Papilios (Lepidoptera, de elinica lepis "scama" e pteron "ala") es un ordina de insetos cual inclui papilios de dia e papilios de note. Sirca 180,000 spesies es descriveda, en 126 familias e 46 suprafamilias, 10% de tota spesies descriveda de viventes. Lo es un de la ordinas de insetos sperdeda la plu vasta e la plu reconosable en la mundo. Los mostra multe varias de sua strutur de corpo cual posible ia evolui per gania la vantajes en stilo de vive e distribui. Estimas resente sujesta ce la ordina pote ave plu spesies ca plu temprana ia pensa.

Papilios es marcada par tre cualias: La plu evidente es sua alas, probosides, e la presente de scamas cual covre sua corpos. La scamas es "capeles" alterada per es plata, e dona la papilios sua varia grande de colores e motifes. Cuasi tota spesies ave alga forma de alas membranosa, esta la poca cual ave alas reduida o es sin alas. Reprodui e la pari de ovos es fada par adultes, normal prosima o sur plantas per la larvas. Como la plu de otra insetos, papilios es "holometabolial", pd los mutaformi completa.

En la sistem de dijesta, la rejion anterior ia es evoluida per forma un pompa sucante, per estra sua comedas, cual es per la plu parte licuidas como netar e sava. La proboside es un boca tubo cual pote estende a un distantia surprendente. No tota papilios ave un proboside: algas ave partes de la boca per rode; otras ave no boca de cualce forma, e no come tra sua adultia.

La larvas es nomida erugas. e es multe diferente de la formas adulte, con corpos silindre con un testa bon developada, bocas con mandibulas, tre duples de gamas de la torax, e de zero a sinco duples de "pro-gamas" En cuando los crese, estas cambia en apare e vade tra un series de fases nomida instares. Cuando tota maturida, la larvas developa a pupas. Alga papilios de dia e multe papilios de note tese un cocon o caxa de seda ante la cambia, e otra no tese los, ma vade su solo. Un pupa de un papilio de dia, nomida un crisalida, ave un pel dur, tipal sin cocon, Cuando la pupa ia completa sua mutaformi, un adulte sesal matur emerji.

Tra miliones de anios, la papilios ia evolui un varia de colores e motifes per sua alas, estendente de la papilios de note, cual es tipal sombre, a la papilios de dia, cual es tipal briliante colorida. Seguente, la papilios de dia es un grupo la plu reconoseda e popular de insetos, con multe persones envolveda en la oserva, studia, colie, eleva, e comersia en esta insetos. Algun ci colie o studia esta ordina es un "lepidopteriste".

Papilios ave un rol importante en la ecosistem natural como polenintes e como comedas en la "cadena de come". Ma sua larvas es videda como multe problemosa per plantas cultivada, car la fonte xef de la nuri de erugas es tipal plantas vivente. En multe spesies, la fema pari de 200 a 600 ovos, e en otras la cuantia pote prosimi 30,000 ovos en un dia. La erugas cual emerji de esta ovos pote causa dana a cuantias grande de recolies. Multe spesies es de interesa economial per sua rol como polenintes, la seda cual los produi, o como pestas.