Moda (gramatica)
La moda gramatical es un de cuatro cualias de verbos (minima), con tempo, vose, e aspeta, ce parla pote espresa. El indica ideas de posable e nesesa, e cualias de desira, espera, duta, etc. Esemplos inclui la sujuntada, la ipotesal, e la comanda.
La moda real es la moda plu comun. El espresa un cosa cual ia aveni, es aveninte, o va aveni con un grado de serta. Otra modas es comun clamada "modas nonreal".
La moda sujuntal (o sujuntiva) es un moda comun usada en proposas suordinada per espresa un desira, un emosia, un posable, un judi, un opina, un nesesa, o un ata ce no ia aveni ja.
La moda de desira es un moda relatada cual espresa plu la desira o espera de la parlor. El es ance clamada la optativa.
La moda ipotesal (o "moda dependente") es un moda comun usada en frases cual refere a un state ipotesal o un aveni nonserta ce depende de un otra state o aveni. La moda ipotesal espresa un ata cual ia aveni posable en la pasada, cual aveni posable aora, o cual va aveni en la futur. El suposa ce on comprende ce (o vera ajunta) "si tal cosa aveni, ia aveni, o va aveni". El es simil a la moda sujuntada. El es ance comun usada per espresa la "futur-en-la-pasada".
En engles, la moda ipotesal es espresada par la usa de la parola "would" seguenteda par la infinitiva. En espaniol, franses, e deutx, ave un afisa o altera spesial per la ipotesal:
- John would eat if he were hungry (en engles)
- Johannes äße, wenn er hungrig wäre (en deutx)
- Jean mangerait s'il avait faim (en franses)
- Juan comería si tuviera hambre (en espaniol)
- Joan ta come si el ta fami (en elefen)
En la linguas romanica, la moda ipotesal es usada en la proposa major de frases ipotesal. La verbo en la proposa suordinada (pos la "si") es comun en la moda real o la moda sujuntiva. Ma en alga linguas, como suomi, polsce, e deutx (e alga tempos en engles), ambos la proposa xef e la proposa suordinada ave se verbos en la moda ipotesal.
La moda ipotesal es ance comun usada per espresa cortesia, como si on ia dise ance "...si tu vole".
La moda de comanda (ance clamada la imperativa) es comun indicada par la asentia de un sujeto, ma la person du suposada:
- Labora plu forte!
- Work harder! (engles)