La bandera de Montreal
La visinerias de Montreal

Montreal (pronunsia franses: [mɔ̃ʁeal]) es la munisipal la plu poplada en la provinse canadian de Quebec ([kebɛk]) e la site du en Canada. Fundida orijinal en 1642 con la nom Ville-Marie, pd "site de Maria", lo es nomida per Monte Real, la colina con tre culminas en la cor de la site. La site es sentrida a la Isola de Montreal e alga isolas periferial plu peti. Lo ave un clima continental con cuatro saisones, con estates calda con un promedia masima dial de 26 a 27 °C en julio e invernos fria e nevosa con un promedia dial de −10.5 a −9 °C, e un promedia de neva de sirca 210 cm. En 2016, la site ia ave 1,704,694 abitantes. La area urban ia ave 4,098,927 abitantes. Franses es la lingua ofisial de la site, e es parlada a casa par 49.8% de la abitantes, segueda par engles con 22.8%.

Indicas arceolojial en la rejion mostra ce la americanes orijinal ia ocupa la isola de Montreal tan temprana como 4000 anios ante aora. Par la anios 1000 ec, los ia comensa cultiva mais. Entra alga desenios, los ia construi vilas fortida. En la lingua mohauc (irocuoi), la isola es nomida Tiohtià:ke Tsi, pd "do la nasiones e rios uni e divide". En la lingua ojibue (algoncian), lo es nomida Mooniyaang, "la loca de para prima", cual relata a la predise de la sete focos.

La iroquoi de la San Laurent, un grupo etnical e cultural distinguida de la nasiones irocuoi de la Haudenosaunee, alora en la area de New York de oji, ia fundi la vila de Hochelaga a la pede de Monte Real du sentenios ante la ariva de la franses. Arceolojistes ia trova indicas de sua abita ala e a otra locas en la vale de a min la sentenio 14. La esploror franses, Jacques Cartier, ia visita Hochelaga a 2 otobre 1535, e ia estima la cuantia de persones nativa a Hochelaga como "plu ce un mil persones".

Setedes anios plu esploror franses Samuel de Champlain ia reporta ce la irocuoi de la San Laurent e sua vilas ia desapare completa de la vale. Esta es suposada la resulta de migra a via, epidemicas de maladias european, o geras entre tribus. En 1611, Champlain ia fundi un stasion per comersia en pelos sur la isola de Montreal, a un loca orijinal nomida "La Place Royale", a la conflue de Petite Riviere e la Rio de San Laurent, la loca oji de Pointe-à-Callière. Sur sua mapa de 1616, Champlain ia nomi la isola Lille de Villemenon, per onora la senior de Villemenon, un ofisior alta ci ia desira la posto de visre de Frans Nova. En 1639, Jérôme Le Royer de La Dauversière ia oteni la titulo de senior de la isola de Montreal en la nom de la Sosia de Nosa Dama de Montreal, per fundi un mision roman catolica per predica a la nativas.

Dauversiere ia emplea Paul Chomedey de Maisonneuve, alora con 30 anios, per condui un grupo de colonistes per construi un mision sur sua senioria nova. La colonistes ia departe de Frans en 1641, e ia ariva a la isola la anio seguente. La colonia ia inclui un egleseta e un ospital, su la comanda de Jeanne Mance. Per 1643, Ville-Marie ia es atacada ja par atacas par la irocuoi. En la primavera de 1651, la atacas ia deveni tan frecuente e tan violente ce Ville Marie ia crede ce sua fini ia ariva. Maisonneuve ia fa ce la colonistes refuja en la fortres. Par 1652, la colonia a Montreal ia es tan reduida ce el ia es forsada a reveni a Frans per enscrive 100 bonvolores per vade con el a la colonia la anio seguente. Si la atenta ia fali, Montreal debe es abandona e la survivores debe es relocada a la Site de Quebec. Ante esta 100 ia ariva en la autono de 1653, la cuantia de persones de Montreal ia es apena 50 persones.

Per 1685, Ville Marie ia ave sirca 600 colonistes, la plu de los abitante casas umil de lenio. Ville Marie ia deveni un sentro per la comersia de pelos e un base per plu esplora. En 1689, la irocuoi, aliada con la brites, ia ataca Lachine sur la isola de Montreal, la masacra la plu mal en la istoria de Frans Nova. Per la sentenio 18 temprana, la Ordina Sulpisian ia es fundida ala. Per coraji colonia franses, los ia vole ce la mohauces move a via de la stasion de comersia a Ville Marie. La mohauces ia ave un vila de mision, nomida Kahnewake, sude de la Rio de San Laurens. La padres ia convinse ala mohauces per funda un vila nova a sua teritorio per xasa vea, nomida Akwesasne. Tota tre locas es aora reservas per la mohauces en Canada.

La teritorio es es renada como un colonia franses asta, en la Gera de Sete Anios, la autorias franses ia sede la site de Montreal a la brites pos la Articles de Sede ia es suscriveda en 1760.

Montreal ia es corporada como un site en 1832. La abri de la Canal Lachine ia permete barcones per sircoveni la Rapidas Lachine, e la construi de la Ponte Victoria ia fa ce Montreal deveni un sentro major de ferovias. La xefes de la comunia comersial de Montreal ia comensa construi sua casas en la Milia Cuadrida de Oro (sirca 2.6 km2) de sirca 1850. Per 1860, lo ia es la site la plu grande en America Norde brites, e la sentro sin debate de la economia e cultur de Canada.

Montreal ia es la capital de la Provinse de Canada de 1844 a 1849, ma ia perde esta prestijia cuando un manada de toris ia arde la Parlamente Canadian per protesta la pasa de la projeta legal per perdes de la rebela. Pos esta, la capital ia move entre la Site de Quebec e Toronto, asta en 1857, Rea Vitoria mesma ia declara Ottawa como la capital per razonas stratejial. La razonas ia es duple: car lo ia es locada en la interna de la Provinse de Canada, lo ia es plu protejeda de atacas par la SUA. Posible plu importante, car lo es locada a la borda entre Canada franses e Canada brites, la vila de Ottawa ia es videda como un compromete.

Oji, Montreal es un de la plu importante sites de la mundo. Per esemplo, lo es bon respetada per sua universias: la Universia de McGill es videda como un institui la plu bon en Canada e an en la mundo. La Universia de Montreal es ance un de la plu bon en Canada, spesial per rexerca. Otra universias bon respetada inclui la Universia de Concordia, la Universia de Quebec a Montreal, e la Scola de Musica de Quebec a Montreal. McGill e Concordia es universias engles, la otras es universias franses.

Un otra loca per cual Montreal es famosa es la Place Ville Marie, un compleso grande de ofisias e botecas en la sentro de Montreal, composada de cuatro construidas de ofisias e un plaza sutera per compra. La construida xef es 1 Place Ville Marie, un 188 m tore crusiforma. La plaza es un noda en la rede nomida la Site Sutera, un serie de tores comersia, oteles, sentros comersial, complesos comersial e abital, salones de conferes, universias, e esibis de presentas artal cual formi la cor de la sentro de site de Montreal.