La Rio Mecong es un rio en Asia sude-este. Lo es la rio 12 en longia en la mundo, e la rio 7 en Asia. Sua longia es sirca 4350 km e lo drena un area de 795,000 km2. De la Plano Tibetan, a rio core tra la provinse Yunnan en Xina, e tra Miama, Lau, Tai, Camputxa, e Vietnam. En 1995, Lau, Tai, Camputxa, e Vietnam ia fundi la Comision de la Rio Mecong per manaje e coordina la usa de la recursos de la Mecong. En 1996, Xina e Miama ia deveni "asosiores de dialogo".

Un mapa de la basin de la Rio Mecong
La rio en Lau
Un mercato flotante en la estuario de la Rio Mecong

La varias estrema de la saisones de flue, e la esiste de cascades e cores rapida en la Mecong fa ce naviga es difisil. An tal, la rio es un via major de comersia entre Xina ueste e Asia sude-este.

No otra rio es abitada par tan multe spesies de pexes multe grande. La plu grande inclui tre spesies de barbos, cual pote crese a 1.5 m e 70 kg, la raia de spina jigante, cual ateni a min 5 m en longia e 1.9 m en largia, la pangasio jigante, la barba jigante, e la pex gatin jigante de la Mecong. La tre notada final pote crese a sirca 3 m en longia e 300 kg. Ma tota de esta pexes ia descrese multe par pararios, controla de deluvias, e pexa esedente.

On ave ance alga mamales de la pantanes. Un spesies de delfin de acua dulse, la delfin irawadi, ia es comun en la pasada en la Mecong basa intera, ma aora es multe rara, con sola 85 individuas restante. Otra mamales inclui la lutra lisa e la gato pexante.

La crocodil tai es un spesie menasada. Lo abita en poxes peti e isolida en la partes camputxa e lau de la Rio Mecong. La crocodil de mar ia es trovada de la estuario de la Mecong a Tonle Sap e ultra, ma es aora estinguida en la rio.

La difisilia de naviga la rio ia resulta en la divide, e no la uni, de la popla ce abita prosima. La vilas la plu temprana dati a 210 aec, con Ban Chiang como un esemplo eselente de un cultur de la Eda de Fero temprana. La sivilia la plu temprana recordada ia es la cultur de Funan de la sentenio prima ec, un esemplo de un cultur cmer indianida, en la estuario. Escavas a Oc Eo, prosima a An Giang moderne, ia trova moneta de tan distante como la Impero Roman. Esta ia es segueda par la la cultur cmer de a stato de Chenla sirca la sentenio 5. La Impero Cmer de Angkor ia es la stato indianida grande final en la rejion. De sirca la tempo de la cade de la Impero Cmer, la Mecong ia es la borda entre la statos emerjente de Siam (Tai) e Toncin (Vietnam norde), con Lau e Camputxa, alora a la costa, divideda entre sua influe.

La influe de Europa ia comensa en la sentenio 16. La franses ia invade la area en la sentenio 19, e prende Saigon en 1861. De la Gera Indoxina un con la franses, asta la fini de la Gera Indoxina du entre la SUA e Vietnam, la popla, la area, e an la rio ia sufri multe.