Paideia

En la cultur de Elas antica, la terma paideia (παιδεία) ia refere a la eleva e educa de la membro ideal de la site (polis). Lo ia inclui la ensenia de cosas pratical e la educa sosial de individuas en sua clase en la site. La aspetas pratical inclui sujetos aora incluida en la area nomida "artes libral" (retorica, gramatica, e filosofia es esemplos), e ance campos siensal como aritmetica e medica. Un membro ideal e susedente en la site ta ave refina inteletal, moral, e fisical; donce, instrui en jinastial e luta ia es valuada per sua efeto sur la corpo, con la educa moral cual la elinicas ia crede ia es aprendeda par la studia de musica, poesia, e filosofia. Esta metodo de eleva un om elinica bon educada ia es comun en la mundo elinica, con la eseta de Sparta, do un forma militar e sever (la agoge) ia es prefereda.

On debe nota ce, en la sivilia elinica, spesial en Atina, tota de esta aplica sola a la sitadanes mas de la aristocratia - no la femes, no sclavos, no campanianes. En la plu casos, los no ia reseta un educa estra stajia o aprende-par-oserva. La capasia per leje e scrive no es comun, estra alga femes de la aristocrata.

La idea de paideia

La elinicas videda paideia como encargada a la clase aristocrata ci ia tende inteleti sua cultur e sua ideas. La cultur e la jovenes ia es "moldida" a la ideal de kalos kagathos ("bela e bon"). Esta idea es simil a lo de la cavalores medieval e la conseta engles de la gentleman ("senior de la aristocratia").

Paideia elinica es la idea de perfeta. La gol ia es permane eselente, cual es nomida arete, la ideal sentral de tota cultur elinica.

En la Iliada, Homer ia mostra la eselentia de la coraje e fortia de la elinicas e la troianes. En la Odisea, el asentua la eselentia de la mente, cual ia es ance nesesada per susede. Arete es un parte de eroisme, la capasia per fasa sua enemis, monstros, e periles de tota tipos, e deveni vinsente.

Esta ideas pote ance es videda en la tende entre la elinicas per reprodui o copia sola lo cual ia es videda como la plu bon en competes de poesia, trajedia, e comedia, e en la Juas Olimpial. An la filosofistes e sua scolas compete per onor e xefia en educa e cultur.

La elinicas ia descrive se como "amores de belia", e los ia es multe atendente a estetica. Los ia vide e valua la bela en natur. Los ia nota la proportio spesial cual los ia nomi la "proportio de oro" (sirca 1.618) e sua reaveni un multe cosas natural e fabricada. Los ia parla sur la nesesa per ecuilibra como la promedia de oro, elejente la media e no ambos estremas - e los crede ce belia no ia es un la cualias surfasal de color, lus, o ombra, ma en la esense de cosas, espresada en strutur, linia, e proportio.

La elinicas ia xerca ecuilibria en tota aspetas de atenta e esperia. La promedia de oro es la espresa de esta prinsipe tra paideia elinica: arciteta, arte, politica, e psicolojia umana.

La filosofiste de paideia la plu respetada ia es Isocrate; el ia aida en causa, par sua paideia, ce Atina deveni un de la sites xef en Elas. Sua gol ia es la construi de un pratica de educa e politica cual pote dona validia en la pratica de democratia, e a la mesma ora, resta respetable inteletal. El ia desira leva sua escutores atinan a la nivel de filosofia par causa ce los aplica un prinsipe de coere inteletal en sua vives. La aspetas fundal de sua paideia ia es la ateni de coere a la niveles individua, sital, e panelinica. Sua paideia ia deveni esensal per la survive de la site tra la identifia de retorica con eselentia political, e la leva de la escutores a la nivel de filosofistes.