La Rio Thames [temz] es un rio cual flue tra England sude, xef tra London. Con 346 km, lo es la plu longa de la rios locada intera en England e la numero du de la plu longas en la Rena Unida, pos la Rio Severn.

Mapa de la Rio Thames.

Lo flue ance tra Oxford (do on nomi lo la Rio Isis), Reading, Henley-on-Thames e Windsor. La curso basa de la rio es nomida la Tideway ("via mareal") par causa de la estende longa de sua parte mareal asta la clusa a Teddington. Lo fonti a Thames Head en la contia Gloucestershire, e flue tra la Estuario de Thames asta la Mar Norde. Lo drena la intera de London Grande.

Sua parte mareal inclui la plu de sua pasa tra London, e asende e desende par 7 metres. La rio flue tra alga de la partes la plu seca de Britan e on estrae multe acua bevable de lo. Si on considera sua longia e largia, la volum de acua en la Rio Thames es basa: la Rio Severn ave cuasi la duple de la volum per promedia, an si sua basin de drena es min grande. En Scotland, la Rio Tay ave plu ca la duple de la volum promedia per un basin de drena cual es plu peti par 60%.

Longo la curso de la Rio Thames es 45 clusas navigable, acompaniada par pararios basa. Sua zona de catura covre un parte grande de la sude-este de England, e un parte peti de England ueste. Lo es nurida par 38 afluentes nomida, e conteni plu ca 80 isolas.

Con acuas variante de dulse a cuasi marin, la Rio Thames suporta viventes savaje diversa e es bordada par alga Locas de Interesa Siensal Spesial, de cual la plu grande ocupa 5449 ectares en la partes restante de la Pantanes de Kent Norde.