Nebraska
| |||
| |||
Nebraska es un stato de la Statos Unida de America.
La site capital es Lincoln. La site la plu grande es Omaha, Nebraska. Omaha es a lado de la rio Missouri. La clima de Nebraska ave e invernos fria e estates calda. Tempestas violente e tornados es ance comun en la menses calda. La stato es jeneral covreda par prados sin arbores. La plu de la prados es ideal per la boves, e Nebraska produi multe carne de bove, carne de porco, mais, e soia.
La cuantia de abitores de Nebraska es plu ca 1 881 000. La tera covre plu ca 200 000 cilometres cuadrida.
La plu de la persones de Nebraska es desendentes de deutxes-americanes, ma on ave ance alga desendentes de txesces-americanes.
Etimolojia
editaLa parola "Nebraska" ia deriva de o la parolas Ni Brasge en oto (un lingua american orijinal) o la parolas Ni Bthaska en omaha (un otra lingua american orijinal). Ambos sinifia "acua plana". "Acua plana" ia descrive la rio Platte, cual flue tra la stato de la ueste a la este.
Istoria
editaAmericanes orijinal ia abita sur la teritorio de Nebraska tra miles de anios ante la esplora european. La tribus abitante ia inclui la "omaha", "misouria", "ponca", "poni", "oto", e ramos diversa de la tribu "lakota".
Cuando esplora, comersia, e coloni european ia comensa, e Frans e Espania ia atenta controla la tera. Ante la anio 1705 Frans ia crea lias de comersia con la americanes orijinal ci ia vive longo la rio Missouri a la borda este de Nebraska. Ante 1719 Frans ia scrive tratas de pas con multe de la tribus. Gera ia comensa entre Frans e Espania. En 1720, Espania ia envia un grupo de sua armada per ataca la franseses, ma un armada de pauni se otos, tribus ci ave tratas con Frans, ia mata la plu de la grupo espaniol. Esta batalia ia fini la esplora espaniol de Nebraska en la sentenio 18.
Frans ia sede la posese de la "teritorio de Louisiana", cual ia inclui Nebraska, a Espania en la anio 1762. La parti de Frans de la teritorio ia lasa ce ambos de Espania e Britan compete per lo. La colonia european prima en Nebraska ia es instituida en 1795, prosima a la conflue de la rio Platte e la rio Missouri.
Plu tarda, la "teritorio de Louisiana" ia es comprada par la Statos Unida de America. La armada american ia institui la fortres Atkinson en Nebraska en la anio 1819. Fortres Atkinson ia es la fortres american prima a la ueste de la rio Missouri. La armada american ia abandona lo en 1827.
Pos 1848, con la trova de oro en California, multe persones ia comensa coloni la tera de Nebraska. En acel tempos, multe cursos de migra famosa ia traversa la tera de Nebraska, incluinte la curso Oregon, la curso California, e la curso mormon, entre otras. Alga migrores viajante longoo la cursos ia resta en Nebraska. En 1854 la congresa de SUA ia crea la teritorios de Kansas e Nebraska su la "ata Kansas-Nebraska". La capital de la teritorio de Nebraska ia es Omaha.
En la anios 1860, la governa de la SUA ia desloca la americanes orijinal de la plu de la teritorio de Nebraska. Esta ia abri la tera per la coloni european. Su un ata de la governa de la SUA, miles de persones ia veni a Nebraska per reclama tera sin custa. Car Nebraska ave arbores sola prosima a la rios e rietas, la plu de la colonistes prima ia construi sua casas de brices de tera. Ance multe de la tribus americanes orijinal ia construi tal casas. La onda prima de migra ia dona a la stato tan multe abitores ce lo ia pote solisita deveni un stato.
A 1 marto 1867, Nebraska ia deveni la stato 37, e sua capital ia move de Omaha a Lancaster. La vila de Lancaster ia cambia sua nom a Lincoln per onora Abraham Lincoln, la presidente resente asasinada.
Asta esta tempo, la tribus de lakotas e ponis ia batalia multe. La batalia major ultima entre la ponis e la lakotas ia es la "batalia de Canion Masacra" en 1873.
En la anios seguente, la cuantia de abitores ia crese multe. Fatores diversa ia contribui a la crese, incluinte la prados enorme, e progresas cultival como molines de venta, filo spinosa, e arados de asero. En la anios 1880, la cuantia de abitores en Nebraska ia crese asta 450 000.
En la anios final de la sentenio 19, multe de afroamericanes ia migra a Nebraska de la statos sude. La plu de esta migrores ia move a Omaha. Omaha ia ave multe empleas en industrias incluinte paci de carne, e ferovias. Oji la stato ave ance alga reservas per americanes orijinal, e lo ave poplas latina. Ma ancora la plu de la abitores de Nebraska es desendentes de euroamericanes.
Areas de Interesa Jeografial
editaNebraska ave multe areas separada, incluinte la Cresta de Pinos, la Colinas Wildcat ("gato savaje"), e la Colinas de Arena, entre otras.
La Cresta de Pinos, locada en la norde-ueste de Nebraska, es covreda par pinos de la spesie ponderosa. Lo ave multe presipes, rocas grande e caniones. Lo es la abitada de multe alces, servos, e alga oveas de corno grande. Ance pavos nondomada abita ala. En la Cresta de Pinos es la Parce Statal de Chadron, e un area de foresta nasional de la SUA, cual inclui la area recreal nasional nomida Cresta de Pinos. Esta areas ave bon ruas de pasea e areas de campa.
La Colinas Wildcat, como la Cresta de Pino, es ance un area con multe presipes, rocas grande e caniones. La Colinas Wildcat ave alga de la rocas la plu famosa de Nebraska, incluinte la Roca Ximine (un loca istorial de la SUA), la Rocas Corte e Prison, e la Roca de Scot (en engles Scottsbluff) cual es un monumento nasional de la SUA. La area, locada en la ueste de la "manico de padela" de Nebraska, es ance covreda par pinos ponderosa. La Colinas Wildcat, e la Cresta de Pino es la sola areas de Nebraska cual ave permanente grupos de pumas.
La Colinas de Arena, en la area norde-sentral de Nebraska, es leteral colinas de arena con un covrente de erba. Los formi un tipo de prado unica, cual ave colinas grande miscada con areas de pantan con acua basa en multe de la vales. La alta de alga de la colinas es plu ca 100 metres. La colinas covre prosima un cuatri de la stato. En cada anio, la Colinas de Arena es sur un rua de migra par multe spesies de avias migrante. Cisa la plu famosa de la spesies cual migra tra la area es la gru de la Colinas de Arena, cual pausa a la borda de esta colinas en la rio Platte a cada anio.