Popla
Un popla es un grupo de persones con alga grado de coere de cualias, e un grado de separa de otra grupos.
Un esemplo simple es un nasion, cual ave la cualias coerente de un governa, un teritorio con bordas, un militaria per manteni esta bordas e pas interna, e probable un senti de inclui.
Un otra esemplo es la idea antropolojial de la tribu, definida como un divide sosial en sosias tradisional, composada de familias o comunias con lias sosial, economial, relijial o familial, con cultur e dialeto comun, e tipal con un xef o xefes reconoseda
Un cultur es un terma jeneral cual inclui la condui e normas de un sosia uman, e la sabia, credes, artes, leges, capasias, e abitas de la individuas de la grupo; la modo en cual un person en un grupo gida sua vive.
Un otra esemplo es un etnico. Un etnico es un grupo de persones ci identifia con lunlotra, fundida sur similes cultural. Esta senti de comunia pote es fundida sur un colie de cosas:
- Tradisiones comun, como un istoria, un nara de orijin, cosina tradisional, vestes, selebras, arte, musica, dansa, e leteratur.
- Un lingua o dialeto, o colie de linguas relatada, e un modo de scrive comun.
- Un relijio o seto, inclui esentes spirital, rituas spesial, dias de festa, libros santa, e mitolojia, o a min un filosofia pratical.
- Un comunalia de aspeta fisical, spesial los cual es fundida en jenetica, comun videda como un caso de raza (an si la conseta es dutable).
- Un pais, teritorio, rejion, cual dona un senti de coere e autorespeta, como un nasion o rena.
No tota de estas es nesesada per defini un etnico, ma lo tipal conteni alga de los. Un popla es comun ance un etnico, e, en alga filosofias politica de oji, popla, etnico, e nasion es confondeda.