Mundo
La mundo es la totalia de cosas, la realia intera, o cualce cosa cual esiste. La natur de la mundo es diferente consetada en campos diferente. Alga consetas regarda la mundo como unica, ma otras parla de la multia de mundos. Alga trata la mundo como un ojeto simple, ma otras analise la mundo como un cosa complicada con multe partes.
En cosmolojia siensal, la mundo o universo es tipal definida como "la totalia de spasio e tempo; tota cual es, ia es, e va es." Teorias de modalia parla de mundos posible como modos completa e coerente de como cosas ia ta pote es. Fenomenolojia, comensante de la orizon de ojetos co-donada cual es presente en la periferia de cada esperia, defini la mundo como la orizon la plu grande, o la "orizon de tota orizones." En la filosofia de mente, la mundo es contrastada con la mente como lo cual es representada par la mente.
Teolojia conseta la mundo en relata con Dio, per esemplo, como la creada de Dio, como identica a Dio, o como la du esente interdependente. En relijios, on ave un tende de desvalua la mundo material o sensal en prefere de un mundo spirital cual on debe xerca par pratica relijiosa. Un representa completa de la mundo e nosa loca en lo, como trovada en relijios, es conoseda como un vista de mundo. Cosmogonia es la campo cual studia la orijina o crea de la mundo e escatolojia refere a la siensa o dotrina de la cosas ultima o de la fini de la mundo.
En contestos variosa, la terma "mundo" o "mundal" adota un sinifia plu restrinjeda cual es asosiada, per esemplo, con la Tera e tota la viventes sur lo, con umanas como un intera, o con un estende internasional o intercontinental. Con esta sinifia, istoria mundal refere a la istoria de umanas como un intera, e politica mundal es la campo de siensa political cual studia consernas cual transende nasiones e continentes. Otra esemplos inclui termas como "relijio mundal", "lingua mundal", "governa mundal", "gera mundal", "popla mundal", "economia mundal" o "torneo mundal".