Neoplasmas de pel
Neoplasmas de la pel es canseres, pd la developa de selulas nonormal (neoplasmas) cual ave la capasia per invade o sperde a otra partes de la corpo. On ave tre tipos xef: selula basal, selula scamosa, e melanoma. La du prima, con alga canseres min comun, es ance nomida nonmelanomas.
Canser de selulas basal crese lenta e pote dana la texedas sirca lo, ma no sperde comun a areas distante o resulta en mori. Lo aveni comun como un area de pel elevada ma no dolosa, cual pote es briliante con dutos sangual peti sur la surfas, o como un area elevada con un ulser.
Canser de selulas scamosa es plu probable sperdente. Lo presente se tipal como un bulto dur con un culmina scamosa, ma lo pote ance forma un ulser.
Melanoma es la plu violente. Sinias inclui un nevo cual ia cambia sua grandia, forma, color, ave bordas nonregula, ave plu ca un color, es prurinte o sanguinte.
Plu ca 90% de casos es causada par esposa a radia ultravioleta de la Sol. Esta esposa crese la risca de tota tre tipos de canser de pel. Esposa ia crese partal car la strato de ozone ia magri, cual afeta plu la emisfero sude. Letos de bronzi deveni un otra fonte de radia ultravioleta. Per melanomas e canser de selulas basal, esposa entre enfantia es spesial danante. Per canser de selulas scamosa, tota esposa en cualce eda es importante. Entre 20% e 30% de melanomas developa de nevos. Persones con pel blanca ave un risca plu grande, e ance los con imunia debil, como de alga medisines o VIU o sido. Diagnose es par biopsia.
Minima esposa a radia ultravioleta e la usa de crema solal pare es metodos efetosa de preveni melanoma e canser de selulas scamosa, ma la efeto a la risca de canser de selulas basal no es clar. Canser nonmelanoma es normal remediable. Trata es jeneral par estrae sirujial, ma min comun lo pote inclui radioterapia o medisines surfasal como fluorourasil. Trata de melanoma inclui comun un combina de sirurjia, cemoterapia, e radioterapia. En persones de ci sua maladia ia sperde a otra areas de sua corpos, medisin lejerinte pote es usada per boni la cualia de vive. Melanoma ave un de la frecuentias de survive plu alta entre canseres, con plu ca 86% de persones en la Rena Unida e plu ca 90% de persones en la SUA survivente plu ca sinco anios.
Canser de la pel es la forma de canser la plu comun, con sirca 40% de casos tra la mundo. La tipos la plu comun es la du nonmelanomas, cual aveni en a min du a tre milion persones per anio. Esta es sola un estima cru, car bon statisticas no es bon mantenida. De la nonmelanomas, sirca 80% es de selulas basal e 20% de selulas scamosa. En 2012, sirca 232,000 persones en la mundo ia ave melanoma, cual ia resulta en 55,000 moris. La popla blanca de Australia e Zeland Nova ave la frecuentia la plu grande de melanoma. Tota tre tipos major de canser de la pel ia deveni plu comun en la 20 a 40 anios presedente, spesial en areas en cual la plu de popla es blanca.