Preistoria de la popla PIE (Teoria de Continua)
La teoria de continui paleolitica es in ipotese cual sujeste ce la lingua protoindoeuropean pote ta trasada a retro a la eda paleolitica alta, alga milenios plu temprana ca la calcolitica o ca la plu de estimas neolitica en la otra varias de la orijinas de protoindoeuropean.
Como presentada par Mario Alinei en sua Origini delle Lingue d'Europa ("orijines de a linguas de Europa"), publicada en de volumes en 1996 e 2000, la teoria sujeste ce la comensa de la linguas indoeuropean debe es liada a la ariva de Homo sapiens en Europa, a sirca 40,000 anios ante aora. Usante "periodi de vocabula" como un tecnica, Alinei ia ariva a un linia de tempo plu profonda ca an lo de la ipoteses anatolian de Colin Renfrew, un de la teorias plu popular.
De 2004, un grupo nonformal de erditas ci suporta la teoria ia congrega a la rede. Membros de la grupo inclui la linguistes Xaverio Ballester (Universia de Valencia) e Francesco Benozzo (Universia de Bologna), preistoriste Marcel Otte (Universia de Liege) e antropolojiste Henry Harpending (Universia de Utah).
Alga de la ideas cual Alinei ia introdui:
- La indoeuropeanes ia abita la parte la plu grande de Europa de la paleolitica;
- Linguas jeneral evolui multe lente, e cambias rapida aveni plu en la milenios resente;
- La parlores de linguas protogermanica ia es orijinal a Europa norde, e ia coloni Scandinavia pos la eda glasial resente;
- La linguas baltica ia es parlada par popla de la area de la Mar Baltica;
- La parlores de linguas protocelta ia orijina en Europa ueste, e ia move a este;
- La parlores de linguas protoitalica ia orijina en Italia e la plu de la areas en cual on parla aora linguas romanica;
- La parlores de linguas protoslavica ia orijina en la Balcanes;
- La protouralicas ia abita la forestas de Rusia de la paleolitica;
- La prototurcicas ia abita la stepes, e ia doma la cavalos prima;
- La parolas per la usa de cavalos en linguas slavica, iranian, e uralica es derivada de prototurcica;
- La protomagiares ia es influeda multe par la prototurcicas, e trae acel a Europa sentral;
- La etruscanes ia es un ramo de la protomagiares e no orijinal de Italia;
- La "europeanes vea" de Maria Gimbutas ia es vera protoindoeuropeanes;
- La grande migras,invades, e colonis no ia es un fator major asta la milenios de la neolitica, cuando strati sosial ia developa.
Alinei e sua suportores sujeste ce la distribui de aplogrupos umana va suporta sua teorias, ma a esta ora, esta suporta no es multe forte. La teoria de continui paleolitica es un un teoria de un minoria de espertas.