Abri la menu xef
Parvati
Parvati con Shiva e sua fio Ganesh

Parvati (sanscrito: पार्वती) es la diva indu de fertilia, ama, belia, sposi, enfantes, dedica, e la fortia divin. Conoseda par multe otra nomes e roles. Con Lakshmi e Saraswati, el es parte de la trinia (tridevi) de divas indu la plu importante. Parvata es un de la parolas sanscrito per monte.

Parvati es la sposa de la dio indu Shiva: la protejor, destruor de malia, e rejeneror de la universo. Parvati es la fia de la re de montes Himavan e rea Mena. El es la madre de Kartikeya, Ashokasundari, e Ganesha (la dio de sajia e la vinse de ostacles, con un testa de un elefante).

Un de la nomes de Parvati es Uma, usada per Sati, la sposa prima de Shiva, ci es renaseda como Parvati. El ia es nomida Aparna ("el ci no nuri se") car el ia promete juna sever, ma sua madre ia desconvinse el par dise u ma ("o, no fa lo"). Es es ance nomida Ambika ("madre cara"), Shakti ("potia"), Mataji ("madre adorada"), Mahashwari ("diva grande"), Durga ("nonvincable"), Bhairavi ("ferose"), Bhavani ("fertilia e pare"), Shivaradni ("rea de Shiva"), Kamakshi ("ama e dedica"), e Annapurna ("fertilia, abunda, nuri").

Parvati e Shiva es comun simbolida par un yoni ("utero") e un linga ("penis"). La metafor de yoni e linga represente la fonte de potia, la interata de la enerjias mas e fema, la recrea de tota vive. Parvati e Shiva es comun depintada en formas variosa de uni sesal. Esta simboles es sperdeda tra Asia sude e sude-este.

Con Shiva, Parvati es un divinia sentral en la seto Shaiva. El es la enerjia e potia recreosa de Shiva, e es la causa de un lia cual junta tota esentes, e un modo per sua relasa spirital.

Parvati es presentada como avente du aspetas oposante. Como Parvati mesma, el es representada como un fema dulse, la sposa perfeta, bela e bonvolente. El porta tipal un sari roja, con un banda de testa. Ma como Shakti, pur enerjia, el deveni Kali, un diva negra (o verde) e side per sangue, ci ia destrui un asura (demon). An pos destrui la demon, sua coleria no pote ia es controlada. Per basi sua coler, Shiva ia apari como un bebe plorante. La crias de la bebe ia stimula la natur madral de Kali, ci recambia se como Parvati.