Portland, Oregon
Portland, Oregon es un site en la stato de Oregon, SUA. Lo es la seja de la contia de Multnomah, ma la teritorio de la site estende a alga partes peti de la contias de Clackamas e Washington.
|
Portland | |||
|---|---|---|---|
| |||
| Pais | SUA | ||
| Rejion | Oregon | ||
| Area | 376 km2 km² | ||
| Popla | 583 776 ab. (2010) | ||
| Densia | 1,689.2/km2 abitores/km² | ||
 | |||
La cuantia de abitores de la site ia es 583 776 en 2010, en un area de 375,78 cilometres cuadrida.
La site de Portland ia es corporada a 8 febrero 1851. Lo ia es nomida per la site de Portland, Maine, cual ia es la orijina de Francis Pettygrove, un de la fundores de la vila nova en Oregon.
Jeografia edita
Portland es en la vale Willamette a la conflue de la rios Willamette e Columbia.
Sudivides dirijal de Portland edita
Portland es divideda en sinco "cuatrimes": la Norde, la Norde-este, la Sude-este, la Sude-ueste e la Norde-ueste. La strada Burnside divide la norde de la sude, e la rio Willamette divide la este de la ueste. La lado norde-este de la Willamette es plu divideda en la lado a ueste de la via Williams (la Norde) e la lado a este de la via Williams (la Norde-este). Adirijes en Portland inclui sempre esta indica de dirije.
Per esemplo:
| Adrije | Loca |
|---|---|
|
Ofisia de site 1221 SW Fourth Avenue (1221, la via cuatro sude-ueste) |
Ueste de la rio Willamette, Sude de la strada Burnside |
|
Museo Oregon de siensa e industria 1945 SE Water Avenue (1945, la via de Acua sude-este) |
Este de la rio Willamette, Sude de la strada Burnside Este de la via Williams |
|
Ramo Norde-Ueste, Biblioteca de contia Multnomah 2300 NW Thurman Street (2300, strada Thurman norde-ueste) |
Ueste de la rio Willamette, Norde de la strada Burnside |
|
Ofisias de la stato de Oregon 800 NE Oregon Street (800, strada Oregon norde-este) |
Este de la rio Willamette, Norde de la strada Burnside, Este de la via Williams |
|
Universia de Portland 5000 N Willamette Boulevard (5000, bolevar Uilamet norde) |
Este de la rio Willamette, Norde de la strada Burnside, Ueste de la via Williams |
|
Nota bon: Alga partes de Portland sud-ueste ave un numero cual comensa con zero. Esta adrije debe no omete la zero, e lo debe no es confusada con la adrije sin la zero. Colejio Lewis e Clark 0615 SW Palatine Hill Road (0615, rua de colina Palatin, sud-ueste) (NO es 615 SW Palatine Hill Road) |
Ueste de la rio Willamette, Sude de la strada Burnside, Este de la via Naito (autovia 99W) |
Visinerias edita
Ave sete unis de visinerias en Portland, e la site es plu divideda en 95 visinerias.
Areas de comersia edita
Alga areas de comersia ia formi asosias de comersia areal .
Politica e governa munisipal edita
La maior de Portland es Charlie Hales (elejeda en 2012). La potia de lege e manejal de la governa munisipal es eserseda par la Consilio de la Site, cual ave un maior e cuatro otra membros. Cada membro de la consilio dirije ance buros de la governa munisipal.
Membros de la Consilio e la Esaminor Munisipal de la Site de Portland (2013) edita
| Membro | Elejeda en | Buros asiniada |
|---|---|---|
| Charlie Hales | 2012 | buro de polisia (PPB), encargada de developa (PDC), buro de urbanisme e sustable (BPS), ofisia de pension de polisia e pompor, ofisia de envolve visineria (ONI), ofisia de justia e direto umana (OEHR), ofisia de dirije e finansia (OMF), ofisia de relata intergovernal, ofisia de la avocato munisipal, ofisia de proposa munisipal (CBO) |
| Nick Fish | 2008 | buro de servi ambiental (BES), buro de acua (PWB), buro de idroelectrica, Consilio Rejional de Artes e Cultur (RACC) |
| Amanda Fritz | 2008 | buro de parces e recrea (PP&R), buro de servi de developa (BDS) |
| Steve Novick | 2012 | buro de transporta (PBOT), buro de dirije de urjente (PBEM), buro de comunica de urjente (9-1-1) |
| Dan Saltzman | 1998 | buro de caxa (PHB), buro de pompor e salva (PF&R), la Sentro Gateway, la Funda de Investi en Enfantes de Portland |
| Lavonne Griffin-Valade, esaminor munisipal | 2009 |
arcivo munisipal, dirije de elejes munisipal, esamina finansial, Consilio Autonom de Revista de Polisia (IPR), servi ombudsman * La esaminor munisipal no ave seja en la Consilio munisipal, ma es elejeda par la abitantes de la site de Portland. |
| Nom | Periodo |
|---|---|
| Sam Adams | 2009-2012 |
| Tom Potter | 2005-2008 |
| Vera Katz | 1993-2005 |
| John Elwood "Bud" Clark | 1985-1992 |
| Frank J. Ivancie | 1981-1984 |
| Connie McCready | 1979-1981 |
| Neil Goldschmidt | 1973-1979 |
Ativisme e envolve sivil edita
Portland es bon conoseda como un site de ativisme e protestas frecuente. George H. W. Bush, un presidente pasada de la SUA, ia descrive Portland como "Beirut peti" pos vide un protesta grande contra Bush major. Causas ambientiste e antigeral atrae sempre un fola grande.
Anarcisme e sindicatisme es ance causas popular en Portland. La sindicato Laborores industrial de la mundo (IWW -- Industrial Workers of the World) ave un ramo grande de membros jeneral, e posese ance un restorante Red & Black Cafe.
La move Ocupa ia ave un campa masosa en la parces Lownsdale, Chapman e Terry Schrunk en la sentro de site, en la autono de 2011. On ia reporta ce la campa ia es la plu grande (sirca 10,000 ia marxa en alga protestas, sirca 500 a 800 ia campa) en la mundo. Pos la esclui de la Ocupa de la parces, alga Ocupores ia continua un campeta a fronte de la ofisia de site tra 600 dias, asta la maior Charlie Hales ia esclui los.
La Projeta de bus (The Bus Project) ia comensa en Portland par Jefferson Smith. La projeta aida persones a enscrive se per vota.
Elejes resente edita
En la eleje jeneral de 6 novembre 2012, plu ca 70 persentos de votores ia vota per Barack Obama (75,37% de la contia Multnomah, incluinte Portland e otras sites e areas noncorporada). La votores de Portland ia eleje ance un maior e un membro de la consilio munisipal en esta eleje:
| aspiror maioral | conta de vota | persent |
|---|---|---|
| Charlie Hales | 163 522 | 61.18% |
| Jefferson Smith | 83 741 | 31.33% |
| otras | 20 039 | 7.50% |
| aspiror de membro consilial, seja 1 | conta de vota | persent |
|---|---|---|
| Amanda Fritz | 140 400 | 59.19% |
| Mary Nolan | 94 440 | 39.81% |
| otras | 2 372 | 1.00% |
Relatas internasional edita
Japan e Mexico ave se ofisias de consul en Portland:
- Consuleria de Mexico en Portland
- Ofisia consulal de Japan en Portland (un ramo de la Consuleria jeneral de Japan en Seattle )
Otra paises servi Portland en se consulerias en Seattle, San Francisco, o Los Angeles.
Soria de sites (sites jemelo) edita
Portland e alga sites stranjer ia formi relatas de soria entre se.
| site e provinse | pais | ia conclui la acorda a: |
|---|---|---|
| Sapporo, Hokkaido | Japan | 17 novembre 1959 |
| Guadalajara, Jalisco | Mexico | 23 setembre 1983 |
| Ashkelon | Israel | 13 otobre 1987 |
| Ulsan | Corea Sude | 20 novembre 1987 |
| Suzhou, Jiangsu | Republica popular de Xina | 7 junio 1988 |
| Khabarovsk, Khabarovsk | Rusia | 10 junio 1988 |
| Gaoxiong | Republica de Xina | 11 otobre 1988 |
| Mutare, Manicaland | Zimbabue | 18 desenbre 1991 |
| Bologna, Emilia-Romagna | Italia | 5 junio 2003 |
| Utrecht | Nederland | 17 desembre 2012 |
Cultur edita
Entre otras, Portland es bon conoseda como un vila de la cultur de bricola ("DIY"), punk e la hipster. Ance, la cultur local de Portland es definida per sua ama de natur, consensia ecolojial, e un misca de orienta comunial e orienta individualiste.
Artes edita
En Portland multe galerias de artes es consentrada prosima a la distrito de Perla (Pearl District), strada Alberta Norde-Este (Northeast Alberta Street), e la Lado Este-Sentral (Central Eastside). La salones de conserta Arlene Schnitzer, Paramount, e la Keller en la sentro de site, e la Cuatro de Rosa (Rose Quarter) en la distrito Lloyd es do multe conserta de musica aveni.
Comeda e bevida edita
Portland ave multe caretas de comeria (foodcarts ) sur alga parces (foodcart pods ) tra la vila. La caretas es multe popular. Portland es ance bon conoseda como un site de multe microbilerias e rosterias de cafe.
Cultures etnico edita
Diseda par la conta nasional de abitores en 2010, 76,1 persentos de la abitores de Portland es de orijina european, o blanca. Portland no ave comunes etnico grande. An tal, ave alga peti comunia etnico en la site:
- American african e diaspora african (xef itiopian e somali) longo la Nolevar de Martin Luther King, Jr. norde-este e strada Killingsworth norde.
- Mexican e latina longo strada Lombard norde.
- Viet e Tai longo bolevar Sandy norde-este.
- Xines longo la via 82 sud-este.
Parces e jardines edita
Jardines e parces istorial es tesoros de Portland. En la lado ueste de la site, la Parce de Foresta (Forest Park) e la Parce Washington es du parces grande sur la inclina de la Cadena Tualatin, e es conoseda como la parces urban la plu grande en la SUA. En la lado este de Portland, la Parce de Monte Tabor ave un volcan vive.
On ave du jardines de rosa en Portland, en la Parce Penisola (la jardin vea de rosa) en Portland norde, e la Parce Washington (la Jardin Internasional de Rosa). La jardin japanes grande es ance en la Parce Washington, cual Hirohito, la imperor Xoua de Japan, ia descrive como la "jardin japanes la plu bon estra Japan". En la vea vileta xines de Portland es la jardin xines clasica Lansu 兰苏园 (la nom "Lansu" 兰苏 un combina de la letera xines Lan 兰 -- de la nom xines de Portland, Botelan 波特兰 -- e Su 苏, de Suzhou 苏州, la site jemelo de Portland en Xina).
La Arboreria Hoyt es un parte de la Parce Washington. La arboreria dise ce lo ave tota species arboral de Oregon.
La sentro de site de Portland ave alga "blocos de parce" (park blocks), e un grande parce longo de la rio Willamette.
Transporta edita
Autovias en Portland edita
- La autovia Minnesota -- autovia interstatal 5 (a Vancouver WA, Olympia, Tacoma, Seattle, Everett, Bellingham, e Vancouver CB).
- La autovia Baldock -- autovia interstatal 5 (a Tualatin, Wilsonville, Salem, Eugene, Medford, Ashland, e California)
- La autovia Banfield -- autovia interstatal 84 (a Hood River, Pendleton, Baker City, Ontario, e Boise, Idaho)
- La autovia memorial de veterans -- autovia interstatal 205 (a Salmon Creek, Fisher's Landing, Clackamas, West Linn e Wilsonville)
- La autovia de la stadion -- autovia interstatal 405 (tra la sentro de site de Portland entre la Universia Statal de Portland e la ponte Fremont)
- La bolevar Barbur -- autovia statal 99W (a Tigard, Sherwood, e McMinnville)
- La autovia Beaverton-Hillsdale -- autovia statal 10 (a Beaverton e Hillsboro)
- La autovia Oswego -- autovia statal 43 (a Lake Oswego, West Linn, e Oregon City)
- La autovia Cascades/la via 82 este -- autovia statal 213 (a la Airoporto internasional de Portland, e Clackamas)
- La autovia Sunset -- autovia federal 26 (a Hillsboro, e Seaside)
- La autovia Saint Helens -- autovia federal 30 (a Scappoose, Saint Helens, e Astoria)
- La autovia Monte Hood/bolevar Powell sude-este -- autovia federal 26 (a Sandy, Monte Hood, John Day, e Ontario)
Avion edita
La Airoporto internasional de Portland (PDX) es la airoporto xef de la area.
Feroviales edita
La feroviales Union Pacific, BNSF, Portland & Western, e Oregon Pacific ave reles en Portland.
Amtrak servi Portland con la servis de pasajor Amtrak Cascades (entre Vancouver, Columbia Brites e Eugene-Springfield, Oregon), e la Coast Starlight (entre Seattle, Washington e Los Angeles, California)
La Distrito de transporta urban tricontial de Oregon (Tri-County Metropolitan Transportation District of Oregon), o TriMet , ave cuatro linias de reles lejera "MAX" (Metropolitan Area Express):
- Linia Azul: entre Hillsboro Hatfield e Gresham Cleveland, tra la Parce Washington, sentro de site, distrito Hollywood, distrito Gateway, e visina Rockwood
- Linia Roja: entre Beaverton e la Airoporto internasional de Portland, tra Hollywood, Gateway, e Parkrose
- Linia Jala: entre la Universia Statal de Portland e la Sentro de esibi (Expo Center), tra la Stasion Uni (Union Station), Rose Quarter, e via Interstate norde
- Linia Verde: entre la Universia Statal de Portland e la sentro comersial Clackamas Town Center, tra la Stasion Uni, Rose Quarter, Gateway, e Lents
La governa munisipal de Portland ia construi la Tram Portland (Portland Streetcar) en la visinas sentral de Portland:
- Linia NS (norde-sude): entre la via 23 en la visina Nob Hill e la strada Lowell en la visina South Waterfront, tra la distrito de Perla, la sentro de site, USP, e Riverplace.
- Linia CL (anelo sentral): entre la USP e la Museo Oregon de siensa e industria (la "anelo" es noncompleta), tra la sentro de site, la distrito de Perla, la ponte Broadway, Rose Quarter, la distrito Lloyd, e la Lado Este-Sentral.
Bus edita
- TriMet opera un sistem de bus urban, e en la site, e entre Portland e areas suburban.
- C-TRAN (La Autoria de area de benefica transportal publica de la contia de Clark, Clark County Public Transit Benefit Area Authority) opera alga vias de bus entre Portland e Vancouver, Washington.
- SMART (Transporta rejional de la area urban sude, South Metro Area Regional Transit) ave un via de bus entre la sentro de transporta Barbur (en Portland sude-ueste sur bolevar Barbur) e Wilsonville.
- CC Rider de la contia de Columbia ave un servi de bus a Scappoose e Saint Helens.
- Transporta publica de la contia de Tillamook furni un servi de bus entre Portland e Tillamook.
- Central Oregon Breeze servi entre Portland e Bend.
- HUT Shuttle opera un via de bus entre la Airoporto internasional de Portland e Salem.
- BoltBus es un servi interurban entre Portland, Seattle, Bellingham e Vancouver, Colombia Brites.
- La stasion Greyhound es prosima a la stasion Amtrak, e ave multe vias interurban de Portland.
- La buses Amtrak Thruway aumenta lo servis ferovial con alga buses.
Bisicle edita
Bisicle es un bon modo de transporta en Portland. Alga organizas per siclisme esiste en la site, como la Alia de Transporta Bisiclal (Bicycle Transportation Alliance) e la club "Portland Wheelmen".
La governa musipal, rejional e statal finansia e suporta la transporta con bisicles.
Instrui edita
Portland ave alga universias, ambos publica e privata:
- PSU - Universia statal de Portland (publica)
- OHSU - Universia sania e siensa de Oregon (publica)
- UP - Universia de Portland (privata, catolica)
- UOP - Universia de Oregon-Portland (publica)
- Universia Concordia Portland (privata, luteran)
- Universia de Multnomah (privata, evanjelica)
- UWS - Universia de statos ueste (privata, secular)
- Colejio Reed (privata, secular)
- Colejio Lewis e Clark (privata, secular)
- WPC - Colejio Warner de Pasifica (privata, Eglesa de Dio de Anderson, Indiana - evanjelica)
- NCNM - Colejio nasional de medica natural (privata, secular)
- OCOM - Colejio Oregon de medica este (privata, secular)
- Colejio Linfield-Portland (privata, batiste)
- PNCA - Colejio de artes de la Norde-Ueste de Pasifica (privata, secular)
- AI-Portland - Institui de artes de Portland (privata, secular)
- PCC - Colejio comunial de Portland (publica, programas de du anios)
Sporte edita
Portland ave un ecipo profesal major de futbal, la Portland Timbers ("la lenios") en la stadion Jeld-Wen Field, e un ecipo profesal major de bascetbal, la Portland Trailblazers ("la esplorores de rueta") en la stadion Moda Center en la Rose Quarter.
Portland es ance conoseda per ecipos profesal de roler-derbi (un compete con patin de rotas) la Rose City Rollers ("la rotas de la site de rosa"), e un ecipo fema de futbal profesal, la Portland Thorns ("la spinas").
La Universia Statal de Portland ave alga ecipos atletal, como de futbol american, bascetbal e golf. Los es nomida la Vikings ("vicinges").
Siclisme en Portland es multe popular. On ave multe stradas "Vias Verde de Visineria" (Neighborhood Greenways) e ruetas de bisicles tra la site. Alga ruetas de bisicles, incluinte la rueta Springwater, formi la Anelo de 40 Milias (40 Mile Loop).
En cultur popular edita
Portland es la sujeto de un comedia televisada Portlandia, cual es un satira de la cultur bizara de esta vila.
Alga sinemas e dramas televisada ia es filmada en Portland, como Leverage, What the bleep do we know?!, Jackass: the movie, The hunted (con Benicio del Toro), Pay it forward, Men of honor, etc.