Persegue de paganes en la Impero Roman tarda

La persegue de paganes en la Impero Roman tarda ia comensa durante la rena de Constantino la Grande, cuando lo ia comanda la saca e destrui de alga templos. La leges anti-pagan prima de la stato cristian ia comensa con la fio de Constantino, Constantino 2, ci ia es un oposor forte de paganisme; el ia comanda la clui de tota templos pagan, la proibi de sacrifias pagan con la puni de mori, e la estrae de la Altar de la Vinse de la Senato. Durante sua rena, cristianes ia comensa ataca la templos antica e la tombas e monumentos pagan. Esta persegue ia es presededa par la persegue nonperiodal de cristianes.

Entre 361 e 375, paganisme ia es partal tolerada. Tre imperores (Gratiano, Valentiniano 2 e Teodosio 1) ia es influeda par la bispo de Milano, Ambrosio. Seguente sua sujesta, la politicas antipaganisme de la stato ia es reinstituida. Como un repentor su la cura de Ambrosio, Teodosio ia es influeda per proclama la "Comandas Teodosian" de 391. Gratiano ance ia sutrae la Altar de Vinse per ves du. La vestales ia es desbandida e la asede a templos pagan ia es proibida.

En sua vive, Constantino ia deveni plu cristian e ia separa de tendes sincretica cual a veses apare ce el ia favore, donce demostrante, seguente sua biografistes, ce "La Dio de la cristianes es vera un dio jelosa ci no tolera otra en ajunta a el. La Eglesa nunca pote reconose ce el es en la mesma nivel ca otra relijios, el ia concista per el mesma un domina pos otra".

An si Constantino ia desira cristiani la stato, lo no ia conveni el car la cristianes ia resta un sinci de la popla en la ueste e un dui en la este.