Protenas es biomoleculas grande, acc macromoleculas, composada de un o plu cadenas longa de aminoasida. Protenas ave un colie multe grande de roles en organismes, incluinte la reatas metaboli catalisente, replica de ADN, responde a stimulas, furni strutur per selulas, e transporta moleculas de un loca a un otra. Protenas difere de lunlotra en sua segues de aminoasida, cual es determinada par la segue de nucleotidos de sua jenes, e cual tipal resulta en la protenas pliante en strutures spesifada de tre dimensiones cual determina sua ativia.

Un model de la strutur en tre dimensiones de la protena mioglobin

Protenas esiste sola per un periodo e es alora degradada e resiclida par la aparatos de la selula. La estende de la vive de un protena es mesurada en termas de sua duivive e covre multe varias. Los pote esiste per minutos o anios, con un estende de vive promedia de 1 o 2 dias en selulas de mamales. Protenas nonormal o mal pliada es degradada plu rapida par deveni un ojeto per destrui o par es nonstable.

Como otra macromoleculas como polisacaridos e aminoasidas, protenas es partes esensal de organismes e partisipa en cuasi tota prosede en selulas. Multe protenas es enzimas cual catalise reatas biocimical e es nesesada per metaboli. Protenas ance ave roles strutural o mecanical como, pe, actina e miosina en musculos, e la protenas de la sitosceleto, cual formi un sistem de scafales cual manteni la forma de selulas. Otra protenas es importante en siniali selulal, respondes imunial, adere selulal, e la sicle selulal. En animales, protenas es nesesada en la dieta per furni la aminoasida esensal cual no pote es sinteseda. Dijesta rompe la protenas per usa en metaboli.

Un ribosoma produi un protena usante mARN como un model

Protenas es asemblada de aminoasidas usante informa codigida en la jenes. Cada protena ave sua propre segue unica de aminoasida cual es spesifada par la segue de nucleotidos de la jen cual codigi esta protena. La codigo es un colie de grupos de tre nucleotidos nomida codones, e cada combina de tre nucleotidos indica un aminoasida. Per esemplo, AUG (adenina - urasil - guanina) es la codigo per la aminoasida metionin. Car ADN conteni cuatro nucleotidos, la tota codones posible es 64; donce, on ave alga plu repetes en la codigo jenetica, con alga aminoasida spesifada par un de un codon. Jenes codigida en mADN (la "m" es per "mesajor") es prima transcriveda a pre-ARN par protenas como ARN polimerase. La plu de organismes alora prosede la pre-ARN usante formas variosa de alteras pos-transcrive per produi la mARN matur, cual es alora usada como un model per la sintese de protenas par la ribosomas.

La grandia de un protena sinteseda pote es mesurada par la cuantia de aminoasidas cual lo conteni, e par sua masa moleculal intera, cual es normal reportada en daltones (cual egal unias de masa atomal). La grandia de protenas crese de arceas a baterias a eucariotas. Per esemplo, un protena tipal, fermento, ave un longia de 466 aminoasidas, e 53 mil daltones. La protenas la plu grande es la titinas, un composante de la sarcomeros de musculos, on cuasi 27 milion aminoasidas e cuasi 3 milion daltones.