Moda roman antica
Vestes en Roma antica ia es jeneral composada de un tunica (camison) sin mangas o con mangas corta, tipal ateni la jeno per mases, e con mangas e plu longa per femas. A avenis formal, sitadanes mas ia pote porta un toga de lana, drapeda supra la tunica, e sitadanes fema e sposida ia porta un palla (un capa) supra un stola, un veste simple, volumosa, e longa, con mangas. Vestes, sapatos, e otra ajuntas a la vestes, ia pote indentifa la seso, prestijia, titulo, e clase sosial, e donce ia ofre un modo de controla sosial. Esta ia es plu clar en la segrega de niveles de sejas a teatros publica, juas, e festes, e en la vestes ofisial de judores, pretes, e ofisiores militar. Femes de la clases plu alta ia porta sempre un velo, cuando los vade esta sua casas.
La toga ia es videda como la veste nasional de Roma, ma per ativias dial, la plu de Romanes ia prefere vestes plu casual, pratical, e confortosa. La tunica, en formas variosa, ia es la veste fundal per tota clases, ambos sesos, e la plu de ocupas. Lo ia es tipal fabricada de linen, e ia es aumentada cuando nesesada con vestetas o con tipos variosa de vestes per la dias fria o pluvosa, como pantalas per omes, e capas, jacones, e xapos. En partes de la impero plu fria, pantalones ia es portada. La plu de romanes urban ia porta sapatos, pantoflas, botas, o sandales. En la campania, algas ia porta zocos.
La plu de vestes ia ave un strutur simple e un forma fundal, e la produi ia nesesa talia minima. Tota ia es produida par mano e cada prosede nesesa capasia, sabe, e tempo. Fili e texe ia es videda como ocupas virtuosa e frugal per femes roman de tota clases. Damas rica, incluinte Livia, la sposa de Augusto, ia pote mostra sua valuas tradisional par produi vestes a casa, ma la plu de omes e femes ci ia pote compra los, ia compra vestes de artisanes spesial. Relativa a la costa fundal de vive, an vestes simple ia es cara, e ia es resiclida multe veses a su de la grados sosial.
La elite de Roma ia produi leges desiniada per limita mostras publica de ricas e lusosias personal. La leges no ia es multe susedosa, car la mesma elite rica ia joia sua vestes lusosa. Stofas esotica ia es otenable, a un costa: damascos de seda, gazas diafana, stofa de oro, brodes detaliosa, e tinjes vivin e cara como jala de zafran e purpur de Tiro. No tota tinjes ia es cara, e la plu de romanes ia porta vestes colorosa. Vestes limpa e briliante ia es un marca de respeta e state entre tota clases sosial. La broxes e otra fisadores usada per securi vestes como capas ia dona plu oportunes per beli e esibi.