Pocer

Pocer es un familia de juas de cartes en cual juores aposta sur cual "mano" de cartes es la plu valuada seguente la regulas de acel varia. La usa de un paceta de 52 cartes es la plu comun, ma la distribui de cartes e si los es esposada o ascondeda, e la cuantia de los pote varia. Pocer ia es developada en la sentenio 19 temprana en la SUA. De alora, lo ia deveni un jua multe popular tra la mundo.

Marinores juante en un torneo de pocer

En la plu de varias, un aposta de un cuantia fisada es donada a la "pox" par cada juor, ante la distribui de cartes. Lo es nomida "la ante". Pos la distribui de cartes, la juores pote aposta plu, la cuantia tipal dependente de la valua relativa divinida par la juor. La juor a la sinistra alora aposta la mesma cuando ("me vide tu"), o (en la plu de varias) crese la aposta ("me vide e leva tu"), o abandona sua turno e lasa sua carte fas a su sur la table ("me clui"). La apostas continua asta sola no plu "levas" aveni, a cuando la cartes de juores ci ia "vide" es revelada (la "mostra"), e lo cual es la plu valuada gania la fixes apostada. En cualce casos, tota juores vide estra un; en acel caso, la un ancora en la jua gania la apostadas, sin an esposa sua cartes. En alga juas, juores continua leva o vide an si los teni cartes inferior (un "finje"), en la espera ce la otras pensa ce el ave un mano plu bon e comensa clui.

Valuas de manos

La cartes cual un juor teni es valuada en esta ordina (de la plu valuada a la min valuada):

• "Sincuple", per esemplo [A♥ A♦ A♣ A♠ B]. Nota ce estas es posible sola cuando bufones (B) es incluida en a jua.
• "Un scala real" es un segue de la as, re, rea, pajo e des, en ordina de la mesma familia, pe [A♦ K♦ Q♦ J♦ 10♦].
• "Un scala de familia" conteni sinco cartes de valua en ordina, tota de la mesma familia, pe [Q♥ J♥ 10♥ 9♥ 8♥].
• "Cuatruple", cuatro de un valua, pe [7♥ 7♦ 7♠ 7♣] Q♥.
• "Un casa plen", tre cartes de un valua plu de cartes de un valua (otra ca la tre), pe [3♣ 3♠ 3♦] [6♣ 6♥]
• "Un familia" es sinco cartes de la mesma familia, an si no es un segue, pe [K♣ 10♣ 7♣ 6♣ 4♣]
• "Un scala" es sinco cartes de valua seguente, an si no de la mesma familia, pe [7♣ 6♠ 5♠ 4♥ 3♥]
• "Truple", tre de un valua, pe [2♦ 2♠ 2♣] K♠ 6♥
• "Du duples" conteni du cartes de un valua e du de un otra valua, e un plu, pe [J♥ J♣] [4♣ 4♠] 9♥
• "Un duple" conteni sola du cartes de un valua, e tre otra cartes, pe [4♥ 4♠] K♠ 10♦ 5♠
• "Alta carte" no conteni cualce de la formas a supra, ma es valuada sola par la carte alta, pe [K♥] J♥ 8♣ 7♦ 4♠

Si plu ca un juor teni cartes de la mesma valua, el ci teni la carte la plu valuada gania:

• K♦ J♦ 9♦ 6♦ 4♦ es plu valuada ca Q♣ J♣ 7♣ 6♣ 5♣.

En cuatruples, truples, e duples, lo es la carte la plu valuada de la tipo cual gania:

• K♠ K♥ K♣ K♦ 3♥ es plu valuada ca 7♥ 7♦ 7♠ 7♣ Q♥;

Si du juores no difere ancora, la carte la plu valuada estra la tipo gania:

• 7♥ 7♦ 7♠ 7♣ Q♥ es plu valuada ca 7♥ 7♦ 7♠ 7♣ 10♠.

Si la du manos de cartes difere sola par familias, los es egal:

• 9♣ 8♣ 7♣ 6♦ 5♦ e 9♠ 8♠ 7♠ 6♥ 5♥ es de un valua egal.

Varias

Liv Boeree, un de la plu bon juores de pocer

Estra un cuantia peti de varias en cual la juor con la mano la min valuada gania, pocer ave varias cual pote es ordinada en esta categorias:

Pocer simple: Un mano completa es distribuida a cada juores e la juores aposta en un curso, con leva e re-leva permeteda. Esta es la varia de pocer la plu vea, conoseda como "primero". Ma pocer es cuasi sempre juada en formas plu complicada per permete plu stratejia.

Pocer de descovre: Cartes es distribuida en un combina preordinada de cursos con fas a su e cursos de fas a sura, con aposta seguente cada distribui. La plu popular varia de esta tipo es lo de sete cartes: Tre cartes es distribuida a cada juor, e alora sinco, de cual on debe crea la mano de sinco cartes la plu bon.

Pocer de desprende: Un mano completa es distribuida a cada juor, tota con fas a su. Pos un curso de aposta, juores es permeteda per atenta boni sua cartes par desprende la cartes nondesirada e reseta la mesma cuantia de cartes nova. La juores tipal acorda como multe cartes pote es intercambiada. Plu comun, lo es restrinjeda a tre. Pos la intercambia, un otra curso de aposta aveni, pos cual tota cartes es revelada. La juor con la mano de la plu valua gania.

Pocer de cartes comunial: Juores reseta un mano noncompleta de cartes, fasante a su, e alora un cuantia de cartes comunial es distribuida a la sentro de la table. Cada de esta cartes pote es usada per crea un mano de sinco cartes. Texas hold 'em ("Texas teni los") es un de la plu comun de esta familia: Du cartes es distribuida a cada juor. Alora, tre cartes (fas a supra) es distribuida como la cartes comunial; alora, un carte cuatro es distribuida a la cartes comunial (fas a supra); e final, un carte sinco es distribuida ala (fas a supra). La juores usa sua cartes e tan multe de la otras nesesada, con la intende de crea la mano la plu bon. (Nota ce on pote usa ambos sua propre cartes, sola un, o an nun - pd usa sola la sinco cartes comunial!) Apostas aveni pos cualce distribui.