Carl Jung edita

 
Carl Jung

Freud ia dise ce la gol de terapia es per trae la suconsensa a la consensa. El ia es serta la gol de sua labora como un teoriste. An tal, el ia developa un idea de la suconsensa multe nonplasente, a min. Lo es un calderon de desiras turbante, un cava sin fonda de desiras pervertida e insestal, un tomba per esperias temente cual reveni per infesta nosa sonias. Franca, lo no sona como alga cosa ce on ta desira per sua consensa.

Un asosior joven de Freud nomida Carl Jung, ia adota la esplora de esta "spasio interna" per sua labora de vive. El ia vade con un educa en teoria freudian, natural, con un sabe parente nonfinita de mitolojia, relijio, e filosofia. Jung ia es spesial sabente en la simbolisme de tradisiones mistica complicada como gnosticisme, alcimica, cabala, e tradisiones simil en induisme e budisme. Si cualcun pote investiga la suconsensa e sua abitua de revela se sola en formas simbolin, el ta es Carl Jung.

El ia ave, en ajunta, un capasia per sonia clar e, a veses, revelas mistica (o alusinas). En la autono de 1913, el ia ave un revela de un inonda monstrin sumerjinte la plu de Europa, e lecante a la montanias de sua propre pais, Suiz. El ia vide miles de persones inonda e sivilia ruina. Alora, la acuas ia cambia a sangue. Esta revela ia es segueda, en la semanas seguente, par sonias de invernos eterna e rios de sangue. El ia teme ce el deveni psicosica.

Ma a 1 agosto de acel anio, la Gera Mundal 1 ia comensa. Jung ia senti ce sua sonia e la gera ia es liada en alga modo, e entre el como un individua e umania jeneral, cual no pote es esplicada a via. De alora asta 1928, el ia vade tra un prosede dolente de autoesplora cual ia formi la funda de tota de sua teorias plu tarda.

El ia recorda atendente sua sonias, fantasia, e revelas, e ia desinia, depinta, e sculta los ance. El ia trova ce sua esperias tende forma se como persones, comensa con un om vea e saja e sua acompanior, un xica peti. La om vea e saja ia evolui, tra un cuantia de sonias, a un tipo de guru spirital. La xica peti ia deveni "anima", la spirito fema, ci ia servi como sua media xef de comunica con la aspetas plu basa de sua suconsensa.

Un nano brun e cuorin ia mostra se, gardante la entra a la suconsensa. El ia es la "ombra", un acompanior primitiva per la ego de Jung. Jung ia sonia ce el e la nano ia mata un joven blonde e bela, ci Jung ia nomi Siegfried. Per Jung, esta ia representa un averti de la peril de la adora de gloria e eroisme cual ta causa pronto tan multe triste tra tota Europa - e un averti sur la peril de alga de sua propre tendes a adora de eroes, pd de Sigmund Freud!

Jung ia sonia multe sur la mor, la pais de la mor, e la leva de la mor. Estas representa la suconsensa mesma - no la suconsensa personal de "peti" cual Freud ta fa un cosa tan spesial, ma un suconsensa nova, coletiva, de umania mesma, un suconsensa cual pote conteni tota la mor, no sola nosa fantasmas personal. Jung ia comensa vide la demente como persones ci es infestada par esta fantasma, en un eda en cual nun es suposada per crede en los. Si nos ta pote recatura nosa mitolojias, nos ta comprende esta fantasmas, deveni plu comfortosa con la mor, e remedia nosa maladias mental.

Criticas ia sujesta ce Jung ia es, multe simple, malada se mesma cuando tota de estas aveni. Ma Jung ia senti ce, si on vole comprende la jungla, tu no pote es contente per veli ala e asi prosima a la costa. Tu debe vade a en, no importa tan strana e temente lo ta pare.

Biografia edita

Carl Gustav Jung ia nase a 26 julio 1875, en la vileta suiz de Kessewil. Sua padre ia es Paul Jung, un eglesor de la campania, e sua madre ia es Emilie Preiswerk Jung. Carl ia es ensircada par un familia estendeda alga bon educada, incluinte eglesores e persones alga strana.

Sua padre ia comensa Carl a aprende latina cuando el ia ave ses anios, cual ance comensa un interesa longa en lingua e leteratur - spesial leteratur antica. Estra la plu de linguas moderna de Europa, Jung ia pote leje alga linguas antica, incluinte Sanscrito, la lingua de la libros santa orijinal de induisme.

Carl ia es un adolesente alga solitar, ci no gusta multe la scola, e spesial no pote tolera compete. El ia vade a scola abitante en Basel, Suiz, do el ia trova se la ojeto de multe menasa jelosa. El ia comensa usa malada como un escusa, e ia developa un tende embarasante de desmaia su presa.

An si sua eleje prima de carera ia e arceolojia, el ia continua sua educa per studia medica a la Universia de Basel, Cuando laborante su la neurolojiste famosa Krafft-Ebing, el ia deside sur psiciatria como sua carera.

Pos gradua, el ia prende un posto a la Ospital Mental Burghoeltzli en Zurich, su Eugene Bleuler, un esperta sur (e la person ci ia nomi) scizofrenia. En 1903, es sposi Emma Rauschenbach. El ia ensenia clases a la Universia de Zurich, ia condui un pratica privata, e ia inventa la asosia de parolas a este periodo.

Un amiror de Freud, el ia encontra el en Wien en 1907. La nara es ce, pos los ia encontra, Freud ia cansela tota sua otra encontras per la dia, e los parla per 13 oras continuante. Tan ia es la efeto de la encontra de esta du mentes grande! Freud ia veni ultima per vide Jung como la "prinse erital" de psicoanalise, e sua propre eritor ance.

Ma Jung no ia aseta completa la teoria de Freud. Sua relata ia comensa fria en 1909, en un viaja a America. Los ia es divertinte se par analise la sonias de lunlotra (plu divertinte, lo pare, ca xufelborda), cuando Freud ia pare mostra un esede de resiste a la atentas par Jung a analise. Freud ia dise final ce los ta debe pare, car el ia teme ce el ta perde sua autoria! Jung ia senti insultada.

La Gera Mundal 1 ia es un periodo de autoesplora dolosa per Jung. Ma lo ia es ance la comensa de un de la teorias la plu interesante de personalia ce la mundo ia vide sempre.

Pos la gera, Jung ia viaja vasta, visitante, per esemplo, popla tribal en Africa, America, e India. El ia jubila en 1946, e ia comensa retira de la atende publica pos la mori de sua sposa en 1955. El ia mori a 6 junio 1961, en Zurich.

Ego, la suconsensa personal, e la suconsensa coletiva edita

La teoria de Jung divide la mente en tre partes. Prima es la ego, cual Jung ia identifia con la mente consensa. Prosima relatada es la suconsensa personal, cual inclui cualce dosa cual no es consensa a la momento, ma pote deveni tal. La suconsensa personal es como la comprende la plu persones ave de la suconsensa en cual ce lo inclui memorias cual es fasil traeda a consensa e los cual ia es supresada per alga razonal. Ma lo no inclui la instintos cual Freud ia inclui.

Ma alora, Jung ajunta la parte de la psice cual causa ce sua teoria difere de tota otras: la suconsensa coletiva. On pote nomi lo sua "erita psical". Lo es la reserva de nosa esperias como un spesies, un tipo de sabe ce tota de nos ave a nase. Ma nos es nunca direta consensa de lo. Lo influe tota de nosa esperias e conduis, spesial la esperias e conduis emosial, ma nos sola pote conose el nondireta, par esamina la influes.

On ave alga esperias cual mostra la efetos de la suconsensa coletiva plu clar ca otras: la esperia de ama a la prima encontra, de "deja vu" (leteral, "vide ja", la senti ce on ia es asi a ante), e la reconose direta de alga simboles e la sinifias de alga mitos, pote tota es comprendeda como la conjunta subita de nosa realia esterna e la realia interna de la suconsensa coletiva. Esemplos plu grande es la esperias de crea compartida par artiste e musicistes tra la mundo e en tota edas, o la esperias spirital de misticas de tota relijios, o la paraleles en sonias, fantasias, mitolojias, naretas per enfantes, e leteratur.

Un bon esemplo es lo cual ia es discuteda multe resente: la esperia de cuasi-mori. Lo pare ce multe persones de multe cultures diferente trova ce los ave multe recolies simil cuando los es reviveda de un encontra prosima con moria. Los parla de parti de sua corpos, vide sua corpos e la avenis sirca los multe clar, de es traeda tra la tunel longa en la dirije de un lus briliante, de vide relatas mor o figures relijiosa espetante per los, e de sua delude a debe departe de esta sena felis per reveni a sua corpos. Posible, nos es tota "construida" (jenetical) per esperia mori en esta modo o modos simil.

Arcetipos edita

La contenis de la suconsensa coletiva es nomida arcetipos. Jung nomida los ance dominantes, imagos, imajes mitolojial o primeval, e alga otra nomes, ma arcetipos pare la ganior sur estas. Un arcetipo es un tende nonaprendeda per esperia cosas en un modo spesifada.

La arcetipo no ave un forma de se mesma, ma lo ata como un "prinsipe organizante" sur la cosas ce nos vide o fa. Lo opera en la modo ce instintos opera en la teoria de Freud. A prima, la bebe sola desira cualce cosa per come, sin sabe cual comeda el desira. El ave un anela alga nondefinida cual pote es sasiada par alga cosas e no par otras. Plu tarda, con plu esperia, la enfante ia comensa anela per alga cosa plu spesifada cuando el fama - un botela de lete, un biscoto, un omaro grilida, un peso de piza en la stilo de New York.

La arcetipo es como un buco negra en spasio: On pote sola conose ce lo esiste par como lo trae materia e lus en se mesma.

La arcetipo de madre edita

La arcetipo de madre es un esemplo spesial bon. Tota de nosa asendentes ia ave madres. Nos ia es evoluida en un ambiente cual ia inclui un madre o un sustitui per madre. Nos ta survive nunca sin nosa lia con algun curante en nosa periodos como enfantes sin defende. Lo es razonable ce nos es "construida" en un modo cual refleta nosa ambiente de evolui: Nos veni a esta mundo preparada per nesesa madre, per xerca per el, per reconose el, per interata con el.

La arcetipo de madre es nosa capasia inerente per reconose un relata spesial, lo de "madria". Jung ia dise ce esta es alga astrata, e nos debe projeta la arcetipo a la mundo e a un person spesifada, plu comun nosa propre madres. An si la arcetipo no ave un person real spesifada, nos ta tende personi la arcetipo, cual es per dise, cambia lo a un carater mitolojial. Esta carater simboli la arcetipo.

La arcetipo de madre es simbolida par la madre primeval, la "madre tera" de mitolojia, par Eva e Maria en tradisiones cristian, e par simboles min personal como la eglesa, la nasion, un foresta, o la mar. Seguente Jung, algun de ci sua madre ia fali per sasia de esijes de la arcetipo pote deveni un ci spendes sua vive xercante per comforta en la eglesa, o en identifia se con la "pais madrin", o en medita sur la figur de Maria, o en un vive a mar.

De la arcetipos plu importante, nos ave la ombra, cual represente nosa asendentes animal, e es comun la loca de nosa consernas con malia e nosa propre "lado oscur"; on ave la "anima", represente la lado fema en omes, e la "animo", represente la lado mas de femes; e la "persona", cual es la personalia surfas, la parte de nos cual nos permete otras per vide.

Otra arcetipos inclui padre, enfante, familia, eroe, virjin, animal, la saja vea, la androjine, Dio, e la om prima.

Se-mesma edita

La gol de vive es per reali se-mesma. La se-mesma es un arcetipo cual representa la transende de tota oposas, afin tota aspeta de tua personalia es espresada egal. Tu es alora no esta e no acel, o ambos, de mas e fema, de ego e ombra, de bon o mal, de consensa e suconsensa, no individua no tota de creada. An tal, con no oposas, on no ave enerjia, e on sesa ata. Natural, on no nesesa ata.

Per no deveni tro mistica, pensa de lo como un sentro nova, un posa plu ecuilibra, per tua psice. Cuando tu es joven, tu foca sur la ego e es ansiosa sur la trivia de la persona. Cuando tu es plu vea (si tu ia es developante como tu debe), tu foca alga plu profonda, sur la se-mesma, e deveni plu prosima a tota persones, tota vive, an la universo mesma. La person autorealida es min egoiste.

La esamina de Myers-Briggs edita

 
Katherine Briggs e sua fia Isabel Myers

Katherine Briggs e sua fia Isabel Briggs Myers ia trova la ideas de Jung sur personalias tan compulsante ce los ia deside developa un esamina de paper-e-lapis. Esta idea deveni la Indicador de Tipos Myers-Briggs, e es un de la esaminas plu popular, e plu studiada.

Dependente de tua responde a sirca 125 demandas, tu es poneda en un de 16 tipos, con la comprende ce alga persones pote trova se a un loca entre du o tre tipos. Cual tipo tu es dise multe sur tu - tua gustas e tu odias, tua elejes de carera, tua conveni con otras, etc. Persones ci ia usa la esamina tende gusta lo. Lo ave un cualia noncomun entre esaminas de personalia de no es tro judinte: No tipo es multe negativa, no es tro positiva. E, en loca de evalua como "demente" tu es, la Myers-Briggs sola abri tua personalia per esplora.

La esamina ave cuatro scalas. Estrovertinte-Introvertinte (E-I) es la plu importante. Rexercores ia trova ce sirca 75% de la popla es estrovertinte. Estrovertintes dirije sua atende a estra, e tende prefere la compania de otras. Introvertintes dirije sua atende a en, a sua pensas e imajina. Los es plu comfortable solitar o con poca otras en un ambiente alga pasosa.

Alora es Sensante-Intuinte (S-N), con sirca 75% de la popla sensante. Persones sensante depende sur sua sensas per informa sur la mundo, e fida sua sensas. La intuintes depende plu a "sensas interna" o intuis per comprende cosas. Sensantes tende restrinje se a la surfas de persones e cosas; intuintes tende xerca per comprende plu profonda e min vasta.

Seguente es Pensante-Sentinte (T-F). Pensantes valua pensa, natural, razona e lojica. Sentintes valua senti, emosias. An si estas es distribuida egal tra la popla, rexercores ia trova de du tris e omes es pensante, e du tris de femes es sentinte. Posible esta pare tro stereotipal, nota ce pensante e sentinte es valuada egal par jungianes, e ce un tri de omes es sentinte e un tri de femes es pensante. Car sosia valua pensa e senti diferente, omes sentinte e femes pensante comun trova difisiles con la espetas stereotipal de otras. Pensantes tende vide sentintes como tro emosial e nonrazonante, e sentinte vide pensantes como tro fria e noncurante.

La final es Judinte-Persepinte (J-P), cual es un ajunta par Myers e Briggs a la sistem orijinal de Jung. Jeneral, persones judinte es plu curante, posible inibida en sua vives. Persones persepinte es plu spontan, a veses nonatendente.

Si tu es un estrovertinte e un judinte, tu es o un pensante o un sentante, dependente de cual es plu forte. Estrovertinte e persepinte, tu es o un sensante o un intuinte. Ma un introvertinte con judinte, es o sentinte o intuinte, e un introvertinte con persepinte es un pensante o sentinte. Judinte e Persepinte es distribuida egal en la popla.

Discute edita

Multe persones trova de Jung ave multe per dise a los. Esta persones inclui spesial autores, artistes, musiciste, produores de filmas, teolojistes, relijiosas, studiantes de mitolojistes. Esemplos inclui la mitolojiste Joseph Campbell, la produor de filmas George Lucas, la autor de naras siensas Ursula K. Le Guin. Algun con un interesa en creosia, spiritalia, fenomenos psicica, la universal, etc, ta trova un spirito familial en Jung.

Ma siensistes, incluinte la plu de psicolojistes, no es tan comfortable con Jung. Jung ia suporta intera la vista teleolojial (como multe teoristes de personalia), e el ia move un paso plu e parla de la interlia mistica de sincroni (ce du avenis pote es liada, no en la mundo material, par causa e efeto, ma en la suconsensa coletiva). El proposa un suconsensa, do cosas no es fasil disponable a la oio empirical, e el vade plu e proposa un suconsensa coletiva, cual no ia es, e ta es nunca, consensa.

Vera, Jung ia prende un metodo cual es en esense la reversa de la reduisme de psicolojia materialiste: Jung comensa a la niveles la plu alta, e deriva la niveles plu basa de psicolojia e fisiolojia de los.

An psicolojistes ci loda sua teleolojia e posa antireduiste pote no es comfortable con el. Como Freud, Jung ia atenta trae tota cosa a sua sistem. El ia ave poca spasio per acaso o situa. Personalia - e vive jeneral - pare "supraesplicada" en sua teoria.

Alfred Adler edita

 
Alfred Adler

Alfred Adler ia nase en la suburbes de Wien a 7 febrero 1870, la enfante tre, fio du, de un mercator iudi de gran e sua sposa. Cuando un enfante, Alfred ia developa racite, cual ia preveni el de pasea asta cuatro anios. A sinco anios, el ia prosimi mori de pneumonia. A esta eda, el ia deside deveni un mediciste.

Alfred ia es un studiante promedia, e prefereda jua estra casa plu ca es caxida en scola. El ia es sosial, popular, e ativa, e ia es conoseda per sua atentas a suprapasa sua frate plu vea, Sigmund.

El ia reseta sua diploma medical de la Universia de Wien en 1895. En sua anios en universia, el ia deveni un membro de un grupo de studiante sosialiste, entre ci el ia trova sua sposa futur, Raissa Timofeyewna Epstein. El ia es un inteleto e un ativiste sosial ci ia veni de Rusia per studia en Wien. Los ia sposi en 1897 e ultima ia ave cuatro enfantes, de ci du ia deveni psiciatristes.

El ia comensa sua carera medical como un oftalmolojiste, ma el pronto cambia a pratica jeneral, e institui sua ofisia en la parte de Wien de la clase plu basa, fasante la Prader, un combina de parce de divertis e un sirco. Sua pasientes ia inclui persones de la sirco, e lo ia es sujestada (Furtmuller 1964) ce la fortias e debilias noncomun de la presentores ia condui el a sua intuis de inferioria e compensa.

El ia turna a psiciatria, e en 1907 ia es invitada per deveni un membro de la grupo de discute de Freud. Pos scrive paperes sur inferioria organal, cual ia es armoniosa con la vistas de Freud, el ia scrive, prima un paper consernante un instinto de combate, cual Freud no ia aproba, e alora un paper sur la sentis de inferioria de enfantes, cual ia sujesta de la ideas de sesalia de Freud debe es videda como metafor e no leteral.

An tal, Freud ia eleje Adler per la presidente de la Sosia de Analise de Wien e la coeditor de la revisteta de la organiza. Ma Adler no ia para sua critica. Un debate entre suportores de Adler e de Freud ia es ordinada, ma lo ia resulta en Adler, con nove otra membros de la asosia resinia per formi la Asosia de Psicoanalise Libre en 1911. Esta asosia deveni la Asosia per Psicolojia Individua la anio seguente.

En la Gera Mundal 1, Adler ia servi como un mediciste en la armada de Osteraic, prima a la fronte rusce, e plu tarda a un ospital per enfantes. El ia vide en person la dana ce gera causa, e sua pensas ia verje cresente a la conseta de interesa sosial. El ia senti ce, si umania ta survive, lo ta debe cambia sua modo de vive!

Pos la gera, el ia es envolveda en projetas variosa, incluinte clinicas liada a scolas nasional e la instrui de enseniores. En 1926, el ia vade a la SUA per parla, e el ia aseta un posto visitante a la Universia de Medica de Long Island. En 1934, el e sua familia ia departe de Wien. A 28 maio 1937, en un serie de parlas a la Universia de Aberdeen, el ia mori de un ataca de cor.

Emprende edita

Alfred Adler ia proposa un forte solitar de motiva su tota de nosa condui e esperia. Per la tempo cuando sua teoria ia jeli a sua forma la plu matur, el ia nomi la forte "la emprende per perfetia". Lo es la desira ce nos ave per pleni nosa potensias, per vade plu e plu prosima a nosa ideal. Lo es multe simil a la idea oji popular de autoreali.

"Perfetia" e "ideal" es parolas problemosa. A un lado, los es goles multe positiva. Esce nos no atenta ateni la ideal? Ma, en psicolojia, los es frecuente donada un conota negativa. Perfetia e la ideal es, par sua definis, cosas cual on no pote ateni. Multe persones, en fato, ave vives multe triste e dolosa en sua atentas a ateni perfetia! Otra teoristes, como Karen Horney e Carl Rogers, ia asentua esta problem. Adler ia parla sur lo ance, ma el vide esta tipo de idealisme negativa como un perverti de un comprende plu positiva de idealisme.

Emprende per perfetia no ia es la espresa prima cual Adler usada per refere a esta forte solitar. Sua fase la plu temprana, lo ia es la forte agresiva, cual refere a la reata ce nos ave cuando otra fortes, como nosa nesesa per come, per es sasiada sesal, ateni goles dial, es amada, etc, es frustrada. Lo ta es plu bon si el ia nomi lo la forte de sertia, si on vide agresiva como fisical e negativa. Ma esta ia es la idea cual ia causa prima alga frica entre el e Freud. Freud ia teme ce lo ta diminui la rol esensal de la desira per seso en sua teoria psicoanalitica. An tal Freud no gusta la idea, el mesma ia introdui alga simil plu tarda en sua vive: la instinto per mori.

Un otra parola cual Adler ia usa per motiva fundal ia es compensa, o la emprende per vinse. Car tota de nos ave problemes, debilias, inferiorias de un tipo o un otra, Adler ia senti, temprana en sua scrives, ce nosa personalias pote es esplicada par la modos en cual nos compensa per o vinse - o no compensa per o vinse - esta problemes. La idea ia continua ave un rol importante en sua teoria, ma el ia rejeta la eticeta per la motiva car lo sujesta ce tua problemes es cual resulta en la person tu ia deveni.

Un otra espresa temprana ia es "protesta masin". El ia nota alga cosa multe evidente en sua cultur (e en no modo asente de la nosa): Xicos es respetada plu ca xicas. Xicos desira, frecuente desperante, per es videda como forte, agresiva, serta - pd "masin" - e no debil, pasiva, o dependente - pd "femin". La punto, natural, ia es ce omes ia es en alga modo fundal plu bon ca femes. Los ave clar la potia, la educa, e (parente) la talento e motiva nesesada per fa "cosas grandes", e no femes.

On pote ancora oia esta en la tipos de comentas cual persones plu vea ave sur enfantes: Si un bebe mas esije per sua propre desiras (la protesta mas), los ta dise ce el es un xico natural. Si un bebe fema es cuieta e timida, el es lodada per sua feminia. Ma, si la xico es cuieta e timida, los deveni ansiosa ce el pote eleva per deveni un xico femin, o an un om ge. O, si la xica es sertia e demanda sasia, los ta nomi el un xica masin, o an plu mal, e los ta atenta calmi la jenitores ce el ta cambia pos alga anios.

Ma Adler no ia vide la sertia e susedes de omes como la resulta de un superioria inata. El ia vide lo como un refleta de la fato ce omes ia es corajida per deveni serta en vive, e femes ia es descorajida. Ambos ia comensa sua vive con la capasia per "protesta". Car tan multe lejores malcomprende sua intendes, Adler ia restrinje sua usa de la idea e la espresa.

La espresa final cual el ia usa, ante cambia a emprende per perfetia, ia es emprende per superioria. Sua usa de esta espresa refleta un de sua radises filosofial de sua ideas: Friedrich Nietzsche ia developa un filosofia cual videda la vole per potia la motiva fundal de vive umana. An si emprende per superioria refere clar a la desira per deveni plu bon, lo conteni ance la idea ce nos vole es plu bon ca otras, en loca de vole es plu bon personal. Plu tarda, Adler ia tende usa esta espresa plu per refere a un emprende nonsana o neurosica.

Stilo de vive edita

Multe de esta jua con parolas refleta un xerca per un teoria de personalia vera diferente ca lo representada par lo de Freud. La teoria de Freud ia es cual nos ta nomi aora un teoria reduiste: El ia atenta redui tota de sua ideas a la nivel de fisiolojiste. Plu Freud ia tende atenta siseli la person en partes teorial plu peti - pe id, ego, supraego.

Adler ia es influeda par la scrives de Jan Smuts, un politiciste e filosofiste de Sudafrica. Smuts ia pensa ce, per comprende persones, on debe comprende los plu como interas unida, en loca de un colie de pesos, e on debe comprende los en la contesto de sua ambiente, fisical e sosial. Esta es nomida olisme, e Adler ia aseta lo completa.

Prima, per refleta la idea ce nos debe vide persones como interas, e no partes, el ia desideda per nomi sua teoria "psicolojia individua". La parola "individua" sinifia leteral "no-divideda".

Plu, en loca de parla sur la personalia de un person, con la sinifia tradisional de cualias interna, strutures, dinamicas, desacordas, etc, el ia prefereda parla de la stilo de vive. La stilo de vive refere a como tu vive, como tu maneja tua problemes e relatas interpersonal. El ia dise: "La stilo de vive de un arbor es la individua de un arbor espresante se e formi se en un ambiente. Nos reconose un stilo cuando no vide lo contra un fondo de un ambiente diferente de cual nos espeta, car alora nos comprende ce cada arbor ave un motif de vive e no es sola un reata macinal a la ambiente.

Teleolojia edita

La idea ce la stilo de vive es "no sola un reata macinal" es un modo du en cual Adler difere de Freud. Per Freud, tota cosas cual ia aveni en la pasada, como traumas en enfantia, determina cual tu deveni en a presente. Adler ia vide motiva como un caso de move a la futur, en loca de es propulsada par la pasada. Nos es traeda a tua goles, intendes, ideales. Esta es teleolojia.

La move de cosas de la pasada a la futur ia ave efetos dramosa. Car la futur no es ja asi, un teoria teleolojial a motiva sutrae la nesesa de cosas. En un teoria tradisional e macinal, causa resulta en efeto: Si a, b, e c aveni, alora x, y, e z debe, nesesada, aveni. Ma tu no debe ateni sua goles o sua ideales, e los pote cambia tra tempo. Teleolojia aseta ce vive pote es difisil e nonserta, ma lo ave sempre la posible de cambia.

Un otra influe sur la pensa de Adler ia es la filosofiste Hans Vaihinger, ci ia scrive un libro nomida "La filosofia de 'como si'". Vaihinger ia crede ce la veria ultima ta es sempre ultra nos, ma ce, per intendes pratical, nos nesesa crea verias partal. Sua interesa major ia es siensa, donce el ia usa esemplos como la verias partal protones e eletrones, ondas de lus, gravita como la contorse de spasio, etc. Contrastante a cual multe de nonsiensistes tende suposa, estas no es cosas cual cualcun ia vide o demostrada esiste: Los es construidas usosa. Los opera per la momento, permete ce nos partisipa en siensa, e nos espera ta condui nos a plu bon, plu usosa construidas. Nos usa los "como si" los ia es vera. El nomi esta verias partal "nützliche Fiktionen", o imajinas usosa.

Vaihinger, e Adler, ia nota ce nos usa esta imajinas en nosa vive dial. Nos condui nos como si nos sabe ce la mundo ta es asi doman, como si nos es serta de la sinifias de bon e mal, como si tota cual nos vide es come nos vide los, etc. Adler nomida esta idea "finalisme imajinal". On pote comprende la espresa la plu fasil si on pensa sur un esemplo: Multe persones condui se como si un sielo o un enferno esiste en sua futur personal. La plu persones oji no pensa de los como fatos demostrada, ma an los es real o imajinada, los gida nosa condi. E "finalisme" refere a la teleolojia de los: La imajinas es (posible) en la futur, ma pote influe nosa condui oji.

Adler ia ajunta ce, a la sentro de cada stilo de vive, on ave un de esta imajinas, un imajina importante sur ci on es e a do nos viaja.

Discute edita

Criticas de Adler tende envolve la caso de esce sua teoria es un siensa, o a cual grado. La corente dominante de psicolojia oji es esperimental, cual sinifia, entre otra cosas, ce la consetas cual un teoria usa debe es mesurable e manipulable. Alora, esta sinifia ce un orienta esperimental prefere variables fisical. Adler ia usa consetas fundal cual es distante de la fisical: emprende per perfetia? Como on pote mesura lo? O compensa? O sentis de inferioria? O interesa sosial? La metodo de esperimenta ance ave un suposa fundal: Ce tota cosas opera seguente la regulas de causa e efeto. Adler ta acorda serta ce cosas fisical segue los, ma el ta rejeta ce umanas segue los! En loca, el vade a la via teleolojial, ce persones es "determinada" par sua ideales, goles, valuas, "ficsiones final". Teleolojia sutrae la nesesa de cosas: un person no nesesa responde en un sola modo a un situa; un person ave elejes per deside, un person crea sua propre personalia o stilo de vive. De la perspetiva esperimental, esta cosas es iludes cual un siensiste, an un teoriste de personalia, no osa aseta.

Multe otra psiciatristes e psicoanalistes e teoristes con otra titulos. Lo no es posible per asentua tro multe ce esta persones, incluinte Freud, ta ave un efeto sur psicolojia, e spesial sur psicolojia clinical. Seguente e ofrente sua propre ideas ta es Anna Freud, Heinz Hartman, Erik Erikson, Otto Rank, Sandor Ferenczi, Karen Horney, Erich Fromm, Harry Stack Sullivan, Henry Murray, Gordon Allport, Gardner Murphy, George Kelly, Carl Rogers, Ludwig Binswanger, e multe otras.