Moliere
Molière - Nicolas Mignard (1658).jpg

Informa personal

Nase: 15 janero 1622, Paris (Frans)
Mori: 17 febrero 1673, Paris (Frans)
Pais: Frans

Otra informas

Profesa: Dramiste

Moliere es la nom teatral de Jean-Baptiste Poquelin (1622–1673), un dramiste franses e un de la scrivores la plu grande de comedia. Asta la eda presente, sua jenero comica universal continua diverti la popla, e sua teatrales es frecuente produida e multe traduida tra la mundo intera.

Moliere ia nase en Paris. En 1634 el ia junta se a un compania teatral. La grupo, ci Moliere ia nomi Illustre Théâtre ("Teatro luminada"), ia fa presentas en Paris e ia turi la vilas tra 13 anios. En 1659, los ia presenta La femes riable finjosa. Esta obra ia provoca un tempeste de amira en Paris. De alora asta sua mori, a la min un de sua comedias ia es produida a cada anio.

La scola per sposas (1662) ia es un rompe con la abitua de farsa, e on regarda lo como la prima de la obras seria-comica grande de leteratur franses. En Tartuffe ("Ipocrita relijiosa") el ia inventa un de sua tipos comica famosa sur la crede finjente. Esta paso ia es tan osante ce Re Louis 14, an si divertida par Tartuffe, no ia permete la publici de lo tra 5 anios, temente ce lo va ofende la pretes potiosa franses. Le misanthrope ("La odior de umanas") es regardada como trajedia car lo no fini felis.

Entre la pesos la plu impresante de Moliere es La avar (1668) e La mediciste contra se mesma. La senior aspirante es un comedia baletal cual burla un mercator de vestes, susedosa ma naive, ci aspira la invita en corte. La comedia ultima, La malada imajinal (1673) segue la costum de satira sur la medica cual ia es vasta sperdeda en leteratur de la sentenios 16 e 17.

Sua satiras, dirijeda contra la costumes sosial cual ofende la natur, desinia un pitur esata de la sosia franses contempora. El es la mestre de critica agu, an cuando el atenta teni un simpatia sutil.