Pieter Bruegel la joven

Pieter Bruegel la Joven (nederlandes: [ˈpitər ˈbrøːɣəl]; nase entre 23 maio e 10 otobre 1564 – mori entre marto e maio 1638) ia es un depintor flames, conoseda per sua multe copias de la obras de sua padre, en ajunta a sua propre composas orijinal. La produi grande de sua studio, produida per la mercato local e per esporta, ia contribui a la efeto internasional de la obras de sua padre

Desinia de Pieter Bruegel la joven, par Antoon van Dijk
Vista en inverno par Bruegel la joven

Pieter ia es naseda en Bruxelles, la fio la plu vea de la depintor famosa Pieter Bruegel la vea e Mayden Coecke van Aelst. Sua padre ia mori en 1569, cuando Pieter ia ave ia sinco anios. Seguente la mori de sua madre en 1578, Pieter e sua frate Jan Bruegel la vea e sore Marie Bruegel, ia vade abita con sua ava Mayken Verhulst. El ia es la vidua de la artiste Pieter Coecke van Aelst, e ia es un artiste susedosa par sua mesma, conoseda per sua depintas miniatur. Seguente la biografiste flames Karel van Mander, la ava ia es posible la instruor prima de sua netos.

La familia ia reloca a Antwerp alga tempo pos 1578, e Pieter ia entre posible la studio de la depintor de vistas Gillis van Coninxloo (544–1607). Sua instruor ia departe de Antwerp en 1585 e, en la rejistras de la sindicato de San Luca de 584/1585, Pieter es listada como un mestre autonom.

A 5 novembre 1588, Pieter ia sposi Elisabeth Goddelet. La du ia ave sete enfantes, multe de cual ia mori joven. Un fio (Pieter Bruegel 3) ia es ance un depintor. Pieter Bruegel la joven ia maneja un studio grande en Antwerp cual ia produi xef copias noncara de la obras de sua padre per vende e esporta. An tal, el ia es comun en difisilias finansial, posible la resulta de bevi esedente. El ia ave a min nove studiantes, incluinte Frans Snyders e Andries Daniels.

Pieter Bruegel la joven ia mori en Antwerp, con 72 anios.