Neva
Neva es acua cristal jelada cual presipita de nubes e cumula sur surfases. Lo pertine a acua jelada tra sua sicle de esiste, comensante cuando, en states conveninte, cristales de jela formi en la atmosfera, crese a grandia de sirca un milimetre, presipita, cumula sur surfases, e muta alora en loca, ultima fondente, sublimante o liscante a via.
Nevones developa par nuri se con umidia e aira calda. Flocos crese sirca particulas en la atmosfera par atrae gotetas de acua suprafrida, cual jela como cristales exagon. Flocos developa en formas variosa, como platetas, agos, colonas, e nebla jelada. Cuando la neva cumula, lo pote es soflada per formi dunas de neva. Tra tempo, la neva cumulada muta par compati, par sublima, o par fonde e rejela. Si la clima es tan fria ce lo permete cumula tra la anio, un glasia pote forma. Ma tipal, neva fonde saisonal, fluente a rietas e rios e recargante acua suteran.
La areas con propensas per neva inclui la rejiones polal, la dui superior de la emisfera norde, e la rejiones montaniosa de la mundo cual ave umidia e temperatures sufisinte fria. En la emisfera sude, neva es xef restrinjeda a la areas montaniosa, estra Antartica.
Neva afeta alga ativias umana, como transporta (par crea la nesesa de manteni clar la autovias, la alas de aviones, e la vitros de veculos), cultiva (par furni acua per plantas e bestias), sportes (como sci, etc), e gera (par impedi la move e la manteni de aparatos). Neva afeta ance ecosistemes, par furni un strato isolinte en inverno su cual plantas e animales pote survive la fria.