La rota de la anio
La tronco de iul, con un asendente de Santa
Un crus de San Brigid, Er
La diva Ostara, par Johannes Gehrts
Dansa su la palo de maio en England
Un foco de festa en Suomi
Colie prima en Cimri
Simboles de la colie, Canada
Un lampa de un nabo de Er

La Rota de la Anio es un sicle anial de festas saisonal, notada par multe paganes moderna, composada de la avenis solal xef de la anio (pd solstisios e ecuinotes) e a la puntos media entre los. La nomes per esta festa varia entre tradisiones. Esta sicle de saisones ia es importante per multe popla, antica e moderna. Festas moderna depende tipal sur tradisiones folclor, sin multe atende a la praticas de paganes istorial. Atestas istorial e arceolojia sujesta ce popla antica ia varia sua festas. Per esemplo, la anglosasones ia selebra la solstisios e ecuinotes, ma la celtas ia selebra la puntos media con festas de foco. A su es un lista, con detalias:


Solstisio de InvernoEdita

20-23 desembre

(iul, inverno media, brumalia, saturnalia, natal...)

Iul es reconoseda como un punto de turna sinifiante en la sicle de la anio de la eda de petras tarda. La locas megalitica antica, como Newgrange e Stonehenge, es, per esemplo, aliniada con la leva e reposa de la sol a la solstisio. La reversa de la esflue de la sol es un simbol de la renase de la dio Sol, e predise la reveni de la saisones fertil. En multe tradisiones, esta es la plu importante festa. An si la festa es selebrada en multe modos en tradisiones variosa, bancetas, ofres, e donadas es comun. Ance, trae talos e garlandas de sempreverdes (pe ilex, edera, viscio, taxo, e pino) en la casa e decora arbores es ance comun en areas norde.


ImbolcEdita

2 febrero

(misa de candelas, disablot...)

Esta dia segue iul, tipal a la dia prima de febrero, e marca la tisas prima de primavera. Lo es un tempo per puri e limpi la casa en espeta de la vive nova de la anio. En Roma, lo ia es la selebra de la pastores. La celtas ia asosia lo con la comensa de leti de la ovea ante la pari de la ovetas de primavera. Ance per la celtas, la festa onora la diva Brigid, fia de la Dagda e un de la Tuatha De Danann. Per alga uicanes, esta es la tempo per prometes e rededicas per la anio


Ecuinote de PrimaveraEdita

19-22 marte

(ostara, liberalia, hilaria. alban eilir...)

Derivada de un reconstrui produida par Jacob Grimm de un nom deutx alta vea de la nom de un diva engles vea: Eostre o Ostara, lo marca la ecuinote de primavera en alga tradisiones pagan. En alga tradisiones druid moderna, esta festa es la festa du de tre selebras de primavera (pd la punto media entre imbolc e beltane), en cuando lus e oscuria es denova ecuilibrada, con lus asendente. Lo es un comensas nova.


BeltinEdita

1 maio

(sera de maio, floralia, note de walpurgis...)

Beltin es la prima dia de estate en Er. En Roma, la selebra la plu temprana ia apare en la edas pre-`cristian con la festa de Flora, la diva de flores. La dia es bon conoseda per dansa sirca la palo de maio e la coroni de la Rena de Maio. En tradisiones moderna, esta festa reconose la potia de vive plen, la verdi de la mundo, jovenia, e flori.


Solstisio de EstateEdita

19-23 junio

(litha, media de estate)

Litha es un de la cuatro festas solal e es videda como la punto a cual estate ateni sua altia e la sol brilia la plu longa. Alga uicanes nomi la festa Litha, un nom cual aveni en De Temporum Ratione ("La calcula de tempo", de la sentenio oto), cual conserva un lista de la nomes anglosason per la menses (alora ja desusada). Ærra Liða coresponde aprosima a junio, e Æfterra Liða a julio. Bede ia scrive ce Litha sinifia jentil o navigable, ca en ambos de esta menses, la ventas es calma e la mares lisa. Litha es egal en sinifia per la neodruidas con Iul, e selebra esta aveni a Stonehenge.


LughnasadhEdita

agosto 1

(pron./ˈluːnəsə/; acc lunasa, lammas, sera de agosto)

Es la prima de la tre festas de colie per uicanes, con la ecuinote de autono e samhain. Lo es marcada par la forni de un figur de la dio en pan e come los, per simboli la santia e importa de la colie. La nom Lammas es un corti per engles vea "la misa de la pan", e es un festa fundida sur cultiva e un grasia per le gran e pan, cual simboli la frutas prima de la colie. Festas cristian ia adota, posible, alga de esta rituos. La nom sinifia "asembla de la dio Lugh", un de la áin Bó Cúalnge de mitolojia eres.

Ecuinote de AutonoEdita

21-24 setembre

(mabon, festa de la colie...)

Esta ecuinote coresponde a la idea de thanksgiving ("dona de grasias") e otoberfest ("la festa de otobre"), cuando on dona grasia per la frutas de la tera e un reconose de la nesesa per comparti los per reseta la bondises de la diva e la dio en la menses veninte de inverno. La nom Mabon ia refere a Mabon ap Modron de mitolojia cimri.


SamhainEdita

1 novembre

(pronunsiada /ˈsuɪn/; vijila de tota santas, halloween...)

Neopaganes onora la mor como parte de la rituos de samhain. Samhain es videda como un tempo per selebra la vives de los ci ia mori, e envolve dona de onora a asendentes, membros de la familia, veas de la fida, amis, etc. En alga selebras, la spiritos de la mor es invitada a la banceta. Lo es videda como la punto oposante de beltin, cual es un festa de lus e fertilia. Multe crede ce a samhain, la velo entre esta mundo e la mundo posmori es a la plu magra en la anio intera, cuando lo es plu fasil per comunica con los ci ia sorti esta mundo. En tempos moderna, multe cultures selebra la sera final de otobre con vestes fantasin, la jua de trucos e mendica de confetos, e simil. La dia seguente es la dia de tota santas en cristiania.