetas, prosima a la sicle mitolojial. Alga de la carateres de lo reapare asi, e la mesma tipo de majia de mutaformi es evidente, lado a lado con un realisme sombre, an calosa. En cuando nos pote suspeta ce alga carateres, como Medb o Cu Roi, ia es divines en la pasada, e Cu Chulainn mostrante capasias supraumana, la carateres es mortal e asosiada con tempos e locas spesifada. Si la sicle mitolojial representa la eda de oro, la sicle de Ulster es la eda de eroes de Er.

La sicle Fenian edita

 
Fionn veni per aida la Fianna

Como la sicle de Ulster, la sicle Fenian, ance nomida la "sicle Ossian", conserna la atas de la eroes eres. La nara pare aveni sirca la sentenio 3, e xef en la provinses de Leinster e Munster. Los difere de otra sicles en la fortia de sua lias con la comunia gailica en Scotland, e on ave multe testos Fenian esistente de acel pais. Los ance difere de la sicle Ulster car la naras es xef presentada en poesia, e ce sua tono es plu prosima a la tradision de romanica ca la tradision de epica. La naras conserna la ativia de Fionn mac Cumhaill e sua grupo de soldatos, la Fianna.

La sicle ave un fonte la plu importante - la Acallam na Senorach ("la conversa de la omes vea"), cual es trovada en du manoscritos de la sentenio 15. Par analise linguistica, la testo ia es orijinal de la sentenio 12. La testo reporta la conversas entre Cailte mac Ronain e Oisin, la membros final survivente de la Fianna, e San Patricio, e es composada de sirca 8000 linias.

La Fianna de la nara es divideda entre la Clann Baiscne, con Fionn mac Cumhaill como xef, e la Clann Morna, con sua enemi Goll mac Morna como xef. Goll ia mata la padre de Fionn, Cumhal, en un batalia, e la fio Fionn ia es elevada en secretia. Cuando joven e el ia es instruida en poesia, el arde acaso sua diton en cocente la "Salmon de Sabe", cual ia permete ce el suca o morde sua diton per reseta soflones de sabe enorme. El ia prende usa rol como la xef de sua grupo e on ave multe naras de sua aventuras. Du de la naras eres la plu bon, Toraigheacht Dhiarmada agus Ghrainne ("la xasa de Diarmuid e Grainne") e Oisin en ''Tir naOg'' forma parte de la sicle. La nara de Diarmuid e Grainne, cual es un de la poca naras Fenian prosin, es la fonte probable de "Tristan e Iseult".

La mundo de la sicle Fenian es un en cual gerores profesal spende sua tempo xasante, combatente, e aventurante en la mundo de spiritos. Entrantes nova a la grupo ia es espetada como conoseda de poesia e capas de dura tra alga esperias fisical. La plu de la poesias es atribuida a Oisin. Esta sicle crea un ponte entre la edas precristian e cristian.

La sicle istorial edita

 
Brian Boru

Lo ia es parte de la debe de la poesistes eres de la eda medieval per rejistra la istoria de la familia e jenealojia de la re ce los servi. Los fa esta en poesias cual fusa la mitolojial e la istorial a un grado o un otra. La naras resultante forma lo cual es aora conoseda como la sicle istorial, o la sicles de la res - "sicles" car on ave un cuantia de grupos autonom.

La sicle inclui cadun de la mitolojial Labraid Loingsech, ci deveni suposada la re alta de Er sirca 431 aec, a la tota istorial Brian Boru. Ma la nara la plu famosa es la Buile Shuibhne (la panica de Suine), un nara de la sentenio 12 en prosa e poesia. Suibhne, re de Dal nAraidi, ia es maldiseda par San Ronan e deveni un tipo de dui om e dui avia, condenada per vive en la boscas, fujinte de sua cameradas uman. La nara ia catura la imajinas de poesistes moderne e ia es traduida par Trevor Joyce e Seamus Heaney.

Otra naras edita

La aventuras, o echtrae, es un grupo de naras de visitas a la otra mundo eres (cual pote es a ueste ultra la mar, o sutera, o nonvidable a mortales). La plu famosa, Oisin in Tir na nOg, es un parte de la sicle Fenian, ma alga aventura autonom survive ance, incluinte "La aventura de Conle", "La viaja de Bran mac Ferbail", e "La aventura de Loegaire".

La viajas, o immrama, es naras de viajas a mar e la mervelias videda sur los, cual pote es la resulta de la esperias de pexores, combinada con elementos de la otra mundo. De la sete immrama notada en la manoscritos, sola tre ia survive: la "Viaja de Mael Duin", la "Viaja de la Ui Chorra", e la "Viaja de Snedgus e Mac Riagla". La Viaja de Mael Duin es la asendente de la "Viaja de San Brendan" plu tarde. An si no tan antica la obras de la sentenio 8 ec tarde ia influe leteratur european, como la "Vide de Adamnan".

En la anios prima de la sentenio 20, Herminie T. Kavanagh ia rejistra multe naras de folclor eres, cual el ia publica en jornales e en du libros. 26 anios pos sua mori, la naras de la du libros "Darby O'Gill e la bon popla" e "Senes de esperas vea" ia es presentada como un filma per la sinema, "Darby O'Gill e la popla peti. La autor teatral notada, Lady Gregory, ia colie ance naras de folclor per conserva istoria eres.

Bibliografia edita

En engles:

  • Cross, Tom Peete and Clark Harris Slover. Ancient Irish Tales, 1936
  • Dillon, Myles. The Cycles of the Kings. Oxford University Press, 1946.
  • Dillon, Myles. Early Irish Literature. Chicago: University of Chicago Press, 1948.
  • Joseph Dunn: The Ancient Irish Epic Tale Táin Bó Cúailnge, 1914
  • Winifred Faraday: The Cattle-Raid of Cualng. London, 1904.
  • Gantz, Jeffrey. Early Irish Myths and Sagas. London: Penguin Books, 1981.
  • Kinsella, Thomas. The Tain. Oxford: Oxford University Press, 1970.
  • Gregory, Lady Augusta. Cuchulain of Muirtheme, 1902.

En eres medieval:

  • Cath Maige Tuired: The Second Battle of Mag Tuired. Elizabeth A. Gray, Ed. Dublin: Irish Texts Society, 1982.
  • Táin Bo Cuailnge from the Book of Leinster. Cecile O'Rahilly, Ed. Dublin Institute for Advanced Studies, 1984.
  • Táin Bo Cuailnge Recension I. Cecile O'Rahilly, Ed. Dublin Institute for Advanced Studies, 1976.

Otras (engles e eres moderne):

  • Coghlan, Ronan Pocket Dictionary of Irish Myth and Legend. Belfast: Appletree, 1985.
  • Mallory, J. P. Ed. Aspects of the Tain. Belfast: December Publications, 1992.
  • O'Rahilly, T. F. Early Irish History and Mythology, 1946
  • O hOgain, Daithi "Myth, Legend and Romance: An Encyclopedia of the Irish Folk Tradition" Prentice Hall Press, 1991.
  • Rees, Brinley and Alwyn Rees. Celtic Heritage: Ancient Tradition in Ireland and Wales. New York: Thames and Hudson, 1961.
  • Sjoestedt, M. L. Gods and Heroes of the Celts. 1949; translated by Myles Dillon. repr. Berkeley, CA: Turtle Press, 1990.
  • Williams, J. F. Caerwyn. Irish Literary History. Trans. Patrick K. Ford. University of Wales Press, Cardiff, Wales, and Ford and Bailie, Belmont, Massachusetts. Welsh edition 1958, English translation 1992.

Naras:

  • Lady Francesca Speranza Wilde, Ancient Legends, Mystic Charms, and Superstitions of Ireland, 1887
  • James Bonwick, Irish Druids and Old Irish Religions, 1894
  • Lady Augusta Gregory : Cuchulain of Muirthemne (1902), and Gods and Fighting Men, 1904
  • Juliet Marillier : Daughter of the Forest, Son of the Shadows, and Child of the Prophecy (Sevenwaters trilogy), 1999-2001.
  • Gregory Frost : Tain, 1986, and Remscela, 1988
  • Morgan Llywelyn : Red Branch (1989), Finn MacCool (1994), and Bard: The Odyssey Of the Irish, 1984.
  • James Stephens : Irish Fairy Tales, 1920.
  • Lenihan, Eddie and Carolyn Eve Green. Meeting the Other Crowd: The Fairy Stories of Hidden Ireland. New York. Jeremy P. Tarcher/Penguin. 2004.