Plasentales es un de la tre sudivides esistente de la clase de animales Mammalia (mamales); la otra du es monotremes e marsupiales. La plasentales es distinguida partal de otra mamales car la feto es portada en la utero de sua madre a un paso relativa tarda de developa. La nom es un poca noncoreta, car marsupiales nuri ance sua fetos par un plasenta, ma per un periodo relativa plu corta, pare enfantes min developada ci es alora tenida per un periodo en la pox de la madre.

Mamales plasental

Mamales plasental es distinguida en sua anatomia de otra mamales par:

  • Un abrida sufisinte larga a la fondo de la pelvis per permete la pare de un bebe grande relativa a la grandia de la madre.
  • La manca de osos epipubica estendente a ante de la pelvis, cual es trovada en tota otra mamales. (Sua funsiona en mamales nonplasental es per rijidi la corpo en move, ma en plasentales los ta inibi la estende de la adomen en ensinta.)
  • La osos a la dorso de la pede cabe en un caveta formida par la finis de la tibia e fibula, forminte un junta a la talo alta como un mortasa e protende.
  • La esiste de un maleolo a la funda de la fibula.

La plasenta es un organo tempora cual lia la feto developante par la corda ombilico a la mur de la utero per permete la asorbe de nuri, regula de caldia, elimina de dejeta, intercambia de gas par la reserva de sangue de la madre, combate infetas interna, e produi ormones cual suporta ensinta. Plasentas es la marca defininte de mamales plasental, ma los es ance trovada en marsupiales e alga non-mamales a grados variante de developa.

La plasenta funsiona como un organo feto-madral con du composantes: la plasenta fetal, cual developa de la mesma blastosite cual formi la feto, e la plasenta madral, cual developa de la texedas de la utero de la madre. Lo metaboli un cuantia de sustantias e pote relasa produidas metabolal en la sangue de la madre o la feto. La plasenta es espulsada en la pare de la feto.