Mitolojia latvisce
La mitolojia latvisce es composada de la credes pagan de la popla latvisce, reconstruida de evidentes scriveda e folclor. La rejion ia es un de la rejiones final cristianida de Europa, un prosede cual aveni de la sentenio 15 a la sentenio seguente. No testos nativa survive cual detalia la mitolojia de la cualce de la popla baltica en la periodo pagan.
Dios e divas edita
On ave reconstruis variante de la mundo mital latvisce, ma la plu de rexercores acorda sur la sinifia de alga cosas relatada a la sielo. La sielo se mesma es identifiada como Debeskalns ("monte sielal"). La sielo es ance nomida "monte de calculos", "monte arjento", e "monte de jelo", con ajetivos cual probable refere a la stelas o neva. Lo ia es ance sujesteda ce Dievs ("dio") es ance un simbol de la sielo, car la etimolojia de sua nom pare es relatada a la sielo.
Dievs es videda como la dio suprema. Un diva sielal es la diva de la sol, Saule, ci serti la fertilia de la tera e ia es la gardor de la malfortunosa, spesial per orfanes e pastores joven. Sua via condui el tra la monte de la sielo a la mar, cual es a veses interpreteda como representa la sielo o un mar universal. La mar e otra corpos de acua, incluinte rios, spesial Daugava, pare marca la borda entre la mundos de la vivente e la mor. En latvisce, la parola per "mundo" es derivada de la parola per "sol", e esta mundos es clamada "esta sol" e "acel sol". Donce, lo pare de Saule es ance prosima relatada a la conseta de moria. El porta la spiritos de la mor tra la mar a la mundo de la mor. Sua move dial pote tal es relatada a la siclo de vive umana, con el nase cada dia.
A la via de la sol, en o prosima a la acua, tipal sur un isola o roca en la media de la mar, es Asutras koks ("arbor de matini"), cual es suposada representa la arbor mundal. Lo es tipal descriveda como un arbor, ma pote ance es videda como un varia de otra plantas o an ojetos. Nun ia vide la arbor, an si folclor sujesta ce multe ia xerca per lo. Ancora, lo ia es sujestada ce sua corespondente pote es la stela polal o la via letin. Lo es ance proposada ce lo pote es la simbol per la anio. La arbor es relatada a la mitos de un sposi sielal en cual la sol o sua fia es corteada par Dieva deli ("fios de dio") - Auseklis ("venus") o Perkons ("tona").
Ance, car la parola latvisce per fia (meita) refere ance a un fem joven o virjin, lo no es serta ci esata deveni sposida. La dios mas spia a la diva solal a la arbor de mundo, prepara un banio per el e broma con el. Ultima, el es saisida e sposida. (Lo es posible ce la sposo de Saule es la dio de la luna Meness.) Esta coleri Perkons, ci colpa la arbor de mundo, afin Saule plorante debe colie la pesetas per tre anios e alora reconstrui los, cual el completa a la anio cuatro.
La vive pos mori edita
La mundo de la mor es nomida Aizsaule o Vinsaule. Lo es relatada a divas madral variosa (o posible un diva con multe nomes) - Zemes mate ("madre de tera"), Velu mate ("madre de fantasmas"), Kapu mate ("madre de enteras") e Smilxu mate ("madre de arena"). Ance relatada es Velns, un dio plu tarda identifiada con la diablo cristian. Tota divines pagan ia es clamada "diablos" par alga fontes cristian, donce lo es posible ce esta imaje es un fusa de multe dios, prima la dios enfernal, e folclor refere vera a la esiste de multe diablos, an si a veses, on nota un esistente major.
En la naras de fes latvisce, la diablo no es tipal mal. En loca, el es forte fisical, ma alga pigra e fasil trucida par Dievs e umanes. El es ance suposada como avente un rol en la crea de la mundo e viventes. Sua rena, no como la enferno cristian, es simil a la mundo de la vivente. Sua entradas es locada en forestas, pantanes, rios, semeteros, cavas, su rocas, e en la mar. La diablo fura persones a via per prende los a sua mundo. En esta, el es simil a otra spiritos ci mata persones, incluinte la mor ci ia es crededa como a veses reveni per reclama algun los ia conose en sua vive. La mor es nomida Veli (ance Ilgi, Dievini, e Pauri) ia es crededa como visita sua casas vea en la autono de Mikeli (setembre 29) a Martini (novembre 10)
Un reporta jesuita de la fini de la sentenio 16 sujesta ce, istorial, un prosede funeral ia es conduida par un person brandi un axa per proteje la mor de otra spiritos veninte a el tro rapida. La mor ia es enterada con benes de comersia per survive en la vive pos mori. Pan e bir es ance donada. En autono, la spiritos ia es invitada a casa per un festa. La casa ta es limpa e la table ta ave comedas preparada. A la comensa de la festa, un vea ta invita la spiritos par clama la nomes de tota mores ci ia vive en la casa cual la viventes pote recorda. El ta dona alora un parla reproxante los per no ia proteje la casa sufisinte, demanda ce los fa plu bon en la anio seguente, e alora invita los per come. Pos la come ia es finida, la spiritos ta es xasada a estra e la casa ta es limpida denova per es serta ce nun ia resta ala, e la susia ta es lansada en acua.
La mor pote ance es invitada per puri se en la banieria. La comeda pote ance es prendeda a la semetero o lasada en la banieria o graneria. En acel caso, lo ta es esaminada en la matina per vide si la mor ia toca lo, per determina si los ia es bonvolente a la viventes. En esta caso, un candela ta es luminada afin la mor pote vide la comedas. En alga rejiones, baldes de lete e acua e un tela limpa ta es ance lasada, afin la mor pote lava se. Los ci no ia onora la mor ta espeta un colie povre. En Latvia moderna, un forma de adora de asendentes ia es preservada en la selebra de la dia de recorda de la mor en novembre tarda, e en selebras en semeteros cual es fada en estate tarda.
Demones edita
La crede latvisce de spiritos mal e sorsores es probable la resulta direta de la xasas de sorsores en la sentenios 16 e 17, an ce alga elementos pote es la resulta de la demoni de credes plu temprana. Seguente, lo ia es crededa ce sorsores ia es servintes de la diablo. Nomida burvji, burtnieki (mas), o raganas (fema), estas ia es plu probable praticantes de medica tradisional.
Laumas e spiganas, orijina termas per ideas diferente, ia es ance usada per refere a sorsores en alga locas. Con la aida de la diablo, los pote muta a esentes variosa o ave spiritos mal servi los. Lo ia es sujestada ce spiritos de la mor pote servi la diablo o pote es usada par el per apare a umanas e deveni sorsores. Donce, la demones pote es videda como spiritos autonom o spiritos de sorsores volente asi e ala. Lo ia es crededa ce la spiritos de sorsores pote parti de sua corpos, cual deveni mor e alora pote es matada permane par turna lo, afin la spirito no pote sabe como el pote reentra la corpo.
Lo ave ance reportas de om-lupos (vilkatxi, vilkati) - umanas ci pote muta a lupos. La muta no nesesa tipal la aida de la diablo, ma en loca un rituo, cual comun nesesa desvesti. La om-lupo ta resta sua vestes e ta no pote reveni si algun ia toca la vestes. On ave reportas nonacorsdante de cual fortias los servi. Seguente un vista, los servi la diablo e garda la entras a enferno en cuando demones e sorsores asembla. Los fura carne. Ma los es ance reportada como "canes de dio" ci combate sorsores ci atenta fura la flores de granes, cual serti un bon colie.
La sorsores ia es reportada como fura lete, par se mesmas o par usa sapos e serpentes, crededa como capas de suca lete de la mamela e alora vomiti lo cuando comandada.
Un otra spirito, la spirito de un sorsor ma frecuente un spirito ci servi un sorsor, es pukis ("dragon") - un vivente focosa ci fura gran e otra ricas e trae los a sua mestre. La dragon ta es roja cuando "vacua" e blu cuando "plen" de ricas. El ta es retenida en un sala separada cual ta es mantenida multe limpa, do nun pote entre sin la permete de la posesor. Pukis ta es donada la peso prima de cada come. Si pukis deside ce el no ia es sufisinte adorada, el ta deveni coler contra sua posesor e arde la casa.
Un demon, a veses relatada a sorsores, ma tipal crededa como la spirito de un enfante condenada per infesta la vila asta la ora el ia ta mori, es nomida Lietuvens, ci tortura persones, boves, e cavalos en la note, e es asosiada con paralise en dormi.
Simil, lo es a veses reportada ce Vadatajs es un fantasma, a veses de un person ci ia mori tro temprana, e a veses vole mata un person en un modo simil a sua propre mori. Ma comun, Vadatajs es un demon. Esta demon ataca viajores, confusa los afin los no pote trova sua via a casa. Frecuente, sua gol es per condui persones a la corpo de acua la plu prosima, do los ta afoca.
Divas de destina edita
La diva la plu importante de destina ia es Laima (la diva de fortuna). El abita en la mundo e es envolveda multe en la vive de umanas. Sua rol fundal es relatada a nase e deside la destina de un enfante. Femes ia pari tradisional en la banierias. La rueta a la banieria ta es limpida afin Laima ta pote vade fasil per aida en la prosede de pari. La fem ta es lavada ritual e ta ofre preas e dona ofres ritual a Laima.
Pos un nase susedente, femes sposida ta festa, con Laima avente un loca de onora reservada per el en la banieria como un sinia de grasia. El ta determina ance la destina de un person - un deside an el no pote cambia plu tarda. Sua aida ia es espetada en otra aspetas importante de vive ance, e el ia es videda como un diva bonvolente. Xicas no sposida ta prea a el per dona un bon sposo e un sposi felis. Laima serti ance la fertilia de la cultiva e la animales, spesial la cavalos. Du otra divas como roles simil es Karta e Kekla. La diva Mara ave ance alga roles simil.
An si esta es ancora debateda, multe rexercores acorda ce Mara es sinonim con Maria (madre de Jesus). La sujesta es ce Maria ia prende alga roles de la divas plu temprana, incluinte la roles de Laima. Mara ia es clamada en pari e per aida con maladias par sua nom latvisce Marija o par alga parolas evitante cristian. Tota de esta ia es ance usada per refere a la utero en la majia nativa. La vista oposante, fundida sur linguistica comparante cual lia el con un grupo vasta de otra divines indoeuropean, es ce el ia es un diva enfernal importante precristian cual dona e prende vive.
Divines de fertilia edita
La serti de fertilia ia es un rol importante encargada a multe spiritos e divines. Serti un bon colie ia es la rol xef de Jumis. Lo ia es crededa ce el vive en la campos, e donce la parte final de la colie ta es restada sur la campo per sua abitada. Esta crede ia es la funda de un ritual cual envolve la catura de Jumis, presentada a Mikeli, cual ia es tipal la dia final de colie. Esta pare inclui cantas cuando la peso final de la gran ia es colieda, demandante ce Jumis core a do la colie ia es reservada. La peso final ta es xercada per Jumis e alora nodada.
Un otra pratica relatada ia es la fabrica de garlandas de gran cual pote es reservada asta la anio seguente, cuando la semes de los ta es prima semida. La cultivores ia atenta pone la troncetas de Jumis en esta garlandas. En esta modo, Jumis es simbolida par troncetas duple. Cualce fruta o flor con tal duplis nonormal ia es nomida Jumis. La popla crede ce come Jumis ta causa de femes o animales fema ta pari jemelos. Otra dios debe serti la bonia de bestias.
Usinx ia es asosiada con la Jurgi selebra e donce deveni alga fusada con San Jorjio. El ia es adorada xef como la garda de la cavalos. Lo es posible ce el pote es la dio de abeas e de lus. La protejor de boves pare es Mara. El es ance conoseda como Lopu Marija ("Maria de bestias"), Lopu mate ("madre de bestias"), e Piena mate ("madre de lete"). Sua rol ia es la serti ce la boves pote dona lete. Donce, el es comun notada en junta con acua, rios, e la mar, car acua simboli lete, e arjila simboli bur. Fontes istorial nota ance ce la paganes latvisce ta adora serpentes (probable serpentes de erba) e buros como "madres de lete", e nuri los con lete.
Otra credes edita
Probable los respeta multe otra spiritos e divines, Per esemplo, los ave multe divines cual los nomi "madres", estimada como entre 50 e 115. La razona per la cuantia nonesata es ce, a veses, la autentica de alga "madres" es dutada, o rejiones diferente respeta divines diferente, o un divin pote ave plu ca un titulo sinonim. "Madre" e otra termas de familia pote es usada sola per sinifia vea e per mostra respeta (como cuando refere a persones vea). La plu de spiritos fema ia es nomida "madre", spiritos mas ia es nomida "padre" (tevs), "mestre" (kungs), "dio" (dievs, dievinx), o "spirito" (gars, garinx)
Fontes istorial reporta ce on ave un crede ce spiritos abita en la solo. On ave ance Majas gari ("spiritos de casa") o Majas kungs ("mestres de la casa"), ci abita ala e ia es adorada a casa. Estas ia es a veses animales santa. Los ia es donada la peso prima de la comedas. Spiritos e divines ia es ance adorada en locas spesifada, cual pote es visitada sola a saisones spesifada. Lo ia es crededa ce, si on visita los a otra tempos, o si on viole, an asidental, tal loca en cualce modo, malfortuna grande ta visita la person culpable. Sieca o mor es esemplos comun notada.
On ave ance animales, algas conoseda como dieva sunixi ("canes de dio"), cual, si on mata un de los, malfortuna ta segue. Estas inclui erminos, lupos, ranas, marietas, e otras. A alga veses, lo ia es crededa ce la mata de los no ta trae malfortuna, ma si la animal ta evade, lo ta venja se en un modo asustante. Esta refere plu a serpentes. Serpentes e lupos debe no es clamada par sua nom. Los ave credes simil de no clama la nom de la diablo o de la pesta. La razona per esta tabu ia es la crede ce, car la esente es perilosa per umanas, los ta veni cuando nomida. Simil, sibila en alga locas ta invita la diablo, ma canta ta invita dio. Donce, un varia grande de parolas evitante ia es usada en loca, incluinte comparas, nomes umana, e otra termas antropomorfe. Pe, serpentes ia es nomida cordas o nomida sposis, e la lupo es nomida Juris o Ansis o es refereda como un om, frate, o ami de la foresta.