Molin (jua)
La jua de la molin es un jua de table stratejial per du juores, cual dati a la min a la Impero Roman. Lo es un jua "solveda", pd un jua de cual la stratejia la plu bon ia es ja calculada: Si lo es juada perfeta par ambos juores, la jua resulta en un fini egal. La tre varias alternativa de la jua es la usa de tre, ses, e des-du pesos.
Regulas edita
La table es composada de un grilia con 24 crusas o puntos. Cada juor ave nove pesos, tipal colorida negra e blanca. Juores atenta crea grupos de pesos de sua propre pesos en un linia orizonal o vertical, cual permete ce la juor "catura" un peso de sua oposor. Cuando un de la juores es reduida a sola du pesos (e donce no capas de crea linias de tre pesos), la otra juor ia gania. El pote ance gania par causa ce sua oposor no pote move en un modo legal. La jua prosede en du (es posible tre) fases:
1. La jua comensa con un table sin pesos. La juores alterna par pone un peso a un turno sur un punto vacua. Si la juor pote crea un linia de tre, el pote sutrae un de la pesos de sua oposor. Pos cual tota la pesos ia es poneda, la fase du comensa.
2. La juores continua a turnos alternante, alora par move un peso a un punto liada. Un peso no pote salta supra un otra peso. Juores continua atenta forma linias de tre pesos e sutrae la pesos de sua oposor. Un tatica es ce la juor pote move un de sua pesos a via de un punto en un turno, e en sua turno seguente, move la peso a la punto orijinal, per formi la linia ancora
3. Cuando un juor es reduida a tre pesos, on ave no plu un limita sur acel juor de move sola a puntos juntada. En loca, la pesos de la juor pote "vola" de cualce punto a cualce otra punto vacua. Esta fase ia es introduida per dona aida a la juor plu debil cuando el es sola un peso de perde la jua. No tota juores usa esta regula.
Varias edita
Molin per tre pesos per juor es juada sur la puntos de un grilia de du par du cuadros, o en la cuadros de tre par tre cuadros, como en tictacto. La fase prima es esata como tictacto - pone tre pesos en un linia, e on gania la jua. Si nun ia gania par pone, fase du comensa. On ave du varias per esta fase: move a un punto juntada, como la jua de nove pesos; o move a cualce punto vacua ("vola"), como fase tre de la jua de nove pesos.
Molin per ses pesos es juada sur un table como la orijinal, ma sin la cuadro esterna, pd con 16 puntos. Cada juor comensa con ses pesos. Volante no es permeteda. Esta ia es popular en la eda medieval, ma ia es desusada per 1600.
Un varia cual usa esta table mesma, ma con sinco pesos per juor. Un varia con sete pesos per juor es juada a un table simil, ma con un crusa en la sentro.
Molin per des-du pesos ajunta cuatro linias diagonal a la table, cual crea 24 puntos, como la jua orijinal, ma la linias posible es creseda. Par usa 12 pesos per person, lo es posible ce tota puntos es plenida, en cual caso, la jua fini como egal. Esta varia es popular en Sudafrica, do la jua es nomida morabaraba.
Esta table es ance usada per molin per des-un pesos.
Un plu varia es per des pesos per juor. Lo ia es ance nomida la molin de Lasker, car lo ia es inventada par Emanuel Lasker, campion mundal en xace de 1894 a 1921. Lo ave la regulas de la jua orijinal con nove pesos, ma con du diferes: Cada juor usa des pesos, e la pesos pote es ance moveda en la fase prima, pd, cada juor pote eleje pone un peso nova sur la table, o move un peso ja sur la table. Esta varia es plu complicada, e un fini egal es min probable.
Multe otra varias esiste, e multe cultures tra la mundo ave sua propre varia.
Istoria edita
Ovid ia nota, en sua Ars Amatoria (sirca 8 ce), pos discute latrones, un de la indicas la plu vea:
On ave un otra jua divideda entre tan multe partes como on ave menses en la anio. La table ave tre pesos a cada lado; la ganior debe pone tota de sua pesos en un linia reta. Lo es mal si un fem no sabe como jua, car ama comun comensa en jua.
Enscrives de la table per jua molin ia es trovada en multe locas, de la eda roman e la eda medieval, spesial en templos e catedrales. Comun, esta tables ia usa bucos en loca de puntos o linias. Tables grande per la jua ia es ance cortida en la pastos comun. En A Midsummer Night's Dream ("un sonia de un note de estate media") par Shakespeare, Titania refere a un "table" de esta tipo.
La desinia de la table ia ave otra sinifias en alga cultures, como un simbol de proteje de malia. Per la celtas, lo es sujestada, la simbol ia es santa: a la sentro es la "calderon santa", un simbol de rejenera, e de lo es la cuatro dirijes, la cuatro elementos, e la cuatro ventas. Si on regarda la table ronda per tre pesos de roma antica a destra, on pote nota la simbol de la sol.