Protouralica

Protouralica es un lingua ipotesal cual es la asendente de la familia de linguas uralica. La lingua ia es orijinal parlada en un area peti entre 7000 e 2000 aec. La loca esata ("urheimat") no es conoseda, ma la area de la Urales en Rusia moderna es comun suposada. On ave du teorias de la developa a pos: Un teoria sujesta ce lo ia fende a du ramos – protofinougrica e protosamoiedica; la otra sujesta ce lo ia fende a tre ramos – protofinopermica, protougrica e protosamoiedica. Un teoria tre sujesta ce la lingua orijinal ia divide en multe partes: protosami, -finica, mordva, mari, permica, magiar, canti, mansi, e samoiedica.

Fonolojia

Vocales

	vocal anterior		vocal posterior
	vocal streta	vocal ronda	vocal streta	vocal ronda
vocal cluida	i /i/	ü /y/	ï /ɯ/	u /u/
vocal media	e /e/			o /o/
vocal abrida	ä /æ/		a /ɑ/

La protolingua ia ave la armonia de vocales, como la linguas moderna. Vocales ronda ia es restrinjeda a la silabas prima. Un teoria sujesta ce la vocales de silabas pos la silaba prima ia es orijinal restrinjeda a /a/ e /i/, o /a/, /i/, e /ə/, e la armonia de vocales ia crea la varia ultima. On crede ce la protolingua no ia ave vocales longa o diftongos.

Consonantes

	bilabial	dental	palatal	posalveolal	velal
esplodente e africante	p /p/	t /t/	(ć /t͡ɕ/)	č /t̠͡ʃ/	k /k/
nasal	m /m/	n /n/	ń /nʲ/		ŋ /ŋ/
sibilante		s /s/	ś /ɕ/	(š /ʃ/)
fricante		δ /ð/	δ´ /ðʲ/		x?
ladal		l /l/	(ľ /lʲ/)
vibrante		r /r/
semivocal	w /w/		j /j/

Palatali ia es un parte de la fonetica, como en multe linguas uralica moderna. Sola un serie de esplodentes – sin vose e nonaspirada – ia esiste. Sola atestas minima esiste per la fonemes en brasetas. La natur de *x es nonserta, ma la suposa comun es ce lo es un consonante a retro, como [x], [ɣ], [ɡ], o [h]. Lo ata en un modo simil a la larinjales en protoindoeuropean. La consonantes *δ *r *x *ŋ no ia aveni a la comensa de un parola, e no grupos de consonantes ia es permeteda a la comensa o fini de un parola. Cisa on ia ave esplodentes duple. Protouralica no ia ave tonos, e la silaba prima ia es sempre asentuada.

Gramatica

Protouralica ia es un lingua aglutinante, con a min ses casos per nomes e con verbos cual ia varia per numero, person, modo e tempo. On ia ave tre numeros: singular, dual e plural. La lingua ia es un lingua nominativa-acusativa. Lo ia ave no seso gramatical e no articles. La plural ia es indicada par *-t cuando final, e *-j- cuando nonfinal. La dual ia es reconstruida como *-k-, an si lo es perdeda en la plu de linguas uralica moderna. La nomes ia ave sufisas per indica posese ma no pronomes de posese. La casos de nomes inclui sola un grupo de sufisas per locas: entrante, abituante e sortinte. Esta ia es developada a la sistem de tre grupos de tre en alga linguas moderna.

La roles ia es:

• nominativa (no sufisa)
• acusativa *-m
• posese *-n
• locativa *-na / *-nä
• ablativa *-ta / *tä
• lativa *-ŋ

Verbos ia es conjugada a min acordante con cuantia, person, e tempo. La reconstruis de marcas de modo es debatada. Nega es espresada par la usa de un verbo negativa *e-, como en, pe, suomi "e+mme" ("nos no fa").

Vocabula

Sola sirca 200 parolas pote es construida per protouralica, si on insiste ce tota linguas moderna ave esemplos de parolas desendeda. La vocabula reconstruida conveni bon con un cultur mesolitica e un loca en Eurasia norde, e lo ave sujestes interesante sur la strutur de familias:

• La corpo: *ïpti capeles, *ojwa testa, *śilmä oio, *poski jena, *käxli lingua, *elä- vive, *kaxli- mori, *wajŋi respira, *kosi tose, *kunśi urina, *küńili lacrima, *sexji pus.
• La familia: *emä madre, *čečä tio, *koska tia, *mińä fia par sposi, *wäŋiw fio par sposi.
• Atas comun: *meni- vade, *toli- veni, *aśkili- fa un paso, *imi- suca, *soski- mastica, *pala- come, *uji- nada, *sala- furi, *kupsa- estingui.
• Natur: *juka rio, *toxi lago, *weti acua, *päjwä sol, caldia, *suŋi estate, *śala- lampo, *wanča radis, *koxji betul, *kaxsi pisea, *sïksi pino de sibir, *δ'ïxmi seriso de avias
• Tecnolojia simple: *tuli foco, *äjmä ago, *pura forador, *jïŋsi arco, *jänti cordeta de arco, *ńïxli flexa, *δ'ümä cola, *lïpśi cuna, *piksi corda, *suksi sci, *woča serca.
• Consetas spasial: *ïla a su, *üli a supra, *wasa a sinistra, *pälä a lado.
• Pronomes: *mun me, *tun tu, *ke- ci, *mi- ce.