Patxisi es un jua de table de la familia de juas de crusa e sirculo cual ia orijina en India medieval, e cual ia es descriveda como la jua nasional de India. Lo es juada sur un table formida como un crusa simetre. La pesos de un juor move sirca la table, la move fundida sur un lansa de ses (o sete, en alga varias) de concas de cauri. La cuantia de concas con la boca a supra indica la cuantia de cuadros per un move.

Un table de patxisi fabricada de perletas
Patxisi, juada en Tamil Nadu con semes de tamarindo e calculos

La nom de la jua es derivada de la parola hindi paccis, cual sinifia "25", la puntos la plu grande cual pote resulta de un lansa de la concas. Otra varias usa 30 como la lansa la plu grande.

On ave multe varias de la jua:

  • Mens Erger Je Niet: "Person, no irita se" de Nederland
  • Mensch ärgere dich nicht: "Person, no irita se" de Deutxland
    • e nomes simil en otra linguas
  • Fla: "Tal lo es" en Sveria
  • Non t'arrabiare: "No deveni coler" de Italia
  • Petits Chevaux: "Jua de cavalos peti" de Frans
  • Parcheesi, Sorry! Trouble, Aggravation: SUA
  • Ludo: England
  • Parchís: Espania e Magrib norde
  • Parqués: Un varia de Colombia
  • Γκρινιάρης" (Griniaris): "Cexetor" de Elas
  • Ki nevet a végén - "El ci rie a la fini" de Magiar
  • Yunnori: Corea
  • Patolli: Un jua orijinal de la astecas e otra americanes orijinal, ante la ariva de la espanioles

Patxisi es un jua per du, tre, o cuatro juores. Cuatro juores jua tipal en du ecipos, tre juores jua per se mesma. Un ecipo ave pesos jala e negra, la otra ave roja e verde. La ecipo cual move prima tota sua pesos a la fini, gania la jua. Cada juor ave cuatro pesos en la forma de un aberia (creseda asta 16 pesos per ecipo en alga varias). La pesos es distinguida de lunlotra par sua colores: negra, verde, roja, e jala.

La cuantia de cuadros un juor pote move sua pesos es determinada par la lansa de ses concas (sete en alga varias). La cuantia de concas cual cade con sua bucos a supra indica la cuantia de cuadros:

  • 0 - 25 e un plu turno
  • 1 - 10 e un plu turno
  • 2 - 2
  • 3 - 3
  • 4 - 4
  • 5 - 5
  • 6 - 6 e un plu turno

La gol per cada juor es per move tota cuatro pesos completa sirca la table, contra la orolojia, ante sua oposores. La pesos comensa e fini sur la charconi (txarconi, la area en la sentro de la crusa). La ordina de jua es desideda par cada juor lansa la concas. El con la lansa la plu grande comensa la jua, e turnos continua contra orolojia sirca la table.

Si un 6, 10, o 25 resulta de un lansa, la juor gania un "grasia", cual capasi la juor per introdui un de sua pesos de la txarxoni a la table. La juor alora prende un otra turno. La peso prima de cada juor pote sorti de la txarconi de cualce lansa pos cual lo ia es introduida a la table. Cada juor move sua pesos a su la colon sentral de sua braso de la table, e alora move contra orolojia sirca la colones de la crusa. Un juor pote ave cualce cuantia de pesos a la table a un ves. Sola un peso pote es moveda de un sola lansa, o si la juor eleje, el pote refusa move cualce peso pos sua lansa.

Plu ca un peso de la mesma ecipo pote ocupa un cuadro (no vera per alga varias). Ma un peso no pote move a un cuadro de un castel (marcada con un X) si lo es ja ocupada par un peso de un oposor. Si un peso ariva a un cuadro (esetante per un castel) ocupada ja par cualce cuantia de pesos de sua oposor, acel pesos de la oposor es caturada e debe reveni a la txarconi. Pesos caturada pote reentra la jua denova con un lansa de grasia. Un juor ci ia catura acel pesos es permeteda un plu turno.

Un peso completa sua viaja sirca la table par move denova a supra sua colon sentral. Pesos reveninte pote es poneda a sua lado per distingui los de pesos cual ia comensa sua viaja. Un peso pote ariva a la txarconi sola par un lansa esata.

Regulas tipal per la juas moderna edita

 
La table, con flexas cual indica la dirije de la curso

La table es composada de cuadro estendes en la forma de un crus, cada estende con tre colonas, cada colona con oto cuadros. La media de cada colona ave un usa spesial: lo es la coredor a la sorti de la table, plu un cuadro per entra la coredor. La table ave ance cuatro areas nomida nidos a la area abrida entre la estendes. La nidos ave la color de la pesos, diferente per cada juor. Cada juor ave cuatro pesos, e du a cuatro juores pote partisipa. Ance un parte de la jua es du dados de ses lados.

Tota pesos comensa en sua propre nido. Per comensa, un juor debe lansa de dados: si un dado mostra un 1, o un o un soma de la du dados mostra un 6, un de la pesos pote es moveda de la nido a la spasio a la comensa de la coredor de sorti per sua color. On ave alora un otra turno a lansa la dados.

Pos entra, un lansa de la du dados pote move un o du pesos par la cuantia de la dados. On pote move du pesos, cada la cuantia de cuadros de un de la dados, o move un peso la soma de la du dados. Juores debe usa ambos cuantias, si posible. Si no, on debe usa un; e si no ancora, sua turno pasa a la juor a sua destra. La pesos move contra la orolojia. Si un juor lansa un 1 o un 6, e el no vole entra un plu peso, el pote ave un plu turno.

On pote "catura" un peso de un otra juor par fini un move sur la mesma cuadro como acel peso; acel peso es "caturada" e debe reveni a usa nido per comensa ancora. Ma la jua inclui 12 cuadros "secur", de cual un peso no pote es caturada. Estas es tipal indicada par un X o un desinia como un flor. La cuadros secur:

  • cada cuadro a la comensa de la coredor de sorti de cada juor;
  • la du cuadros cuatro (o sinco) cuadros a via de la cuadros de entra e sorti.

La sete cuadros de la coredor mesma pote es usada sola par la juor ci posese la coredor. Cuando un juor ia entra sua propre coredor, el nesesa un cuantia esata a la dados (a un dado, o la soma de la du). La juor ci ia move tota sua cuatro pesos de la coredor ia gania la jua. Con plu ca du juores, la otras pote continua per vide ci es juor du o an tre, o los pote comensa un jua nova.