Psicolojia de gestaltes

La psicolojia de Gestaltes, fundida par Max Wertheimer, ia es un cuasi rebela contra la reduisme de la program per psicolojia de Wundt, en simpatia con multe otras en sua eda, incluinte William James. En fato, la parola "Gestalt" es deutx per un forma intera unida e sinifiante, cual debe es la foca de studia psicolojial.

Lo ia ave sua radises un alga filosofistes e psicolojistes plu temprana:

Ernst Mach (1838-1916) ia introdui la consetas de formas spasial e formas tempal. Nos vide un cubo como un cubo, esce lo es grande o peti, roja o blu, en contorno o tecnicolor... Esta es un forma spasial. Simil, nos persepi un melodia como reconosable, an si nos cambia la tonalia en un modo ce no un de la notes es la mesma.

Christian von Ehrenfels (1859-1932), ci ia studia con Brentano en Wien, es la orijina vera de la terma Gestalt como la psicolojistes d gestaltes ta usa lo. En 1890 el ia scrive un libro nomida "Sur Cualias de Gestalt". Un de sua studiantes ia es Wertheimer.

Oswald Kulpe (1862-1915) ia es un studiante de G. E. Muller a Gottingen e ia reseta sua diploma dotoral a Leipzig. El ia studia ance con Wundt, e ia servi como la aidor per Wundt per multe anios. El ia labora la plu cuando a la Universia de Wurzburg, entre 1894 e 1909. El ia supravide la tese dotoral de Max Wertheimer.

El ia es plu conoseda per sua idea de pensa sin imajes. Contra la seguores de Wundt, el ia mostra alga ativia mental, como judis e dutas, pote aveni sin imajes. La "pesos" de la psice cual Wundt proposada - sensas, imajes, e emosias - ia no es sufisinte per esplica tota cual aveni en la mente.

Max Wertheimer edita

Max Wertheimer ia nase en Praha a 15 april 1880. Sua padre ia es un instruor e dirijor a un scola de comersia. Max ia studia lege per plu ca du anios, ma ia deside ce el prefere filosofia. El parti per studia en Berlin, do el ave clases de Stumpf, e reseta sua diploma dotoral (summa cum laude) de Kulpe e la Universia de Wurzburg en 1904.

En 1910, el ia vade a la Institui Psycholojial de la Universia de Frankfurt. Cuando el ia viaja a vacanse la mesma anio, el deveni interesada en la persepis cual es esperia sur la tren. Cuando el para a la stasion, el ia compra un jueta stroboscopia - un tambur jirante con ranures per vide tra e depintas a la intera de la tambur, un tipo de macineta per filmas, ma multe primitiva.

A Frankfurt, sua ensenior pasada Friedrich Schumann, ci ia es asi ance, ia dona a el la usa de un tacistoscopio per studia la efeto. Sua sujetos prima ia es du aidor joven, Wolfgang Kohler e Kurt Koffka. Los ia deveni sua asosiores de sua vive intera.

El ia publici sua paper influente en 1912: "Studias esperimental de la persepi de move". Acel anio, el ia es ofreda un posto a la Universia de Frankfurt. En 1916, el ia move a Berlin, e en 1922 ia ateni la posto de profesor aidante. En 1925, el ia reveni a Frankfurt, aora como un profesor plen.

En 1933, el ia move a la SUA per evade la turba en Deutxland. La anio seguente, el ia comensa instrui a la Scola per Rexerca Sosial de New York. Cuando ala, el ia scrive sua libro la plu bon conoseda, "Pensa Produosa", cual ia es publicida pos sua mori par sua fio Michael Wertheimer, ance un psicolojiste susedosa. El ia mori 12 otobre 1943 ataca de cor a sua casa en New York.

Wolfgang Köhler edita

Wolfgang Kohler ia nase a 21 janero 1887, en Reval, Esti. El ia reseta sua diploma dotoral en 1908 de la Universia de Berlin. Alora, el ia deveni un aidor a la Institui Psicolojial en Frankfurt, do el ia encontra e labora con Max Wertheimer.

En 1913, el ia reseta un carga per studia a la Stasion de Antropoidos a Tenerife en la Isolas Canario, e resta ala asta 1920. En 1917, el ia scrive sua libro la plu famosa, "La mente de primates".

En 1922, Kohler ia deveni la xef e dirijor de la laboreria de psicolojia a la Universia de Berlin, do el resta asta 1935. En esta tempo, el ia scrive "Psicolojia Gestalt". En 1935, el ia move a la SUA, do el ia ensenia a Swarthmore asta el ia jubila. El ia mori 11 junio 1967 en New Hampshire.

Kurt Koffka edita

Kurt Koffka ia nase 18 marto 1886 en Berlin. El ia reseta sua diploma dotoral de la Universia de Berlin en 1909 e, como Kohler, deveni un aidor a Frankfurt.

En 1911, el ia move a la Universia de Giessen, do el ia instrui asta 1927. Cuando ala, el ia scrive "La crese de la mente: Un introdui a la psicolojia de la enfante", publicida en 1921. En 1922, el ia scrive un article per la Revisteta Psicolojial cual ia introdui la ideas de Gestalt a lejores en la SUA.

En 1927, el vade a la SUA per instrui a la Universia Smith. El ia publici "Prinsipes de Psicolojia de Gestalt" en 1935. El ia mori en 1941.

La teoria edita

La psicolojia de gesaltes es fundida sur la oserva ce nos esperia comun cosas cual no es un parte de nosa sensas simple. La oserva orijinal ia es de Wertheimer, cuando el ia nota ce nos persepi move cuando on ave no plu ca un segue rapida de avenis sensal individua. Esta es lo cual el ia vide en la jueta stroboscopio el ia compra a la stasion de la ferovia, e lo cual el ia vide en sua laboreria cuando el ia esperimenta con bulbos de lus flaxinte en segue rapida (como la lumina de natal cual per curso sirca la arbor, o la sinias de neon en Las Vegas cual pare move). La efeto es nomida "move parente", e lo es un prinsipe fundal de la filmas de la sinema.

Si lo cual nos vide no es vera ala, cual lo es cual nos vide? Tu pote nomi lo un ilude, ma lo no es un alusina. Wertheimer ia esplica ce tu vide un efeto de la aveni intera, e no contenida en la soma de sua partes. Nos vide un corda de luminas cual pare move, an si sola un lumina flaxi a un ves, car la aveni intera conteni relatas entre la luminas individua cual nos esperia ance.

Plu, la psicolojistes de gestaltes, nos es construida per esperia la intera struturida, e ance la sensas individua. E nos no sola ave la capasia de fa lo, ma un tende forte per fa lo. Nos an ajunta strutur a avenis cual no ave cualias strutural de gestaltes.

En persepi, on ave multe prinsipes de organiza nomida leges gestalt. La esemplo la plu jeneral es nomida la lege de //pragnanz//. Pragnanz es deutx per ensinta, ma con la sinifia de ensinta con sinifia, no ensinta con un enfante. Esta lege dise ce nos es impulsada inata per esperia cosas con tan bon un gestalt como posible. "Bon" asi pote sinifia multe cosas como regulada, ordinada, simple, simetre, etc, cual indica la leges plu spesifada.

Per esemplo, un colie de puntos cual contorni la forma de un stela es probable persepida como un stela, e no un colie de puntos. Nos tende completi la forma, fa ce lo es como lo "debe" es, fini lo. Lo es tan natural ce nos vide un sirculo e un retangulo en la imaje a su, multe plu fasil ca un colie de linias. Esta es la //lege de clui//.

Model:Gestalt closure.png?300

La //lege de similia// dise ce nos tende grupi cosas simil a lunlotra con lunlotra, e vide los como forminte un gestalt. A su, nos tende vide un linia de sirculos blanca e un linia de sirculos negra, e no un colie acaso o an colonas de sirculos blanca e negra alternante con lunlotra.

Model:Gestalt similarity.png?300

Un otra lege es la //lege de prosimia//. Cosas cual es prosima a lunlotra es videda como parteni con lunlotra. On vide multe plu probable un bloco de sirculos a la sinistra, e tre blocos de sirculos a la destra.

Model:Gestalt proximity?300

Seguente, on ave la //lege de simetria//. An si on ave un presa de prosimia per grupo la duples de brasetas con lunlotra, la lege de simetria forsa ce nos persepi los como duples de brasetas ensircante la spasios blanca entre los.

Model:Law of Symmetry.jpg?300

Un otra lege es la //lege de continui//. En esta imaje a su, un de la claves es videda como su la otra, car la lege de continua condui nos a la linias de la clave a su como estendente "su" la linias (e la area blanca encluida par los) de la clave a supra

Model:CrossKeys.png?300

Un de la imajes la plu familial de psicolojia de gestaltes es lo de //figur-fondo//. Lo ia es prima introduida par la fenomenolojiste dansce Edgar Rubin (1886-1951). Esta esemplo ia deveni la simbol de gestalt e an de psicolojia:

Model:Cup or faces paradox.png?300

Nos ave un tende inata de persepi un aspeta de un aveni como la figur a fronte, e la otra como un fondo su la figur. On ave sola un imaje asi, con sola du dimensiones; ma, par cambia no cosa estra nosa disposa o atende, nos pote vide du cosas diferente. Lo es multe difisil per vide ambos a la mesma momento. (Si on consentra a la idea ce esta es sola du dimensiones, on pote susede. Esta es un de la oservas cual suporta la idea ce nos ia evolui per persepi tre dimensiones, e nos ave alga difisilias cuando vidente cosas de du dimensiones, como un depinta o desinia.)

La prinsipes de gestalt no es restrinjeda a persepi - estas es la formas notada prima. Per esemplo, memoria: esta pare ance opera par esta leges. Si tu vide un figur nonordinada, lo es plu probable ce tua memoria ta ordina alga lo per tu. O si tu esperia alga cosa cual no ave un sinifia per tu, tu va tende recorda lo como con un sinifia ce tu no ia nota a ante. Un bon esemplo es sonias: Oserva se a un ves cuando tu descrive un sonia a algun, e vide si tu no nota se altera la sonia alga per forsa ce el ave sinifia!

Aprende es un cosa cual interesa multe la psicolojistes de gestaltes. Los ia nota pronto ce nos aprende frecuente no la cosas leteral ante nos, ma la relatas entre los. Per esemplo, gales pote es instruida per pica a la plu pal de du cartes de gris. Cuando los es donada du otra cartes, un de cual es la plu pal de la du cartes prima, e la otra es un carte an plu pal, los pica no a la un cual los peca a ante, ma a la un plu pal. An alga cosa tan stupida como un gal "comprende" la idea de palia e oscuria relativa.

La teoria gestalt es bon conoseda per sua conseta de aprende par intui. Persones tende malcomprende cual los sujesta con esta terma: La gestaltistes no es parlante de flaxes de intui, ma de solve un problem par la reconose de un gestalt o prinsipe de organiza.

La esemplo la plu famosa de aprende par intui envolve un ximpanze nomida Sultan. El ia es presentada con multe problemes pratical (la plu envolvente atenta estende per un banana esta sua la estende de sua brasos, en un caje, o su un caxa). Cuando, per esemplo, el ia es permeteda jua con bastetas cual pote es liada con lunlotra como un palo de pexa, el ta comensa vide multe focada la sena de la banana e sua problemes, en un modo multe umanin. E alora, multe subita, el ia sta, asembla la bastetas, e ateni la banana.

Un esemplo simil ia envolve un xica con 5 anios, ci ia es presentada con un problem de jeografia cual es normal presentada a enfantes plu vea: Como pote on calcula la area de esta paralelogram? El ia pensa, e subita demanda un sisor. El corti un triangulo de un lado e move lo a la otra lado, cambiante la paralelogram e un retangulo simple. Wertheimer ia nomi esta //pensa produosa//. (El para un xica intelijente, en me mente!)

Model:ParallelogramArea.png?300

La idea su esta esemplos, e multe de la esplica de cosas par gestaltiste, es ce la mundo de nosa esperia es organizada en un modo sinifiante, a un grado o un otra. Cuando nos aprende o solve problemes, nos es reconose esensal la sinifia cual es ala, en la esperia, per la "des-covre".

La plu de cual nos ia esamina asi ia es asorbeda par psicolojia "corente" - a tan grado ce multe persones oblida dona lodas a la persones ci ia descovre esta prinsipes. On ave un parte plu de sua teori cual ave min aseta: //Isomorfisme//.

Isomorfisme sujeste ce lo es alga similia clar en la organiza de stimulas como gestaltes e la ativia en la serebro cuando nos persepi los. On ave un "mapa" de la esperia con la mesma ordina strutural como la esperia mesma, an si lo es "construida" de materias multe diferente. Esta va es notada par psicolojistes plu resente como George Kelly. Ma nos debe espeta pasiente ante nos pote "vide" cual forma un esperia crea en la serebro. Multe pasiente!

Kurt Lewin edita

La psicolojia de gestaltes, an si el no survive como en teoria autonom, la ave un efeto enorme. Du persones spesifada ia introdui lo en otra aspetas de psicolojia: Kurt Goldstein e Kurt Levin.

Kurt Lewin ia nase 9 setembre 1890 en Mogilno, Deutxland. El ia reseta sua diploma dotoral de la Universia de Berlin, pos studia con Stumpf. Pos servi militar, el ia reveni a Berlin do el labora con Wertheimer, Koffka, e Kohler.

El ia vade a la SUA como un lesonor visitante a Stanford e Cornell, e ia gania un posto a la Universia de Iowa en 1935. En 1944, el ia crea e dirije la Sentro per Rexerca per Dinamicas de Grupos, a MIT. El ia mori en 1947, no un tempo longa pos comensa labora ala.

Lewin ia crea un teoria topolojial cual espresa dinamicas umana en la forma de un mapa representante la "spasio de vive" de la person. La mapa es modelida con la nesesas, desiras, e goles de la person, e vetores o flexas indicante la dirijes e fortes de estas - tota operante como un Gestalt.

Esta teoria inspirada multe psicolojistes en la SUA, spesial los en psicolojia sosial. Entre los ce el ia influe ia es Muzafer Sherif, Solomon Asch, e Leon Festinger.

Kurt Goldstein edita

La otra person ia es Kurt Goldstein. El ia nase en 1878, ia reseta sua diploma medical de la Universia de Breslau en 1903. El ia instrui a la Institui Neurolojial de la Universia de Frankfurt, do el ia encontra la fundores de psicolojia de gestaltes.

El ia vade a Berlin per deveni un profesor plen ala, e alora ia vade a New York City en 1935. Ala, el ia scrive "La organisme" en 1939, e "Natur umana su la lus de patolojia" en 1963. El ia mori en 1965.

Goldstein ia developa un vista oliste de la funsiona de la serebro, fundida sur rexerca cual ia mostra ce persones con dana a la serebro pote aprende usa otra partes de sua serebro como compensa. El ia estende sua olisme a la organisme intera, e proposada ce on ave sola un motiva en la funsiona umana, e nomida lo "self-actualization" en engles, pd autoreali. La idea ce nosa motiva sentral es la autoconserva, pd la survive de la organisme, Goldstein dise es en realia patolojial! Vive es plu ca survive.

Goldstein e sua idea de autoreali ia influe multe teoristes de personalia e terapistes. Entre los ia es Gordon Allport, Carl Rogers, e Abraham Maslow, la fundores de la promove de psicolojia umaniste american.