Neolitica en Xina

La eda neolitica en Xina pote es trasada a retro a sirca 10,000 aec. La evidentes la plu temprana de ris cultivada, trovada longo la Rio Yangtze, es datida par radiocarbon a 8000 anios ante aora. La evidentes per cultiva de milio es datida par radiocarbon a sirca 7000 aec. Cultiva ia contribui a la crese de la cultur Jiahu (7000 a 5800 aec). En Ningxia, 3172 siselidas en falesas datida a 6000 a 5000 aec ia es descovreda, inclinte 8453 simboles como la sol, luna, stelas, dios, e senas de xasa o pastori. Esta glifos es reputada como simil a la sinias la plu temprana cual ia es confirmada como xines scriveda. Protoscrive xines ia esiste en Jiahu de sirca 7000 aec, Dadiwan de 5800 a 5400 aec, Damaidi de sirca 600 aec, e Banpo de la milenio sinco aec. Alga eruditas ia sujeste ce la simboles de Jiahu ia es la sistem de scrive xines la plu temprana.

La cultures de la neolitica en Xina

Escava de un loca de la cultur Peiligang en la contia Xinzheng en Henan, ia trova un comunia cual ia flori en 5500 a 4900 aec, con evidentes de cultiva, construidas, seramica, e entera de la mor. Con cultiva ia veni un crese en la cuantia de popla, la capasia per reserva e redistribui la colies, e la posible de suporta artisanes spesialiste e dirijotes. En la eda neolitica tarde, la vale de la Rio Jala ia comensa fundi se como la sentro de la cultur Yangshao (5000 a 3000 aec), e la vilas prima ia es fundida. La vila la plu arceolojial sinifiante de esta ia es trovada a Banpo, Xian. Plu tarde, la cultur Yangshao ia es segueda par la cultur Longshan, cual ia es ance sentrida a la Rio Jala, de sirca 3000 a 2000 aec.

• 
  seramica de 8000 aec
• 
  Testas de flexas de oso, de la cultur Peiligang
• 
  vaso de ivor, formida como un papilio, con la motif de du avias fasante la sol; de la cultur Hemudu
• 
  Vasos de la cultur Hemudu (5500 a 3300 aec)