Pino
Un pino es cualce conifer en la jenera Pinus de la familia Pinaceae. La lista de plantas composada par la Jardines Botanica Real e la Jardin Botanica de Missouri aseta 126 nomes de spesies corente, con 35 spesies posible.
Pinos es sempreverde, conifer, e resinosa cual crese tipal entre 3 e 80 m alta, con la majoria ateninte 15 - 45 m. La plu peti es la pino nanin de Sibir e la pino Potosi, e la plu alta es un 81.79 m pino Ponderosa locada en la Foresta Nasional de Rio Rogue e Siskiyou en Oregon sude.
Pinos pote vive per multe anios, tipal ateni edas de 100 a 1000 anios, e algas an plu. Lo pino la plu vea es la pino bristlecone de la Basin Grande en la SUA, Pinus longaeva. Un de esta spesie, nomida Metusela, es un de la organismes la plu vea, con sirca 4600 anios. Esta arbor es trovada en la Montes Blanca de California.
La crese spiral de ramos, agos, e scamas de conos pote es ordinada en proportios de Fibonacci. La rametas nova de primavera es a veses nomida "candelas". Los es covreda con scamas brun o blancin de brotos cual punta a supra a prima, e alora deveni verde e sperde a estra. Estas ofre forestores un modo per valua la fertilia de la solo e la enerjia de la arbores.
Pinos es entre la spesies de arbores la plu importante a comersia, valuada per sua lenio e pulpa tra la mundo. En rejiones tempera e tropical, los produi lenio mol e rapida cresente cual crese en grupos relativa densa, e sua agos asida cual putri sur la solo retarda la jerme de arbores con lenio dur competente. Pinos comersial es creseda en cultiverias per lenio cual es plu densa e donce plu durante ca pisea. La lenio de pinos es usada en mobilas, paneles, solos, e tetos, e la resina de alga spesies es un fonte importante de terebentin.